काठमाडौंका प्राञ्जल चालिसेले जिते 'ग्लोकल टिन हिरो २०२१' को उपाधि

A+ A A-

ग्लोकल प्रालिद्वारा आयोजित 'ग्लोकल टिन हिरो २०२१' को उपाधि काठमाडौंका प्राञ्जल चालिसेले जित्न सफल भएका छन् । किशोरकिशोरीहरूमा भएको प्रेरणा र उत्साहलाई प्रस्फुटन गरी उनीहरूले समाजमा गरेको प्रभावकारी कार्यलाई कदर र अरु माझ चिनाउने कार्यक्रम 'वाई वाई ग्लोकल टिन हिरो' नेपालको यो सातौँ संस्करण हो ।

अनलाइन कार्यक्रमका बीच ग्लोकल टीन हिरो नेपाल, २०२१ को घोषणा गरिएको हो । कार्यक्रममा प्रधानमन्त्री शेरबहादुर देउवाले पनि शुभकामना सन्देशमार्फत कार्यक्रमको सफल सञ्चालन तथा समापनका लागि शुभकामना व्यक्त गरेका थिए ।

वाइवाइ ग्लोकल टिन हिरोका अन्तिम ६ प्रतिस्पर्धी अनुराग चापागाईं, यूटुबर, दीपक सुतिहार, सामाजिक उद्यमी, खुस्बु भण्डारी, वन्यजन्तु संरक्षणवादी, नेहा गुरुङ, सामाजिक अभियन्ता, र प्राञ्जल चालिसे, टेक्नोप्रेनेउरबीच प्रतियोगिताको विजेता चयन गरिएको थियो ।

प्राञ्जलले दृष्टि नेपालको आविष्कार गरी दृष्टिविहीन समुदायलाई मुद्रा बिल पहिचान र नगद लेनदेनमा मद्दत गरिरहेका छन् । त्यस्तै गरी, उनले कृषि समाचार र प्रामाणिक स्रोतहरूबाट जानकारी प्रदान गर्ने एक मोबाइल एप निर्माण गरेका छन्, जसबाट किसानहरूलाई मद्दत मिलेको छ । महिलाहरूको सुरक्षा सुनिश्चित गर्न एवम् कारणहरूका कारण अवसरहरूबाट वञ्चित हुन नपरोस् भन्नका लागि उनले एक महिला सुरक्षाएप पनि निर्माण गरेका छन् । उनका अन्य दुई शैक्षिक एपहरू छन् जसमा ७५०० प्रयोगकर्ताहरू छन् ।

प्राञ्जलले एक गैरनाफामुखी टेक्नोलोजी उद्यम 'ई–शिक्षिका नेपाल'को सुरुवात गरेका छन, जसले अनलाइन शिक्षाको गुणस्तर बढाउने तथा शैक्षिक स्रोतहरूलाई अझ सुलभ बनाउन मद्दत गर्दछ ।उनी नेपाल फाउन्डेसन इनिसिएटिभ बोर्डका सदस्य हुन् र हाल ब्लकचेन टेक्नोलोजी र स्मार्ट ठेक्काहरू र टेक्नोलोजिकल उन्नतिले विस्तारित लेनदेन प्रक्रियाहरूको लागतलाई कम गर्न के गर्न सकिन्छ भन्ने अनुसन्धानमा काम गरिरहेका छन् ।

यस वर्षको निर्णायक टोलीमा युरोपियन युनियनका राजदूत नोना डेप्रेज, गोल्डस्टारको मार्केटिङ, ब्रान्डिङ र व्यवसाय विकास निर्देशक विधुसी राणा, सीजी कर्प ग्लोबलका प्रबन्ध निर्देशक वरुण चौधरी, नेपालका लागि कोकाकोला कम्पनीका कन्ट्री निर्देशक आदर्श अवस्थी र ज्योति ग्रुप अफ कम्पनीका निर्देशक र स्याकार ट्रेडिङ कम्पनीका अध्यक्ष सौरभ ज्योति रहेका थिए ।

देशभरिका प्रतिभावान् किशोरकिशोरीहरूलाई एकैसाथ ल्याउन ग्लोकलसँग विभिन्न संघसंस्थाहरू साझेदारका रूपमा जोडिएका थिए । आयोजकले संस्था ग्लोकल प्रालिले शीर्षक साझेदारको रूपमा वाइवाइसँग साझेदारी गरेको छ, रणनीतिक साझेदारको रूपमा भारतीय दूतावास, युनेस्को र युरोपेली संघ, आधिकारिक होटल साझेदारका रूपमा द सोल्टी होटेल, पार्टनरका रूपमा कोकाकोला, होन्डा, टोयोटा, पञ्चकन्या, डोल्मा, डिसहोम, डब्ल्यूडब्ल्यूएफ नेपाल, द ब्रिटिस कलेज, आतिथ्य पार्टनरमा कोजी होम बीएन्डबी, सिद्धार्थ बिजनेस ग्रुप अफ हसपिटालिटी ,एयरलाइन्स पार्टनरमा टर्किस एयरलाइन्स, शिक्षा पार्टनरमा किङ्स कलेज, विद्या संस्कार र चेल्सी कलेज, पीआर पार्टनरमा भी– चित्र, टेलिभिजन पार्टनरमा योहो टेलिभिजन र समर्थकमा वर्ल्ड लिंक, ई–सेवा, यूएनभी, गेनेसे क्लाउड एकेडेमी, आइसेक, क्विक्स र भ्यु योर चोइस थिए ।

प्रकाशित मिति: बिहीबार, भदौ १७, २०७८ १७:५९