लुम्बिनी एमालेको चेतावनी– सभामुख न्यायाधीश बन्न खोजे, शाही र वलीलाई पदमुक्त नगरेसम्म संसद चल्न दिन्नौं

लुम्बिनी एमालेको चेतावनी– सभामुख न्यायाधीश बन्न खोजे, शाही र वलीलाई पदमुक्त नगरेसम्म संसद चल्न दिन्नौं

A+ A A-

लुम्बिनी प्रदेशसभाको प्रमुख प्रतिपक्षी दल नेकपा एमालेले सभामुख पूर्णबहादुर घर्ती न्यायाधीश बन्न खोजेको आरोप लगाएको छ ।

आइतबार पत्रकार सम्मेलन गरी एमालेले समाभुख घर्तीले न्यायाधीश बनेर कानुन विपरीत एमालेका सांसदद्वय अजय शाही र विमला वली खत्रीलाई पदमुक्त गर्न नमिल्ने फैसला सुनाएको आरोप लगाएको हो ।

एमाले प्रमुख सचेतक भूमिश्वर ढकालले सभामुख घर्तीले पदीय मर्यादा भुलेर प्रदेशसभाको गरिमामा आँच आउने काम गरेको बताए । ढकालले सभामुखले सांसद शाही स्वतन्त्र रहेको र वली माओवादी केन्द्रको सांसद रहेको ठहर गर्नु स्वेच्छाचारी भएको आरोप लगाए ।

‘दाङ क्षेत्र नम्बर ३ (ख) बाट विमला कुमारी खत्री वली र नवलपरासी क्षेत्र नम्बर १ (ख) बाट सूर्य चिह्न लिई निर्वाचित सांसद अजय शाही दुवै जनालाई प्रदेशसभा सदस्य पदबाट एमालेले निष्कासन गरेको जानकारी तथा सोको कार्यान्वयनका लागि अनुरोध गरी प्रदेशसभामा पत्र पठाइएकोमा सो कुरालाई अन्यथा व्याख्या गरी आकर्षित नै नहुने प्रदेशसभा नियमावली २०७४, को नियम १८८ को उपनियम (१) को खण्ड (क) तथा राजनीतिक दल सम्बन्धी ऐन, २०७३ को दफा ३५ बमोजिम सदनमा जानकारी दिनु नपर्ने र खत्री नेकपा एमाले संसदीय दलको सदस्य नभई नेकपा माओवादी केन्द्र संसदीय दलको सदस्य ठहरिने भनी स्वेच्छाचारी निर्णय गरेको, त्यसैगरी प्रदेश सांसद अजय शाहीको हकमा पनि शाहीले पेस गरेका कागजातका आधारमा सदनमा जानकारी दिन नपर्ने भनी सभामुखले आफैँ न्यायाधीश बनी फैसला गरी प्रचलित कानुन विपरीतको आचरण देखाएकाले हाम्रो गम्भीर ध्यानाकर्षण भएको छ,’ एमालेले भनेको छ ।

यस्तै, सभामुख घर्तीले आफ्नो पदीय मर्यादा भुलेर पार्टीको कार्यकर्ता बनेर एकपक्षीय व्यवहार गरेको आरोप उसले लगाएको छ । एमालेले सांसद वली १९ वैशाख, १९ जेठ र ३० जेठको संसदीय दलको बैठकमा सहभागी भएको पनि दाबी गरेको छ । यस्तै, सांसद शाही संसदीय दलको बैठकमा नियमित उपस्थित भएर निर्णयमा हस्ताक्षर गरेको उसको दाबी छ ।

एमालेले कारबाही गरिएका सांसदद्वय शाही र वलीलाई पदमुक्त नगरे संसद चल्न नदिने चेतावनी पनि दिएको छ । ‘वली र शाहीलाई प्रदेशसभा सदस्यबाट निष्कासन नगर्दासम्म हाम्रो दलले अगाडि बढाएको संसद अवरुद्ध गर्ने आन्दोलन जारी राख्छौँ,’ विज्ञप्तिमा भनिएको छ ।

हेर्नुस् विज्ञप्ति :