नगरपालिकाले ५८ लाख खर्चेर 'सुँगुरको मूर्ति' बनाएपछि... (भिडियाे)

बेलका-, मैनामैनीमा बनाइएकाे बराहकाे प्रतिमा । तस्वीरः रमेश पाैडेल ।

A+ A A-

सामाजिक सञ्जालमा ठ्याक्कै सुँगुरजस्ताे देखिने एउटा मूर्ति भाइरल छ । याे प्रतिमा उदयपुरको बेलका नगरपालिकाले ५८ लाख रुपैयाँ खर्चेर बनाएकाे हाे । मैनामैनी-७, मूलगाउँमा बनिरहेकाे याे प्रतिमा खासमा बराह (बँदेल)काे हाे । नगरपालिकाका अनुसार याे पूर्णरूपमा बनिसक्न बाँकी छ । त्यसैले सुँगुरजस्ताे देखिएकाे छ । दाह्रा हाल्ने, रङ लगाउनेजस्ता काम भइरहेकाे नगरपालिकाले जनाएकाे छ ।

यसले चर्चा पाउनुकाे मूल कारणचाहिँ बनाउँदाकाे लागत हाे । १२ फिट चाैडाइ र १६ फिट लम्बाइकाे याे मूर्ति बनाउन नगरपालिकाले ५८ लाख खर्च गरेकाे छ । दसैँतिर उद्घाटनकाे तयारी गरिएको मूर्तिकाे डिजाइनमा धेरै खर्च भएकाे देखिन्छ ।

यसबारे प्रश्न गर्दा नगरप्रमुख दुर्गाकुमार थापाले कलाकाे कुनै मूल्य नहुने जवाफ दिए । आफूहरूले कलाकारको सम्मान गरेर कुनै बार्गेनिङ नगरेको उनको भनाइ छ ।

तर, धेरैले यसलाई नगरपालिकाको अनावश्यक स्वाङ भनेका छन् । राम्रो क्याम्पस, हस्पिटल नभएको नगरपालिकाले ५८/६० लाख खर्चेर सुँगुरको मूर्ति बनाएको भनेर विरोध पनि भइरहेकाे छ ।

यसरी आलाेचना गरिरहेकाहरूलाई मेयर थापाकाे जवाफ छ- याे कुनै साैख वा रहर पूरा गर्न बनाइएकाे हाेइन । किराँत समुदायकाे धर्म, संस्कृतिकाे प्रचार एवं नगरपालिकाकाे पर्यटन प्रवर्धनका लागि बनाइएकाे हाे ।

उनका अनुसार किराँत समुदायमा बराहको विशेष धार्मिक महत्त्व छ । मैनामैनी किराँतीहरूको बाहुल्य रहेको पुरानो गाउँ हो । त्यसैले किराँत समुदायको धर्म, संस्कृतिको प्रवर्द्धन तथा प्रचार गर्न मूर्ति ठड्याइएकाे उनी बताउँछन् ।

तर, यत्तिकाे मूर्ति बनाउन पनि ५८ लाख कसरी खर्च भयो त ? हेर्नुहाेस् भिडियाे रिपाेर्ट ः