माधव नेपालको पार्टीमा नगएका स्थायी कमिटीका ९ नेताको 'फेस सेभिङ', ओलीसँग भने- एमाले छाड्न सकिन्न

माधव नेपालको पार्टीमा नगएका स्थायी कमिटीका ९ नेताको 'फेस सेभिङ', ओलीसँग भने- एमाले छाड्न सकिन्न

A+ A A-

पार्टी विभाजनपछि नेकपा एकीकृत समाजवादीमा जाने वा एमालेमै रहने अलमलमा रहेका ९ नेताहरू अन्ततः एमालेमै रहने भएका छन् । नेता माधवकुमार नेपालले पार्टी फुटाएर गल्ती गरेको र उनी एमालेमा नआउने निचोड निकाल्दै ९ नेताहरूले एमाले अध्यक्ष केपी ओलीलाई सघाउँदै मूलधारमै रहने निर्णय गरेका हुन् ।

अन्तरपार्टी संघर्षमा नेपाललाई साथ दिँदै पार्टीभित्र समानान्तर अभ्यास गरिरहेका उनीहरूले एमाले विभाजनमा नेता नेपाललाई साथ दिन अस्वीकार गरेका थिए । यथास्थितिमा एमालेमा फर्किँदा आत्मसमर्पणको सन्देश जाने भएकाले उनीहरूले १०बुँदे सहमति कार्यान्वयन गर्न ओलीलाई दबाब दिइरहेका थिए ।

१०बुँदे सहमति पालना नभए विद्रोह गर्ने चेतावनी दिएका ती नेताहरूले साेमबार बालकोटमा अध्यक्ष ओलीसँग वार्ता गर्दै आफ्नो फेस सेभिङमा सफल भए । ओली सहमति पालना गर्न तयार भएकाले अब आफूहरू एमालेमै रहने र फुटेर गएका नेताहरूलाई पनि विभाजनको गतिविधि स्थगन गर्न आग्रह गर्ने निर्णय गरेको सचिव योगेश भट्टराईले बताए ।

'अध्यक्षले एमाले एकताका लागि १०बुँदे सहमति पालना गर्न र सबै साथीहरूलाई समान व्यवहार गर्न तयार छु भन्नुभएको छ । उहाँले पुराना जिम्मेवारीहरूलाई यथावत राख्ने प्रतिबद्धता जनाउनुभएको छ । हामी अब स्थायी कमिटी बैठक बसेर सहमति कार्यान्वयनकाे मोडालिटी बनाउँछौँ,' भट्टराईले भने ।

सबै तहका कमिटीलई २ जेठ २०७५ को स्थितिमा लैजान अध्यक्ष ओली तयार भएको र १०बुँदे सहमति पालनाका लागि मोडालिटी बनाउन बैठक तय भएकाले अब एमालेमै रहने सचिव भट्टराईले बताए ।

बैठकमा उपाध्यक्ष अष्टलक्ष्मी शाक्य, अर्का उपाध्यक्ष भीम रावल र उपमहासचिव घनश्याम भुसालले आफूहरू एकताकै पक्षधर भएकाले कतै नगएको स्पष्टीकरण दिएका थिए । पार्टीलाई बचाउने प्रमुख दायित्व नेतृत्वकै हुने भएकाले पार्टीलाई एकढिक्का बनाएर अघि बढ्न सुझाव दिँदै आफूहरूले नेतृत्वलाई सघाउने बताएका छन् ।

बैठकमा उपाध्यक्ष शाक्यले भनिन्, 'हामी एकताको पक्षधर हौँ । त्यसैले कतै गएका छैनौँ । नेतृत्वलाई साथ दिन तयार नभएको भए हामी पनि कतै जान्थ्यौँ होला । पार्टीको समस्या समाधानमा तपाईं नै लाग्नुपर्छ । हामी सघाउन तयार छौँ।'

यस्तै, उपाध्यक्ष रावलले पार्टी बचाउन नेतृत्वकै भूमिका प्रमुख हुने भएकाले त्यसमा केन्द्रित हुन ओलीलाई आग्रह गरेका थिए । नेतृत्वलाई सफल पार्नका निम्ति सधैँ सहयोग गर्ने रावलको भनाइ थियो । 'एमालेलाई कमजोर बनाएर कम्युनिस्ट आन्दोलनलाई बलियो बनाउन सकिँदैन । हामी तपाईंलाई सहयोग गर्न तयार छौँ । हामीले एमाले छाड्दैनौं । तपाईं पार्टीलाई बलियो बनाउन तयार हुनुहोस्,' रावलले बैठकमा भनेका थिए ।

उपमहासचिव भुसालले पार्टी फुटे पनि केही नहुने सोच नराख्न अध्यक्ष ओलीको ध्यानाकर्षण गराएका थिए । 'देशको शक्तिशाली र पुरानाे पार्टी विभाजन हुँदा मुलुकलाई नै अप्ठ्यारो पर्छ । हामी एमालेलाई जोगाउन मात्रै होइन बलियो बनाउन एक ठाउँमा छौँ । तपाईं लचिलो भएर सहमति पालनामा अघि बढ्नुस् । एमालेलाई मजबुद बनाउन हामी सघाउने छौँ,' भुसालले भने ।

स्थायी कमिटी सदस्यहरूको आग्रहपछि अध्यक्ष ओलीले १०बुँदे सहमतिको पालनाको प्रतिबद्धता व्यक्त गर्दै त्यसको मोडालिटी तयार पार्ने जिम्मा उपाध्यक्ष रावल, महासचिव ईश्वर पोखरेल र उपमहासचिव विष्णु पौडेललाई जिम्मेवारी दिएका छन् । अध्यक्ष ओलीले एमालेमा फर्किन तयार भए विभाजनमा लागेकाहरूको कारबाही समेत फिर्ता गर्ने बताएका छन् ।

'एकताको भावमा गएपछि कारबाही, प्रतिशोध, दण्ड सजाय भन्ने कुरा सान्दर्भिक हुँदैनन् । एमालेमा फर्किनुहुन्छ भने कारबाही फिर्ता गर्न तयार छु,' ओलीको भनाइ उद्दृत गर्दै सचिव भट्टराईले भने ।

बैठकले नेता नेपाल एमालेमा नफर्किने निष्कर्ष निकालेको छ । एमाले प्रवक्ता प्रदीप कुमार ज्ञवालीले थप कार्यकर्तालाई उता जानबाट रोक्न मंगलबार स्थायी कमिटी बैठकले अपिल गर्ने संकेत गरेका छन् ।

'अपिल गरे पनि वा अरू कुनै आधारबाट पनि माधव नेपाल फर्कने सम्भावना छैन भन्ने निष्कर्ष रह्यो,’ ज्ञवालीले भने, ‘उहाँहरू त जानुभयो तर निर्वाचन आयोगले सनाखतका लागि बोलाएको छ । थप साथीहरू त्यसमा नजानुहोस् भन्नका लागि भोलिको बैठकले केही आह्वान गर्ला ।’

मंगलबारको स्थायी कमिटी बैठकमार्फत नवौँ महाधिवेशनबाट निर्वाचित कमिटीलाई यथावत राखेर अघि बढ्ने भएकाले पार्टीमै रहन अपिल गर्न लागिएको सचिव भट्टराईले बताए ।

प्रकाशित मिति: सोमबार, भदौ ७, २०७८ १७:५१