खाेप लगाएपछि एन्टिबडी देखिँदैमा कोरोना लाग्छ कि लाग्दैन ?

A+ A A-

स्वास्थ्य तथा जनसंख्या मन्त्रालयले आइतबार एक डोज लगाएकोमा ८० प्रतिशत र दुई डोज खोप लगाएकामा ९० प्रतिशत एन्टिबडी देखिएको सर्वे रिपोर्ट सार्वजनिक गर्‍यो ।

६ महिनाभन्दा बढी उमेरका व्यक्तिहरूमा २०७८ असार २१ देखि साउन ३० सम्म १३ हजार १ सय ६१ जनाको परीक्षण गर्दा ६८.६ प्रतिशत व्यक्तिमा कोभिड एन्टिबडी देखिएको मन्त्रालयको रिपोर्टमा उल्लेख गरिएको छ ।

कोभिड एन्टिबडीको संकेत के हो ?

'सातवटै प्रदेश, हिमाल, पहाड, तराई, गाउँ-गाउँबाट नमुना संकलन गरिएको छ,’ मन्त्रालयका प्रवक्ता डा. कृष्ण पौडेलले भने, ‘रगतबाट एन्टिबडी हेरिएको हो ।’ ६८.६ प्रतशितमा कोभिड एन्टिबडी देखिनु भनेको सबै ठाउँमा कोरोना संक्रमण फैलिएको संकेत हो । ‘हिमाल, पहाड, तराई सबै ठाउँमा संक्रमण फैलिएको छ,’ उनले भने ।

मन्त्रालयले गरेको सर्वेले कुन ठाउँमा कति प्रतिशतले संक्रमण फैलिएको छ भन्ने नदेखाएको बताउँछन्, सरुवा रोग विशेषज्ञ डा. शेरबहादुर पुन । ‘कुन ठाउँमा कति फैलिएको छ त्यो भनिएको छैन । ठाउँ अनुसार भएको भए जोखिम कति रहेछ भन्ने थाहा हुन्छ,’ उनले भने, ‘सर्वेले धेरै मानिस थाहा नपाएरै संक्रमित भइसकेको देखाउँछ ।’

संक्रमित भएको कति समयसम्म बन्छ एन्टिबडी ?

कुनै अध्ययनले ३ देखि ६ महिना, कुनैले ८ महिनासम्म एन्टीबडी बन्ने गरेको देखाएको बताउँछन्, डा. पुन । ‘कुनै ठाउँमा ४ महिनाअघि संक्रमित भएर एन्टिबडी बनेको रहेछ भने चार महिना क्रस भएपछि त्यो ठाउँ फेरि जोखिममा हुन्छ,’ उनले भने, ‘जोखिम कम गर्ने र बच्ने उपाय खोप नै हो ।’

खोप लगाएकामा एन्टिबडीले कति समय काम गर्छ ?

मन्त्रालयले गरेको सर्वेमा दोस्रो डोज खोप लगाएकोमा ९० प्रतिशतमा एन्टिबडी बनेको छ । यसले खोपको प्रभावकारिता देखिएको मन्त्रालयको दाबी छ । एन्टिबडी भनेको रोगसँग लड्ने प्रतिरोधात्मक क्षमताको विकास हुनु हो । ‘यसले कति बचाउँछ स्पष्ट छैन । एन्टिबडीको लेभल पनि हेरिएको छैन,’ प्रवक्ता डा. पौडेलले भने, ‘अहिले बनेको एन्टिबडीले कति महिना काम गर्छ थाहा छैन ।’

खोप लगाएकामा पनि संक्रमण

खोप लगाए पनि संक्रमणको जोखिम हुने डा. पौडेल बताउँछन् । ‘खोप लगाएका पनि संक्रमित भएका छन्,’ उनले भने,‘ जोखिम कम भएको छैन । नयाँ भेरियन्टको सम्भावना छ ।’

खोप लगाएपछि कोरोना हुँदैन भन्ने भ्रम धेरैको रहेको तर्क गर्छन्, डा. पुन । ‘खोप लगाएपछि कोरोना हुँदैन भन्ने भ्रम छ । खोप लगाउनु भनेको कोरोना नहुनु होइन । खोप लगाउनु भनेको जटिल अवस्था हुन नदिनु मृत्यु हने सम्भावनालाई कम गर्नु हो,’ उनले भने । खोपका कारण संक्रमण केही घटेको संकेत देखिएको बुझाइ उनको छ ।

‘खोपका कारण संक्रमण केही घटेको हो । बाहिर देशमा पनि खोप लगाएकोमा भन्दा नलगाएकोमा समस्या धेरै देखिएको छ,’ उनले भने । मन्त्रालयले गरेको सर्वेले संक्रमणको जोखिम घटेको नबताउने डा. पौडेलले बताए । ‘संक्रमण घटेको छैन । जोखिम कायमै छ । स्वास्थ्यको मापदण्ड छोड्नु हुँदैन,’ उनले भने ।

यो पनि पढ्नुस् : खोपले कसरी काम गर्छ ?

प्रकाशित मिति: सोमबार, भदौ १४, २०७८ १६:२८