मनोज पण्डित निर्देशित 'एक' को ट्रेलर सार्वजनिक

A+ A A-

मनोज पण्डितको निर्देशनमा बनेको फिल्म 'एक' को ट्रेलर सार्वजनिक भएको छ ।

सोमबार युट्युबमार्फत फिल्मको ट्रेलर सार्वजनिक गरिएको हो । ट्रेलरमा विशेषत: द्वन्द्वलाई स्थान दिइएको छ ।

राजनीतिमा हुने विभिन्न षड्यन्त्र र बाह्य हस्तक्षेपको कथामा आधारित यस फिल्म विशेषगरी मधेसको मुद्दामा केन्द्रित छ । फिल्‍ममा विशाल पोखरेल, प्रमोद अग्रहरी र ज्योत्स्ना योगीको अभिनय रहेको छ ।

स्क्रिप्ट फ्याक्ट्रीको ब्यानरमा बनेको फिल्ममा प्रमोद खड्काको द्वन्द्व निर्देशन रहेको छ । आत्मा गुरागाईं र सोफिया थापाले निर्माण गरेको फिल्‍मलाई दीपक बज्राचार्यले छायांकन गरेका हुन् ।

फिल्म घटस्थापनाका दिन २१ असोजमा डिजिटल प्लेटफर्ममा रिलिज हुनेछ ।

फिल्म 'एक' बारे निर्देशकीय तर्क पण्डितकै शब्दमा :

विदेशी शक्ति केन्द्रहरूको स्वार्थका लागि नेपाल ‘प्ले ग्राउन्ड’ बनेको तथ्यलाई कसैले नकार्न मिल्दैन । यसैका कारण नेपालको राजनीति सधै अस्थिर नै भइरह्यो । र त्यसको परिणाम नेपाली जनताले भोग्न बाध्य भइरहनु परेको छ ।

हस्तक्षेपको अनेकन स्वरूपहरू देखेर हुर्केको हुँदा म भित्र आफ्नो देश जोगाउनुपर्छ भन्ने विचार र भावना अत्यन्त क्रियाशील छ । यसैको परिणाम हो फिल्मा ‘एक’।

'ग्रेटर नेपाल' वृत्तचित्र बनाउँदा भारतसँग ‘सिमाना जोडिएका तराईका भूगोल छिचोल्दै गर्दा मैले स्वतन्त्र मधेसको राजनैतिक विचार बोकेका केही युवासँग भेट्ने मौका पाएको थिएँ । र उनीहरूको त्यो विखण्डनकारी सोचेको पृष्ठभूमि बुझ्ने मौका पनि पाएको थिएँ ।

जो मेरो सोचको ठ्याक्कै विपरीत थियो । पछिल्लो चरणमा त्यो विखण्डनको सोच बढ्दै जाँदा म भित्र यस्तो चिन्ता बढ्नु स्वभाविकै थियो । र यसमा विदेशी शक्तिको आफ्नो स्वार्थ जोडिनुले झनै चिन्ता बढाइदिएको थियो । एउटा सामान्य नागरिक भएको हिसाबले हाम्रो देश विदेशी स्वार्थहरूको क्रिडास्थल बनिरहँदा त्यसका विरुद्ध धेरै ठूलो प्रतिक्रिया दिन नसके पनि आफ्नो सृजनशीलताका माध्यममार्फत त्यो परिस्थितिलाई चुनौती दिने कथामा आधारित चित्रकथा भन्छु भन्ने निर्णय मैले गरेँ ।

र, यही उत्प्रेरणामा ‘सीएसआई’ नामक एउटा त्यस्तो काल्पनिक गुप्तचर संस्थाको परिकल्पना गरेँ । जसले देशका विरूद्ध हुने सम्पूर्ण विदेशी षड्यन्त्रहरूलाई निस्तेज पार्नेछ । अनि त्यही संस्थाको जिम्मेवार र इमान्दार एजेन्टको मधेश विखण्डनकारी शक्तिविरूद्धको संघर्षमा आधारित भएर फिल्म ‘एक’ जन्मियो ।

हेर्नुस् ट्रेलर :