विद्युत् आपूर्ति नहुँदा सीडीओ कार्यालय म्याग्दीको काम ठप्प, आज बिजुली छैन भोलि आउनु

विद्युत् आपूर्ति नहुँदा सीडीओ कार्यालय म्याग्दीको काम ठप्प, आज बिजुली छैन भोलि आउनु

A+ A A-

विद्युत् आपूर्तिको वैकल्पिक व्यवस्था नहुँदा जिल्ला प्रशासन कार्यालय म्याग्दीको सेवा प्रभावित हुन थालेको छ ।

कार्यालयमा जडान भएको इन्भटर, ब्याट्री र सोलार सेटले काम गर्न छाडेपछि केन्द्रीय प्रसारण लाइनको विद्युत् आपूर्ति नभएको अवस्थामा सेवा बन्द हुन थालेको हो । विद्युतीय उपकरणको प्रयोग र इन्टरनेटको सहायताले गरिने सबै काम ठप्प हुने गरेको सहायक प्रमुख जिल्ला अधिकारी सुवास शर्मा पौडेलले बताए।

'अधिकांश काम कम्प्युटर र इन्टरनेटबाट गर्नुपर्छ,' उनले भने, 'विद्युत् आपूर्ति नहुँदा समस्या भएको छ ।' आइतबार अपराह्न झरी परिरहेका अवस्थामा कार्यकक्षमा अध्याँरो भएपछि उनी मोबाइलको टर्च बालेर कागजपत्र प्रमाणित गर्दै थिए ।

कम्प्युटरमा टाइप गर्न बिजुली नभएपछि अन्य कर्मचारीले अतिआवश्यक काम हातले लेखेर गरिरहेका थिए । बागलुङ र पर्वतका सीमानामा पोल ढल्दा आइतबार दिउँसो १ देखि ५ बजेसम्म म्याग्दीमा विद्युत् आपूर्ति बन्द भएको थियो ।

जिल्लामा विद्युत् आपूर्ति अनियमित हुने समस्या छ । भौगोलिकरूपमा विकट र दुर्गम क्षेत्रमा पर्ने रघुगङ्गा गाउँपालिका–८ कुइनेमङ्गलेबाट श्रीमतीको नागरिकता बनाउन आएका ताराप्रसाद छन्त्यालले समयमा काम नहुँदा थप दुई दिन बेनी बस्नुपर्ने अवस्था आएको गुनासो गरे ।

'सानो बच्चासहित श्रीमतीलाई लिएर दिउँसो १२ः३० मा आएको थिएँ', उनले भने, 'बिजुली छैन भनेर दिनभरि काम गरेनन् । आज बिदा छ । आइतबारै काम सकेर फर्कने योजना थियो । मङ्गलबारसम्म बेनी बस्नुपर्ने भयो ।'

जनजातिको प्रमाणपत्र बनाउन आएकी मालिका गाउँपालिका–५ देवीस्थानकी हेमा रानामगरले दिनभरि कुरेर काम नभएपछि त्यसै फर्कनुपरेको गुनासो गरिन् ।

'बिजुली छैन भनेर काम गरेनन्, वैकल्पिक व्यवस्था रहेनछ', उनले भनिन्, 'यस्तो महत्वपूर्ण कार्यालयमा विद्युत् आपूर्तिको विकल्प नगर्दा नागरिकलाई सास्ती भयो ।'

नागरिकताको प्रतिलिपि बनाउन आएका देवीस्थानकै सुरत पुनले पनि ताराप्रसाद र हेमाजस्तै कामै नगरी फर्कनुपरेको गुनासो गरे ।

नागरिकता वितरण, सिफारिस, संस्था दर्ता, नवीकरणलगायतका काम लिएर प्रशासनमा पुग्ने सर्वसाधारण मर्कामा परेका छन् । संवेदनशील विषयमा हुने सूचना आदानप्रदान गर्न पनि समस्या भएको कर्मचारीले बताएका छन् । उनीहरूका अनुसार करिब एक महिनादेखि विद्युत् आपूर्तिमा समस्या भएको हो ।

२०७६ मा जडान गरिएको सोलार, ब्याट्री र इन्भटर बिग्रिएपछि समस्या भएको प्रमुख जिल्ला अधिकारी गणेशबहादुर अधिकारीले बताए ।

'वारेन्टीको म्याद अझै दुई वर्ष रहेछ । आपूर्तिकर्तालाई तत्कालै मर्मत गर्न निर्देशन दिएका छौँ', उनले भने, 'सोलारबाट चार्ज गरेर ब्याट्री र इन्भटर बनाउन घाम नलागेपछि प्राविधिक हिसाबले समस्या भयो ।'

प्रकाशित मिति: सोमबार, भदौ १४, २०७८ ०८:०७