अर्थमन्त्रीले ढाँटेको भन्दै उद्योगी आक्रोशित

A+ A A-

निर्यातमूलक उद्योगसँग सम्बन्धित संस्थाका अधिकारीले बजेटमार्फत अर्थमन्त्रीले ढाँटेको भन्दै आक्रोश व्यक्त गरेका छन् । बजेटले निर्यातमूलक उद्योगलाई प्रोत्साहन गर्न नसकेको भन्दै उनीहरु आक्रोशित भएका हुन् ।

बुधबार काठमाडौंमा संयुक्त पत्रकार सम्मेलन गर्दै विभिन्न निर्यातमूलक उद्योग सञ्चालकले सरकारले आफूलाई दिएको आश्वासन पूरा नगरेकोमा गुनासोसमेत गरे ।

नेपाल हस्तकला महासंघ, नेपाल पस्मिना उद्योग संघ, नेपाल रेशम संघ, नेपाल गलैंचा उत्पादक तथा निर्यातक संघ, नेपाल तयारी पोसाक उद्योग संघ, नेपाल हाते कागज संघ, नेपाल जडीबुटी तथा जडीबुटी उत्पादक संघ, ऊनी फेल्ट उत्पादक तथा निर्यातक संघ, नेपाल निर्यात परिषद, नेपाल ऊनी विकास संघ र नेपाल चिया उद्योग संघले बजेटले संयुक्त रुपमा पत्रकार सम्मेलनको आयोजना गरेको थियो ।

‘कम्तीमा हामीलाई प्रतिस्पर्धा गर्न सक्ने वातावरण बनाइदेऊ भनेर अर्थमन्त्री र प्रधानमन्त्रीलाई लेखेरै दिएको हो,’ तयारी पोसाक उद्योग संघका अध्यक्ष चण्डिप्रसाद अर्यालले भने, ‘सरकारले लोन, यसका प्रक्रियालगायतमा हामीलाई झन्झट दिने काम भएको छ।’

निर्यातजन्य वस्तुहरु महँगो भएको र खासगरी नजिकैको समुद्रसँगको दूरी लामो भएकाले ढुवानी लागतको भार बढी भएको भन्दै नेपाल हाते कागज संघका अध्यक्ष रामबहदुर गुरुङले दुखेसो पोखे ।

उनले सहुलियत कर्जाको व्यवस्था मिलाइदिन पनि सरकारले कन्जुस्याइँ गरेको गुनासो गरे। चालू पुँजीमा ४, ५ प्रतिशत ब्याजदरसहित पुनर्कर्जा उपलब्ध गराउन र यसको समयावधि नवीकरण १ वर्ष कायम गर्न उनले माग गरे ।

तयारी पोसाक संघका अध्यक्ष अर्यालले स्थिर पुँजीको कर्जा लगानीमा पनि सहुलियत ब्याजदर अर्थात् ३ प्रतिशत ब्याजदर कायम गरी त्यसको भुक्तानी ७ वर्ष कायम गरिनुपर्ने बताए। निर्यात प्रवर्धन गर्न सोही उद्योग परियोजना मात्र धितो राख्ने व्यवस्था हुनुपर्ने उनको भनाइ छ।

‘थप धितो बन्देज खारेज हुनुपर्छ,’ अर्यालले भने ।

प्रकाशित मिति: बिहीबार, जेठ २३, २०७६ ००:५९