‘बलात्कारी’ बा, ‘धुन्धुकारी’ छोरा

A+ A A-

भोटेकोसी गाउँपालिका–३ तातुङमा बाबुले छोरी बलात्कार गर्ने प्रयास गरे । बहिनीसहित बाबुसँग घरमा नै बस्दै आएकी १३ वर्षीया छोरीलाई बाबुले राति १० बजे उनी सुतिरहेको ओच्छ्यानमा गएर बलात्कारको प्रयास गरेका हुन् ।
चौतारा साँगाचोकगढी नगरपालिका–६ पिपलडाँडा गौरातीका विजय तामाङले आफ्नै आमालाई दाउराको चिर्पटले हानेर ९ हजार रुपैयाँ लुटे । छोराको निर्घात कुटाइबाट आमा हीरामाया तामाङ घाइते भएकी छन् । उनको शरीरमा निलडाम छ ।
सुनकोसी गाउँपालिका–५ सुनखानी निवासी राममाया नेपालीले तेस्रो सन्तानका रुपमा २१ दिनअघि छोरी जन्माइन् । तेस्रो सन्तान पनि छोरी भएको भन्दै श्रीमान् गोपाल नेपाली घरमै आउन छाडे । सम्पर्क नभएको लामो समय भयो । अहिले राममाया २१ दिने छोरी च्यापेर न्याय माग्दै प्रहरी कार्यालय आएकी छन् ।

यी प्रतिनिधि घटना मात्रै हुन् । पछिल्लो एक सातभित्र प्रहरीसम्म आइपुगेका यी घटनाबाट प्रस्ट हुन्छ, जिल्लामा यस्ता थुप्रै घटना भएका छन् । खासगरी, पुरुषका कारण पीडित भएका महिला प्रहरीसम्म आउने क्रम बढेको छ । यसले हाम्रो समाज कता जाँदै छ भन्ने गम्भीर प्रश्न उठाएको छ ।

आफन्तबाटै महिला असुरक्षित बन्दै छन् । घरमा बाबुबाट छोरी असुरक्षित, छोराले आमा कुट्ने, छोरा नपाएको भन्दै श्रीमानले श्रीमतीलाई घर निकाला गर्नेजस्ता सामाजिक अपराधका शृंखला बढेको जिल्ला प्रहरी प्रमुख एसपी मुकुन्द मरासिनी बताउँछन् ।

भोटेकोसी गाउँपालिका साविक तातोपानी गाविस–९ का एक बाबुले आफ्नै छोरीमाथि पटक पटक करणीको प्रयास गरेका थिए । पछिल्लोपटक १२ चेत २०७५ को राति कोठामा सुतिरहेकी छोरीलाई आफू सुत्ने कोठमा बोलाएर करणी गर्न खोजेका थिए ।

आमाले दुई छोरीलाई छाडेर अर्काैसँग विवाह गरेपछि बाबुले अर्काै श्रीमती ल्याएका थिए । सानीआमा पनि काठमाडौ गएको बेलामा बाबुले छोरीलाई जबर्जस्ती गर्न खोजेको प्रहरीले जनाएको छ ।

‘म सुतिरहेकी थिएँ, बुबाले बोलाउनुभयो । अनि, तैंले ५ सय रुपैयाँ किन चोरेको भन्दै बत्ती निभाउनुभयो । हात समातेर के के गर्न खोज्नुभो,’ प्रहरीमा दिएको उजुरीमा ती किशोरीले भनेकी छन् ।

बाबुले जबर्जस्ती गर्न खोजेपछि बाबुको हात फुस्काएर छिमेकी हजुरआमालाई भन्दिछु भन्दै उनी त्यहाँबाट भागेर रातभर नजिकैको जंगलमा लुकेर बसेको किशोरीले दिएको जाहेरीमा उल्लेख छ । बिहान आउँदा घरमा बुबा नभएपछि खाना बनाएर विद्यालय गएको उनले बताइन् ।

चौतारा साँगाचोकगढी नगरपालिका–६ पिपलडाँडा गौरातीका विजय तामाङले मादकपदार्थ सेवन गरी आफ्नै आमालाई निर्घात कुटे

यो क्रमपछि पनि निरन्तर जारी रहयो । पछिल्लोपटक २४ चैत २०७५ को राति साढे १० बजे बहिनीसँग सुतिरहेको बेला बाबुले जबर्जस्ती गर्न खोजेको किशोरीले प्रहरीमा दिएको जाहेरीमा भनेकी छन् । त्यो दिन पनि बाबुले जबर्जस्ती गर्न खोजेपछि उनी राति नै भागेर छिमेकीको घर गएर सुतेकी थिइन् ।

