धनकुटामा एकीकृत समाजवादी कमजोर स्थितिमा, जिल्ला इन्चार्ज भन्छन्- एक वर्षमै बलियो बन्छौँ

धनकुटामा एकीकृत समाजवादी कमजोर स्थितिमा, जिल्ला इन्चार्ज भन्छन्- एक वर्षमै बलियो बन्छौँ

A+ A A-

विभाजन अघिसम्म प्रदेश १ केपी ओली र माधव नेपाल पक्षको सांगठिक पकड लगभग बराबरीकै अवस्थामा थियो । विभाजन पछि भने नेपाल पक्ष केही कमजोर देखिएको छ ।

विभाजन अघिसम्म नेपाल समूहमा खुलेका अधिकांस नेता तथा जनप्रतिनिधिले उनको साथ छाडेका छन् । कतिपयले भने अझै 'कित्ता क्लियर’ गरिसकेका छैनन् ।

प्रदेश १ का १४ जिल्लामध्ये धनकुटामा नेपाल सबैभन्दा कमजोर देखिएका छन् । ७ वटा स्थानीय तह, १ प्रतिनिधिसभा र दुई प्रदेशसभा निर्वाचन क्षेत्र रहेको धनकुटामा नेकपा (एमाले) ले वर्चश्व कायम गरेको थियो । एमाले विभाजनको असर धनकुटामा नगन्य मात्रमा परेको बताउँछन् एमाले धनकुटाका नेता नैन रुचाल ।

‘धनकुटामा एमाले एकढिक्का छ, विभाजनको पक्षमा कोही हुनुहुन्न । धनकुटाको ६० वडामध्ये ४३ वडामा हामीले जितेका हौँ । सबै स्थानीय तहका प्रमुख उपप्रमुख हाम्रै पार्टीमा हुनुहुन्छ,’ उनले भने, ‘पाख्रिबासको एक जना वडाध्यक्षबाहेक विभाजनमा लाग्ने कोही हुनुहुन्न । उहाँ पनि यतै फर्किनु हुन्छ ।’

उनले एमाले र माओवादी केन्द्रबीच एकता भएर फेरि अलग हुँदा माओवादी केन्द्रका नेताहरूले पनि आफूहरूलाई साथ दिएको बताए । पाख्रिबास नगरपालिका–४ का वडाध्यक्ष शोभिक निरौला भने माधव नेपालले नेतृत्वको नेकपा (एकीकृत समाजवादी) मा खुलेका छन् ।

नेकपा (एकिकृत समाजवादी) का नेता धर्मराज पौडेल धनकुटामा आफूहरू तत्कालका लागि केही कमजोर देखिए पनि केही समयमै बलियो स्थितिमा पुग्ने बताउँछन् । पौडेल एकिकृत समाजवादीका धनकुटा इन्चार्ज समेत हुन् ।

‘प्रदेशका १४ जिल्लामध्ये धनकुटामा अहिले हामी गणितीय हिसाबले कमजोर देखिएका छौँ,’ उनले भने, ‘एक वर्षभित्रमा हामी सबैभन्दा बलियो पोजिसनमा पुगेर देखाउँछौँ । अहिले अवधि पनि बाँकी रहेकाले जनप्रतिनिधिहरू पनि हाम्रो पार्टीमा खुल्दै जानु हुनेछ ।’

प्रकाशित मिति: बुधबार, भदौ ९, २०७८ ०९:१५