१० सांसदले एमाले छाडेसँगै प्रदेश १ सरकार अल्पमतमा, मुख्यमन्त्री आचार्यको राजीनामा माग

१० सांसदले एमाले छाडेसँगै प्रदेश १ सरकार अल्पमतमा, मुख्यमन्त्री आचार्यको राजीनामा माग

A+ A A-

एमालेका १० सांसदले माधव नेपाल नेतृत्वको नेकपा एकीकृत समाजवादीको पक्षमा सनाखत गरेपछि प्रदेश १ सरकार ढल्ने निश्चित भएको छ ।

बुधबार निर्वाचन आयोग प्रादेशिक कार्यालयमा गइ १० सांसदले एकीकृत समाजवादी पार्टीमा सनाखत गरेपछि प्रदेश १ मा एमालेको सरकार अल्पमतमा परेको छ । योसँगै एक साता अघि मुख्यमन्त्री बनेका भीम आचार्य नेतृत्वको सरकार ढल्ने लगभग निश्चित भएको हो ।

यसअघि १० भदौमा एकताका लागि भन्दै शेरधन राईले दलको नेता र मुख्यमन्त्रीबाट राजीनामा दिएका थिए । त्यसपछि आचार्यलाई बहुमत प्राप्त दलको नेताको हैसियतमा मुख्यमन्त्री बनाइएको थियो । आचार्यले माधव नेपालको साथ छाडेपछि मुख्यमन्त्री बन्ने अवसर पाएका हुन् ।

तर उनले एकीकृत समाजवादीमा लागेका सांसदलाई रोक्न नसक्दा आचार्य नेतृत्वको सरकार एक महिना पनि नटिक्ने अवस्था आएको हो ।

आचार्यले मुख्यमन्त्री भएसँगै नेपालनिकट सांसदलाई आफ्नो पक्षमा ल्याउनका लागि मन्त्री बनाउने, पार्टीमा जिम्मेवारी दिनेसहितका ‘अफर’ गरेका थिए । तर, उनको प्रयास सार्थक हुन सकेन ।

प्रदेशसभामा बहुमतको लागि ४७ सांसद आवश्यक पर्छ । अब एमालेमा सभामुखसहित ४१ सांसद छन् । निर्वाचन आयोगले २२ भदौसम्म दल रोज्ने समयसीमा तोकेकाले समाजवादीमा सांसद संख्या बढ्न सक्ने देखिन्छ ।

प्रदेशसभामा अहिले नेपाली कांग्रेसका २१, नेकपा माओवादी केन्द्रका १५, एकीकृत समाजवादीका १०, जनता समाजवादी पार्टीका तीन, संघीय लोकतान्त्रिक राष्ट्रिय मञ्चका एक र राप्रपाका एक सांसद छन् । राप्रपाकी ईन्दिरा राईबाहेक सबै विपक्षी गठबन्धनमा आबद्ध रहेकोले गठबन्धनको पक्षमा ५० सांसद हुने विपक्षी गठबन्धनको दाबी छ ।

एकीकृत समाजवादीका केन्द्रीय सदस्य समेत रहेका राजेन्द्र राईले पार्टी विभाजन भएसँगै मुख्यमन्त्री आचार्य अल्पमतमा परेको बताए । अल्पमतमा परेका उनले राजीनामा दिनुपर्ने नेता राईको माग छ । ‘दल विभाजन भएसँगै अल्पमतमा परेको उहाँहरूलाई थाहा भइसकेको छ । नैतिकताका आधारमा उहाँ आफैले राजीनामा दिएर मार्ग प्रशस्त गर्नुपर्छ,’ उनले शिलापत्रसँग भने, ‘अब नैतिकता नै गुमाउने हो भने कसको के लाग्छ?, राजीनामा नदिएको खण्डमा अविश्वासको प्रस्ताव ल्याउँछौँ ।’

नेता राईले प्रदेशमा दल विभाजनको कानुनी मान्यताको प्रक्रिया पूरा गर्न केही समय लाग्ने भएकाले अल्पमतमा परिसकेका मुख्यमन्त्री आचार्य आफैंले सरकार छाड्ने अपेक्षा गरेको बताए ।

प्रकाशित मिति: बुधबार, भदौ १६, २०७८ १६:१९