बाबुले पटक–पटक जबर्जस्ती करणी गर्न खोजेपछि उनले विद्यालयकी शिक्षकालाई घटनाबारे जानकारी गराएकी थिइन् । शिक्षिकाले प्रहरीलाई जानकारी गराएपछि जबर्जस्ती गर्न खोज्ने बाबुलाई प्रहरीले नियन्त्रणमा लिएर अनुसन्धान सुरु गरेको जिल्ला प्रहरी कार्यालयका डीएसपी माधव काफ्लेले जानकारी दिए ।

घटना सुनेपछि आफूलाई पत्यार नै नलागेर तीन पटकसम्म सोध्दा पनि घटना भएकै किशोरीले भनेपछि अनुसन्धान प्रक्रिया सुरु गरिएको एसपी मुकुन्द मरासिनीले बताए । घटना सुनेर आफू पनि छक्क परेकाे उनले बताए ।

चौतारा साँगाचोकगढी नगरपालिका–६ पिपलडाँडा गौरातीका विजय तामाङले मादकपदार्थ सेवन गरी आफ्नै आमालाई निर्घात कुटे । चिर्पटले टाउकोमा हानेर टाउको फोरिदिएको पीडित हीरामाया तामाङले बताइन् ।

‘अरुलाई तिर्न राखेको ९ हजार रुपैयाँ चोरेछ । किन चोरेको ऋण तिर्नु छ भन्दा चिर्पटले टाउकोमा हानेर टाउको फुटाइदियाे,‘ उनले बताइन् । छोराबाटै कुटिएपछि हीरामाया न्याय माग्दै प्रहरी कार्यालयमा आएकी थिइन् ।

आफन्तबाट महिलाहरु पीडामा परेका घटनाका शृंखला यतिमा सकिँदैन । महिला भएकै कारण श्रीमानले गरेको व्यवहारको अर्काे दुःखद घटना पनि सिन्धुपाल्चोकमै भएको छ ।

२१ दिनको सुत्केरी, घरमा खाने केही छैन, मेलामा गएर अन्नको जोहो गरिरहेको छु

सुनकोसी गाउँपालिका–५ सुनखानी निवासी राममाया नेपाली २१ दिनको छोरी च्यापेर प्रहरी कार्यालयमा आइपुगिन् । सुत्केरी स्याहारमा बस्नुपर्नै राममाया, छोरी बोकेर श्रीमानले छोरी जन्माएको भन्दै घर आउन छाडेपछि न्याय पाउने आशामा प्रहरी कार्यालयमा आएकी हुन् ।

श्रीमान नआएपछि राममाया अहिले कुभिण्डेस्थित माइतीघरमा बस्दै आएकी छन् । अरुको जग्गामा टहरो हालेर तीनजना छोरीसहित बस्दै आएकी छन् । ‘२१ दिनको सुत्केरी, घरमा खाने केही छैन, मेलामा गएर अन्नको जोहो गरिरहेको छु,’ राममायाले पीडा मिश्रित स्वरमा भनिन् ।

जिल्लामा पछिल्लो चरणमा सामाजिक अपराधका घटना बढेको जिल्ला प्रहरी कार्यालय सिन्धुपाल्चोकका प्रमुख एसपी मुकुन्द मरासिनीले बताए । प्रहरीले टोल टोलमा चलाएका चेतनामुलक अभियानले गर्दा पनि पीडितहरु न्यायका लागि प्रहरी कार्यालयसम्म आउने गरेको उनको बुझाइ छ । पीडकलाई कानुनअनुसार कारबाही गर्नै र बस्ती बस्तीमा जनचेतनाका काम पनि सँगै लैजाँदा यस्ता घटनामा कमी आउने मरासिनीले विश्वास गरे ।

जबर्जस्ती करणीका घटनामा वृद्धि

सिन्धुपाल्चोक प्रहरीको तथ्यांक हेर्नै हो भने जबर्जस्ती करणीका घटनामा वृद्धि भएको छ । आफन्तहरुबाटै हुने घटना पनि रोकिएको छैन । गएको साउनदेखि वैशाख मसान्तसम्म जबर्जस्ती करणीका २३ घटना प्रहरी कार्यालयमा दर्ता भएको छ ।

त्यस्तै, जबर्जस्ती करणी उद्योगका ६ घटना प्रहरी कार्यालयमा दर्ता भएको जिल्ला प्रहरी कार्यालयका सूचना अधिकृत डीएसपी माधव काफ्लेले जानकारी दिए ।

प्रकाशित मिति: मंगलबार, जेठ २१, २०७६ २३:२५