प्रदेश १ का मुख्यमन्त्री राईले राजीनामा दिने, आजै भीम आचार्यकाे नाम सिफारिस गरिँदै

प्रदेश १ का मुख्यमन्त्री राईले राजीनामा दिने, आजै भीम आचार्यकाे नाम सिफारिस गरिँदै

A+ A A-

एमाले ध्रुवीकरणकाे असर प्रदेश १ मा पनि परेकाे छ । माधव नेपालको नेतृत्वमा नेकपा (एकीकृत समाजवादी) बनेपछि प्रदेश १ सरकारको नेतृत्व हेरफेर हुने भएकाे हाे ।

यसअघि नेपाल समूहमा खुलेका कतिपय नेताहरू अहिले एमालेमै बसेका छन् । नेपाल पक्षमा खुल्दै आएका प्रदेश सांसदहरू भने कता लाग्ने भन्नेमा खुलिसकेका छैनन् । तर, आधा दर्जन सांसद मात्रै नयाँ पार्टीमा लागेको खण्डमा मुख्यमन्त्री शेरधन राईकाे कुर्सी संकटमा पर्ने पक्का छ ।

सांसदहरूले ‘कित्ता’ क्लियर गर्नुअघि नै एमालेले आफ्नै दलको नेतृत्वमा नयाँ सरकार बनाउने रणनीति बनाएको छ । असन्तुष्ट सांसदहरूलाई माधव नेपालकाे पार्टीमा जानबाट राेक्न मन्त्रालय दिएरै भए पनि एमालेले सरकार टिकाउने यत्न सुरु गरेको हाे ।

एमालेले आजका लागि संसदीय दलको बैठक बोलाएको छ । बिहान ११ बजेपछि बस्ने बैठकमा कति सांसद उपस्थित हुन्छन्, त्यसले एमाले विभाजनको असरलाई चित्रित गर्नेछ ।

माधव नेपाल पक्षमा खुल्दै आएका सांसदहरूलाई महत्त्वपूर्ण जिम्मेवारी दिएर भए पनि नयाँ पार्टीमा लाग्नबाट रोक्ने र बहुमत सिद्ध गरेर आफ्नै नेतृत्वमा सरकार बनाउने दाउमा एमाले छ ।

सोही रणनीतिअनुसार आजकाे बैठकमा मुख्यमन्त्री शेरधन राईले संसदीय दलको नेताबाट राजीनामा दिने र त्यसमा भीम आचार्यलाई चयन गर्ने तयारी रहेकाे एमाले स्राेत बताउँछ ।

बैठकमा राईले दलको नेता पद त्यागेलगत्तै प्रदेश प्रमुखकहाँ गएर मुख्यमन्त्री पदबाट पनि राजीनामा दिने उनीनिकट स्राेतकाे भनाइ छ । एकताको पक्षमा उभिएका पार्टी सचिव आचार्यलाई मुख्यमन्त्री बनाउन राईले राजीनामा दिन लागेका हुन् ।

राईको राजीनामालगत्तै संसदीय दलको बैठकले आचार्यलाई प्रदेश प्रमुखसमक्ष मुख्यमन्त्रीमा सिफारिस गर्ने तयारी छ ।

एमालेकाे यस्तो तयारीबारे सुइँको पाएपछि माधव नेपाल नेतृत्वको नेकपा (एकीकृत समाजवादी ) ले पनि आफ्नो पक्षमा सांसदहरू तान्ने रणनीति बनाएको छ ।

नयाँ सरकार गठन भए पनि थोरै समयका लागि हुने भएकाले गठबन्धन नेतृत्वको सरकार बन्दा मन्त्री बनाउने भन्दै आफ्नो पार्टीमा सांसद तान्ने रणनीति एकीकृत समाजवादीकाे छ ।

‘अनेक जालझेल गरेर पनि लुम्बिनीमा सरकार टिक्न सकेन । अब यता पनि नाटक सुरु भएछ’, नेपाल पक्षमा खुल्दै आएका एक सांसदले शिलापत्रसँग भने, ‘पार्टीले मान्यता पाइसकेपछि त्यसै पनि सरकार अल्पमतमा परिसकेको छ । संख्या कसरी संख्या पुग्ने रहेछ हामी पनि हेर्छौं ।’

प्रदेशसभामा सभामुखसहित एमालेका ५१ सांसद थिए । तीमध्ये कतिजना नयाँ पार्टीमा लाग्छन् भन्ने यकिन हुन बाँकी छ । तर, बुधबार निर्वाचन आयोगमा नेकपा (एकीकृत समाजवादी) पार्टीमा सनाखत गरेका सांसद राजेन्द्र राईले सो पार्टीमा एक दर्जन बढी सांसद रहने दाबी गरेका छन् ।

विभाजनअघिसम्म माधव नेपाल पक्षमा रहँदै आएका दोस्रो पुस्ताका प्रभावशाली नेताहरूले पार्टी संरचना २०७५ जेठ २ कै अवस्थामा फर्किएकाे भन्दै एमालेमै बस्ने तय गरेपछि साे समूहमा खुल्दै आएका केही सांसदहरू भने नयाँ पार्टीमा नलाग्ने भएका छन् ।

प्रकाशित मिति: बिहीबार, भदौ १०, २०७८ ०७:०५