एकीकृत समाजवादीमा १० सांसद खुलेसँगै मुख्यमन्त्री आचार्य संकटमा

A+ A A-

नेकपा एमाले औपचारिक रुपमा विभाजन भएसँगै यतिबेला प्रदेश र स्थानीय तहको राजनीति रन्किएको छ ।

निर्वाचन आयोगले प्रदेश र स्थानीय तहका जनप्रतिनिधिका लागि पार्टी रोज्ने समयसीमा २२ भदौसम्मका लागि तोकेसँगै यस्तो अवस्था बनेको हो ।

सो समयभित्रमा पार्टी छनोट गर्नुपर्ने भएकाले पनि यतिबेला माधव नेपाल नेतृत्वको एकीकृत समाजवादीले सकेसम्म धेरे जनालाई आफ्नो पक्षमा ल्याउन कसरत गरिरहेको छ । यस्तै संस्थापन पक्ष भने प्रदेश सांसद तथा स्थानीय तहका प्रतिनिधिलाई रोक्न जोडबल लगाइरहेको छ ।

केही दिन अघि मात्र एमाले सचिव समेत रहेका भीम आचार्यले पार्टी विभाजनमा नलाग्ने भन्दै माधव नेपालको साथ छाडेका थिए । लगत्तै उनी प्रदेश १ का मुख्यमन्त्री बने ।

आचार्यलाई मुख्यमन्त्री बन्न माधव नेपालनिकट १० सांसदले साथ दिएका थिए । तर, त्यसमध्ये केही सांसद अहिले एकीकृत समाजवादीमा खुलिसकेका छन् । एमालेबाट आधा दर्जन सांसदले मात्र एकीकृत समाजवादीमा लाग्ने निर्णय गरेमा प्रदेश १ सरकार अल्पमतमा पर्छ ।

यतिबेला एकीकृत समाजवादीमा १० जना सांसद प्रष्ट रुपमा खुलिसकेका छन् । सो पार्टीका नेता तथा प्रदेश सांसद राजेन्द्रकुमार राईका अनुसार १० जना सांसदले सामुहिक रुपमै समाजवादीमा रहने निर्णय गरिसकेका छन् ।

यसरी नयाँ दलको पक्षमा खुल्नेमा नेता राजेन्द्र राईसहित राजन राई, उपेन्द्र घिमिरे, सावित्री रेग्मी, खिनु लङ्वा लिम्बू, गणेश काङमाङ, कृष्णकुमारी राई, पदमकुमारी गुरुङ, सुनिता चौधरी र सरिता थापा छन् ।

उनीहरूमध्ये रेग्मी र लङ्वा यसअघि एमालेको संसदीय दलको बैठकमा सहभागी भएकाले पार्टी नछोड्ने आँकलन गरिएको थियो ।

यता, एकीकृत समाजवादी पार्टीमा आउने सांसदको विवरण मंगलबार नै निर्वाचनमा आयोगमा दिइने तयारी छ । नेपाल समूहमा रहेका बाहेक ओली समूहमा रहेका केही सांसद पनि नयाँ पार्टीमा आबद्ध हुने नेता राईको दाबी छ ।

यतिबेला एकीकृत समाजवादीले आफूनिकटका १० सांसदलाई शुक्रबारदेखि नै विराटनगरस्थित बिग होटलमा राखेको छ । एमालेले मन्त्रीसहित विभिन्न पद दिने आश्वासन देखाएर आफूतिर तान्न सक्ने भन्दै उनीहरूलाई होटलमा राखिएको बताइएको छ ।

प्रदेशसभाको बहुमत ४७ सांसद पुर्‍याउनका लागि गठबन्धनलाई थप आठ सांसदको खाँचो छ । एमालेका १० जना सांसद एकीकृत समाजवादीमा लागेको खण्डमा गठबन्धन सहजै बहुमतमा पुग्छ ।

एमालेकै सरकार टिकाउन केहीदिन अघि मात्र शेरधन राईले मुख्यमन्त्रीबाट राजीनामा दिएका थिए । सोही दिन आचार्यलाई बहुमत प्राप्त दलको नेताको हैसियतमा मुख्यमन्त्री बनाइएको थियो । आचार्य मुख्यमन्त्री बनेसँगै नेपालनिकट सांसद बलबहादुर साम्सुहाङलाई सामाजिक विकास मन्त्री र लछुमन तिवारीलाई उद्योग, पर्यटन वन तथा वातावरण मन्त्रीमा नियुक्त गरेका थिए ।

एकीकृत समाजवादी पार्टीमा लाग्न सक्ने सांसदलाई मन्त्री बनाएर भएपनि सरकार टिकाउने रणनीति आचार्यको भएपनि पछिल्लो समय त्यो सफल नहुने देखिएको छ ।

पछिल्ला दिनमा एकीकृत समाजवादीमा खुल्ने नेताहरूको संख्या बढेसँगै मन्त्रिमण्डलले पूर्णता नपाउँदै आचार्य नेतृत्वको सरकार संकटमा परेको देखिन्छ ।

प्रकाशित मिति: सोमबार, भदौ १४, २०७८ १७:१३