मन्त्री पढेको विद्यालयमा एपमार्फत पढाइको परीक्षण, अफलाइन पढ्नेलाई सहज हुने

मन्त्री पढेको विद्यालयमा एपमार्फत पढाइको परीक्षण, अफलाइन पढ्नेलाई सहज हुने

A+ A A-

प्रतिक्षा थापा स्याङ्जाको दहथुम माविको कक्षा १० मा पढ्छिन् । अनलाइन कक्षा लिँदै आएकी उनी कहिले विद्युत आपूर्ति अनियमित हुँदा, कहिले इन्टरनेट नचल्दा समस्यामा पर्ने गरेकी छिन् ।

तर, अब उनी जस्तो समस्यामा पर्दै आएका विद्यार्थीको लागि खुशीको खबर छ । गण्डकी प्रदेश सरकारले इन्टरनेट नभए पनि हुने अफलाइन कक्षाको लागि एप ल्याएको हो ।

प्रदेश सरकारले पिडी स्मार्ट एजुकेसन नामक अनलाइन अध्ययन एप ल्याएको छ । सो एपमार्फत कक्षा ६ देखि १२ सम्मका विद्यार्थीले अनिवार्य विषय इन्टरनेटबिनै पढ्न सक्ने भएका छन् ।

यो एपमा विद्यालयका शिक्षकले हरेक विषयको च्याप्टर पढाएको भिडियो पहिल्यै सेट गरिएको छ । एकपटक यो एप डाउन्लोड गरेपछि अफलाइन कक्षामा जोडिन सकिने एप निर्माता कम्पनीले जनाएको छ ।

जस्तैः सामाजिक शिक्षामा जातअनुसारका नाच शीर्षक शिक्षकले पढाइरहेका छन् भने त्यसमा सम्बन्धित नाचका ‘क्लिप’ पनि मिसाइएको छ । प्रदेश सरकारले यो एपको परीक्षण शनिबार स्याङ्जाबाट सुरू गरेको हो । प्रदेशका शिक्षा, संस्कृति, विज्ञान, प्रविधि तथा सामाजिक विकास मन्त्री मेखलाल श्रेष्ठले एसएलसी दिएको स्याङ्जाको भिरकोट नगरपालिका १ स्थित दहथुम माविबाट परीक्षण सुरू गरिएको हो ।

२०७६ साल चैतमा कोरोना भाइरसले गर्दा लकडाउन भएपछि शैक्षिक गतिविधि ठप्प भयो । गत वर्षदेखि अनलाइन कक्षा थालिएकोमा मंसिरदेखि भौतिक उपस्थितिमै कक्षा हुन थाले । अहिले दोस्रो लहर आएपछि वैशाखदेखि अनलाइनबाटै नियमित पठनपाठन हुँदै आएको छ ।

दहथुमका अभिभावक र विद्यार्थीको प्रतिक्रिया लिने, त्यसपछि अरू विद्यालयमा पनि यसैमार्फत सिकाइ अघि बढाउने प्रदेश सरकारको योजना छ । शिक्षा विकास निर्देशनालय गण्डकीका अनुसार प्रदेशमा कक्षा १२ सम्म पढाइ हुने १४ सय ४८ विद्यालय छन् । ती विद्यालयमा तीन लाख ५४ हजार ४०० विद्यार्थी रहेको निर्देशनालयको तथ्यांक छ ।

सहर क्षेत्रमा इन्टेरनेटमा अधिकांशको पहुँच रहेकाले ग्रामीण भेगका विद्यालय लक्षित गरेर यो एप ल्याइएको हो । यसमा पहिल्यै सेट भएको भिडियो विद्यार्थीले हेर्ने हो त्यसैले तत्काल प्रश्न उत्तर गर्न मिल्दैन ।

एपबाट यही सातादेखि पढिरहेकी प्रतिक्षा भन्छिन्, ‘आफूले पढ्ने च्याप्टरअनुसार त्यहीँ भएको भिडियो जतिबेला पनि हेर्न सकियो । नबुझेको कुरा पछि शिक्षकलाई सोध्न सकिन्छ ।’

प्रकाशित मिति: शनिबार, भदौ ५, २०७८ २०:३१