विद्यासुन्दर शाक्य भन्छन्- नकुहिने फोहोर घरको कुनामा राख्दा हुन्छ, अप्ठ्यारो परेको छ ननिकालिदिनुस्

विद्यासुन्दर शाक्य भन्छन्- नकुहिने फोहोर घरको कुनामा राख्दा हुन्छ, अप्ठ्यारो परेको छ ननिकालिदिनुस्

A+ A A-

काठमाडौं महानगरपालिकाका मेयर विद्यासुन्दर शाक्यले बिग्रिएको सडक सञ्चालन गराउन केही समय लाग्ने भएकाले त्यसबेलासम्म घर, व्यवसाय वा कार्यालयमा उत्पादन भएको फोहोर बाहिर ननिकाल्न आग्रह गरेका छन् । सञ्चारकर्मीहरूसँग कुरा गर्दै शाक्यले अप्ठ्यारो परेको बेला नकुहिने फोहोर घरको कुनै ठाउँमा थुपार्दा पनि हुने बताए ।

‘सिसडोलसम्म जाने बाटो वर्षाका कारण बिग्रिएको छ । केही दिनअघिसम्म फोहोर बोकेर पुगेका गाडीलाई डोजरले ठेलेर माथिसम्म लैजाने गरिएको थियो । अहिले त्यसरी ठेल्ने ठाउँसम्म लैजानै सकिएको छैन,' उनले भने ।

'हामीले पूर्ण क्षमतामा काम गर्न नपाएकाले सडकमा फोहोर देखिएको हो,’ उनले भने ‘हामी बञ्चरे डाँडा हस्तान्तरण कहिले होला भनेर पर्खिरहेका छौँ । फोहोरको स्थायी व्यवस्थापन यहीँ हुने हो । त्यसअघि नियमित प्रक्रियाबाट फोहोर उठाउँछौँ ।’

सिसडोलसम्म जाने बाटो वर्षाका कारण बिग्रिएपछि अलपत्र फोहोर बोक्ने गाडी

यो समस्या साझा प्रयासबाट समाधान गर्न सकिने भन्दै सडकमा जथाभावी फोहोर फालेर सहरलाई दृश्य प्रदुषण र दुर्गन्ध बढ्नबाट रोक्नुपर्ने शाक्यको तर्क छ ।

समस्याको समाधानका लागि नेपाल सरकार, सहरी विकास मन्त्रालय र भौतिक पूर्वाधार मन्त्रालयसँग छुट्टाछुट्टै र संयुक्त रूपमा समन्वयको प्रयास गरिरहेको उनले बताए ।

सामान्य समयमा दैनिक १५० गाडी फोहोर पुग्ने साइटमा अहिले मुस्किलले ५० गाडी फोहोर पुग्न सक्ने भएपछि संकलनमा समस्या भएको महानगरको वातावरण तथा कृषि विभागका प्रमुख हरिकुमार श्रेष्ठले बताए ।

‘ल्याण्डफिल साइटमाथि निर्माण भएको करिब ४ सय मिटर सडकमा ट्रक लैजान सक्ने अवस्था छैन । त्यसैले भ्याली १ को क्षमता बढाएर व्यवस्थापन गरिरहेका छौँ,’ श्रेष्ठले भने, ‘यसप्रकारको समस्या समाधान गर्न दीर्घकालीन साइटमा फोहोर पुर्‍याउन जरुरी छ । गएको वर्ष नै बञ्चरे डाँडाको निर्माण सम्पन्न हुने अपेक्षा थियो । तर भएन, अहिले पनि सकारात्मक उत्तर पाएका छैनौँ ।’

पछिल्लो केही दिनदेखि सिसडोलमा फोहोर लैजान स्थानीयहरूले पनि अवरोध गरेका छन् । गत भदौ ६ गते ककनी गाउँपालिका- १ की ७० वर्षिया महिलाको मृत्यु भएको थियो । स्थानीयले उनो मृत्यु हैजाका कारण भएको भन्दै क्षतिपूर्तिको माग राखेर भदौ १० गतेदेखि फोहोर लैजान अवरोध गरेका हुन् ।

त्यसपछि हैजा फैलियो भनिएको ठाउँबाट पानी र दिशा संकलन गरेर राष्ट्रिय जनस्वास्थ्य प्रयोगशालामा परीक्षणका लागि पठाइएको थियो । भदौ १३ गते प्राप्त रिपोर्टअनुसार नमूनाहरूमा हैजाको जीवाणु नदेखिएको साइट इञ्चार्ज इञ्जिनियर सरकारदीप श्रेष्ठले जानकारी दिए ।

प्रकाशित मिति: सोमबार, भदौ १४, २०७८ १३:४५