फुट रोक्न बनेको सहमति एमाले विभाजनपछि कार्यान्वयन, स्थायी कमिटीबाट एकताको आह्वान

फुट रोक्न बनेको सहमति एमाले विभाजनपछि कार्यान्वयन, स्थायी कमिटीबाट एकताको आह्वान

A+ A A-

नेकपा एमालेको विभाजन रोक्नका निम्ति तयार पारिएको १० बुँदे सहमति पार्टी विभाजनपछि बल्ल कार्यान्वयन भएको छ ।

मंगलबार च्यासलमा बसेको स्थायी कमिटी बैठकले कार्यदलस्तरमा भएकाे सहमतिमा उल्लेख भए अनुसार पार्टीका कमिटीलाई २ जेठ २०७५ को स्थितिमा फर्काउने निर्णय गरेको हो ।

स्थायी कमिटी बैठकले २ जेठ २०७५ पूर्वको जिम्मेवारीमा क्रियाशील हुन सबै पदाधिकारीलाई निर्देशन दिएको पार्टी प्रवक्ता प्रदीप ज्ञवालीले बताए । 'सबै तहका पार्टी कमिटी र जनसंगठनलाई २ जेठ २०७५ पूर्वको जिम्मेवारीमा क्रियाशील हुन निर्देशन दिँदै १० बुँदे प्रस्तावलाई सन्दर्भ सामग्रीका रुपमा मातहतका कमिटीमा प्रेषित गर्ने निर्णय भएको छ,' प्रवक्ता ज्ञवालीले भने ।

बैठकले १० बुँदे सहमति कार्यान्वयनका लागि ६ सदस्यीय कार्यदलसमेत गठन गरेको छ । सहमति कार्यान्वयनका क्रममा उत्पन्न हुनसक्ने समस्या समाधानका निम्ति ६ सदस्यीय कार्यदल गठन गरिएको एमालेले जनाएको छ । कार्यदलमा महासचिव ईश्वर पोखरेलसहित उपाध्यक्ष भीम रावल, उपमहासचिवद्वय विष्णु पौडेल, घनश्याम भुसाल र स्थायी कमिटी सदस्यद्वय सुरेन्द्र पाण्डे र लेखराज भट्ट रहेका छन् ।

कार्यदलले केन्द्रीय निकाय र विभागहरुलाई पूर्णता दिने जिम्मेवारी पनि पाएको प्रवक्ता ज्ञवालीले बताएका छन् ।

एमालेको अन्तरसंघर्ष समाधानका निम्ति २७ असारमा १० बुँदे सहमति तयार भएको थियो । अध्यक्ष केपी शर्मा ओलीसँग असन्तुष्ट नेता माधवकुमार नेपालले २ जेठ २०७५ को स्थितिमा सबै कमिटीलाई फर्काउनुपर्ने सुनिश्चितता खोजिरहेका थिए । यसको सुनिश्चितताको सुरुआत नेता नेपालको बहिर्गमनपछि सुरु भएको छ ।

नेता नेपालको साथ छोडेका दोस्रो पुस्ताका नेताहरुले आफ्नो 'फेस सेभिङ' का लागि १० बुँदे सहमति कार्यान्वयनलाई प्रमुख एजेण्डा बनाएका थिए । गत आइतबारको बैठकले यो सहमति कार्यान्वयन नभए विद्रोह गर्ने निर्णय गरेको थियो ।

सोमबार बालकोटमा भएको वार्तामा अध्यक्ष ओलीसँग सहमति भएपछि विगत आठ महिनादेखि पार्टीको औपचारिक बैठकमा सहभागी नभएका स्थायी कमिटी सदस्यहरु अष्टलक्ष्मी शाक्य, भीम रावल, घनश्याम भुसाल, सुरेन्द्र पाण्डे, योगेश भट्टराई लगायतका नेताहरु मंगलबार पार्टीको बैठकमा सहभागी भएका हुन् ।

