नेपालमा कुल जनसंख्याभन्दा बढी बैंक खाता, ३३ प्रतिशत जनता अझै वित्तीय पहुँच बाहिर

नेपालमा कुल जनसंख्याभन्दा बढी बैंक खाता, ३३ प्रतिशत जनता अझै वित्तीय पहुँच बाहिर

A+ A A-

बैंक तथा वित्तीय संस्थामा मुलुकको कुल जनसंख्याभन्दा बढी निक्षेप खाता भएको भेटिएको छ । करिब ३ करोड जनसंख्यामा निक्षेप खाताको संख्या ३ करोड ६३ लाख पुगेको नेपाल राष्ट्र बैंकको अध्ययन प्रतिवेदनले देखाएको छ ।

तर, ३३ प्रतिशत जनताको खाता नभएको, वित्तीय पहुँच नपुगेको र खाता भएकामध्ये पनि ३३ प्रतिशत निष्क्रिय रहेको देखिएको छ । नेपाल राष्ट्र बैंकले वित्तीय साक्षरता प्रवर्द्धन, शाखा विस्तार, शाखारहित बैंकिङ, भुक्तानी प्रणालीको आधुनिकीकरण गर्नेलगायतका नीतिगत व्यवस्थाले बैंक तथा वित्तीय संस्थाका प्रतिशाखाले सेवा पुर्‍याउने नागरिकको संख्या क्रमशः घट्दै गएको जनाएको छ ।

राष्ट्र बैंकबाट इजाजत प्राप्त क’, ख’ र ग’ वर्गका संस्थाको शाखा संख्या २०७७ चैत मसान्तमा ५ हजार ९ सय ७८ पुगेको छ । ७५३ स्थानीय तहमध्ये ७५० तहमा वाणिज्य बैंकको शाखा विस्तार भएको छ । निक्षेप खाता संख्या तीन करोड ६३ लाख ६६ हजार र कर्जा खाता संख्या १६ लाख ८२ हजार ८४५ रहेको छ ।

२०७७ जेठ मसान्तमा तीन करोड १८ लाख ८६ हजार निक्षेप खाता र यसमध्ये नेपाली प्राकृतिक व्यक्तिको दुई करोड ९९ लाख २८ हजार ४३६ निक्षेप खाता रहेका छन् ।

तीन पुस्ते विवरणका आधारमा प्राकृतिक व्यक्तिको एक मात्र निक्षेप खाता गणना गर्दा २०७७ जेठ मसान्तसम्ममा ६७.३४ प्रतिशत नागरिकको कम्तीमा एक निक्षेप खाता रहेको राष्ट्र बैंकले जनाएको छ ।

२०७६ असार मसान्तमा कम्तीमा एक निक्षेप खाता भएका नेपालीको संख्या ६०.९ प्रतिशत रहेको थियो । कुल निक्षेप खातामा प्राकृतिक व्यक्तिको खाताको हिस्सा ९३.४८ प्रतिशत पुगेको छ । प्रदेशगत रूपमा सबैभन्दा बढी बाग्मती प्रदेशमा १८ लाख २ हजार र कर्णाली प्रदेशमा सबैभन्दा कम ४ लाख ५८ खाता रहेका छन् ।

कुल निक्षेप खातामध्ये ६७.७ प्रतिशत खाता सक्रिय रहेका छन् । पुरुषको खाता संख्यामध्ये ६५.२ प्रतिशत र महिलाको खाता संख्यामध्ये ७२.३ प्रतिशत खाता सक्रिय रहेका छन् । प्रविधिको प्रयोगअन्तर्गत प्रतिखाता एटीएम प्रयोगकर्ता २०.३५ प्रतिशत, मोबाइल बैंकिङ प्रयोगकर्ता ३२.०३ प्रतिशत र इन्टरनेट बैंकिङ प्रयोगकर्ता ३.८६ प्रतिशत रहेका छन् ।

प्रकाशित मिति: शुक्रबार, भदौ ४, २०७८ १६:२९