खुल्ने अनुमति पाएर पनि बन्द छन् सिनेमा हलका ढोका (फोटोफिचर)

A+ A A-

काठमाडौंको सुन्धारास्थित सिभिल मलमा मान्छेहरूको निकै भिडभाड देखिन्थ्यो । लुगा पसलदेखि रेस्टुरेन्टसम्म मान्छेहरूको घुइँचो थियो ।

तर, त्यही मलमा रहेको क्यूएफएक्स हल भने सुनसान देखिन्थ्यो । न त्यहाँ कोही मान्छे थिए, न कर्मचारी नै । त्यहाँ रहेका सेक्युरेटी गार्डले भने, 'हल त खुलेको छैन । अझै केही दिन खुल्दैन होला ।'

मलको भिडभाड देख्दा लाग्छ, कोरोनाको डर कसैलाई छैन । तर, त्यही हलमा पुग्दा लाग्छ- महामारीको त्रास अझै छ ।

सुन्धाराकै सीटीसी मलमा रहेको सिनेमा हल 'सीडीसी'को पनि हालत उस्तै थियो । मलमा रहेका सम्पूर्ण पसलहरू भरिभराउ थिए । रेस्टुरेन्टमा मान्छेहरू ढुक्कैसँग बसेर खाइरहेका थिए । तर, हलमा कोही देखिएनन् ।

सीडीसी हलको काउन्टर नै बन्द थियो । हलमा छिर्ने गेटमा ताल्चा ठोकिएको थियो । त्यहाँबाटै बुझ्न सकिन्छ, अहिले तत्काल हल खुलिहाल्ने अवस्थामा छैन ।

यस्तै दृश्य देखियो बानेश्वरमा रहेको 'वान सिनेमाज' मा पनि । हल झिर्ने ठाउँमा नै रेस्टुरेन्ट छ । उक्त रेस्टुरेन्टमा धेरै ग्राहकहरू देखिन्‍छन् । कोही खाइरहेका, कोही टिकटक बनाउँदै नाचिरहेका । तर, हलको ढोका भने बन्द नै छ ।

व्यवस्थापक उमेशराज गिरी हलमा भेटिए । आफूहरूले सम्पूर्ण तयारी सकिसके पनि फिल्म नै नभएका कारण हल नखुलेको गुनासो उनले गरे ।

उनले भने, 'हामीले हल सेनिटाइज गर्नेदेखि दूरी कायम गर्नका लागि सम्पूर्ण प्रावधान मिलाइसकेका छौँ । तर, फिल्म नभएका कारण हल खोल्न सकिएन । यदि वितरकहरूले फिल्म दिनुभयो भने हामी तत्काल हल खोल्न तयार छौँ ।'

'वान सिनेमाज्' को टिकट काउन्टरमा पनि दूरी कायम गर्न चिह्न लगाइएको छ । खाजा किन्ने ठाउँमा पनि दूरी कायम गर्ने प्रावधान मिलाइएको छ । भित्र हलमा पनि दूरी बनाएर नै दर्शक राखिने व्यवस्थापक गिरीले बताए ।

कमलपोखरीमा रहेको 'विग मुभिज' भने अहिले पुनर्निर्माणमा व्यस्त छ । हलको सरसफाइदेखि सिट मिलाउनेसम्मको काम गरिरहेको छ, विग मुभिजले ।

विग मुभिजका व्यवस्थापक दीपेश शर्मा तत्काल हल नखुल्ने बताउँछन् । उनी भन्छन्, 'एक्कासि निर्णय आयो । हामी हल खोल्नका लागि तयार भएकै थिएनौँ । अब सरसफाइ गरेर कोभिडको सम्पूर्ण सावधानी अपनाएर नै हामी हल सञ्चालन गर्नेछौँ ।'

कमलपोखरीमा नै रहेको अर्को 'कुमारी हल' भने सदाका लागि बन्द भइसकेको छ । बुझिएअनुसार अब उक्त हल कलेजमा परिणत हुँदै छ ।

०००

काठमाडौं, ललितपुर र भक्तपुरका जिल्ला अधिकारीहरूको बैठकले बिहीबारबाट फिल्म हल खोल्ने अनुमति दिइसकेका छन् । तर, सरसर्ती हेर्दा अनुमति पाएर पनि उपत्यकाका कुनै पनि हल खुला भएका छैनन् । केही हल फिल्म नपाएर बन्द भएका छन् भने केही हलहरू अझै पूर्वतयारीमा नै छन् ।

तत्काल हलमा दर्शकको उपस्थिति हुने माहोल नै छैन । यस्तो अवस्थामा जोखिम मोलेर कोही पनि निर्माताहरू फिल्‍म रिलिजका लागि तयार भएका छैनन् । त्यसैले अहिले वितरक, निर्माता तथा हलवालाहरूबीच कुन-कुन फिल्म कसरी रिलिज गर्ने भन्ने विषयमा छलफल चलिरहेको छ ।

यो पनि पढ्नुस् : फिल्मकर्मीमै उब्जिएको प्रश्न : हल त खुल्यो, देखाउने के ?

फोटो : सुशील श्रेष्ठ