बैठकमा सहभागी भएका नेता गोकर्ण बिष्टले पार्टी विभाजन रोक्न गरिएको सहमति पहिले नै लागु गर्न खोजिए पनि विविध कारणले असफल भएको बताए । '१० बुँदेको उद्देश्य भनेको पार्टी विभाजन रोक्नु नै थियो । दुई नेताहरुको भेटघाट गराउने भन्दाभन्दै विभाजनको परिस्थिति आइपर्‍यो । यसको उद्देश्य विभाजन रोक्ने भए पनि त्यसमा असफल भयाैं,' उनले भने ।

स्थायी कमिटी बैठकमा सम्बोधन गर्दै अध्यक्ष केपी शर्मा ओलीले १० बुँदे पूर्णरुपमा पालना हुने भन्दै मुल घरमा फर्किनेलाई कुनै पनि पूर्वाग्रह नराखिने बताएका छन् । 'अब १० बुँदे कार्यान्वयनमा गयो । विभाजनमा जानुभएका साथीहरु फर्किँदा उहाँहरुलाई पुरानै जिम्मेवारीमा स्वागत हुन्छ,' अध्यक्ष ओलीले भनेका छन् ।

विभाजन रोज्नेलाई मुलघरमा आउन आग्रह

एमालेले विभाजित समूहलाई मुलधारमा फर्किन पनि आह्वान गरेको छ । स्थायी कमिटीले अपील प्रस्ताव पारित गर्दै विभाजनमा संलग्न नेता कार्यकर्ताहरु फर्किन चाहेमा कुनै पूर्वाग्रह नराख्ने भन्दै एकताको आह्वान गरेको हो ।

प्रस्तावमा भनिएको छ, ‘एमालेबाट विभाजित भएर अलग्गै पार्टी दर्ता गर्ने प्रयास गरिहेका कामरेडहरुलाई हामी आग्रह गर्छौं- मुलुकका सामु उपस्थित असाधारण सम्भावना र अकल्पनीय चुनौतिप्रति संवेदनशील हुँदै पार्टीको काँधमा उपस्थित ऐतिहासिक अभिभाराप्रति सचेत रहँदै त्यस्तो गलत र हानिकारक बाटो छाडेर पार्टी एकतामा आबद्ध हुनुहोस्, आफ्नो मुलघरमा फर्किनुहोस् ।’

विभाजनकारी गतिविधि र छुट्टै दल दर्ताको प्रक्रियाबाट अलग भएर पार्टी एकतामा योगदान गर्नेहरुलाई हार्दिक स्वागत गरिने एमालेले जनाएको छ ।

पार्टीभित्रका असहमतिको निष्कर्ष विभाजन हुन नसक्ने भन्दै एमालेले विभाजनमा लागेकाहरु फर्किन चाहेमा हार्दिकतापूर्वक स्वागत गरिने निर्णय गरेको छ । 'दृष्टिकोणमा भिन्नता हुनु र कतिपय प्रश्नमा असहमति पैदा हुनु स्वाभाविकै हो । तर, समस्याका विकल्प विग्रह होइन', एकताको आह्वानमा भनिएको छ, 'त्यसरी नै भिन्नताको समाधान अन्तरद्वन्द्व होइन । असहमतिको निष्कर्ष त विभाजन झन् हुँदै होइन । नेकपा एमालेको एकता यस पार्टीका लाखौं सदस्य र समर्थक-शुभचिन्तकहरुको मात्र होइन, आम जनता र देशकै चाहना हो ।'

स्थायी कमिटीको बैठकले आगामी मंसिर १० देखि १२ गतेसम्म काठमाडौंमा १० औं महाधिवेशन गर्ने निर्णय पनि गरेको छ। यस्तै बैठकले विधान महाधिवेशन ४ असोजदेखि ६ गते गर्ने निर्णय समेत गरेको छ। विधान महाधिवेशनमा प्रस्तुत हुने दस्तावेजमाथि छलफलका लागि २५ र २६ भदौ निर्धारण गरिएको छ । एमालेले ६ कात्तिकमा वडा अधिवेशन र ९ कात्तिकमा पालिकाको अधिवेशन गर्ने भएको छ ।

प्रकाशित मिति: मंगलबार, भदौ ८, २०७८ १९:४७