रोकिएको लाइसेन्सको परीक्षा खुल्दै, पास हुने परीक्षार्थीलाई तत्कालै अस्थायी लाइसेन्स

रोकिएको लाइसेन्सको परीक्षा खुल्दै, पास हुने परीक्षार्थीलाई तत्कालै अस्थायी लाइसेन्स

A+ A A-

यातायात व्यवस्था विभागले नयाँ स्वास्थ्य मापदण्ड बनाएर सवारी चालक अनुमती पत्र (लाइसेन्स) को परीक्षा संचालनमा ल्याउने भएको छ ।

कोभिड-१९ को महामारीको कारण सरकारले जारी गरेको निषेधाज्ञासँगै गत बैशाख १६ गतेदेखि बन्द रहेको लाइसेन्सको लिखित र प्रयोगात्मक परीक्षा संचालन गर्न मापदण्ड बनाइरहेको यातायात व्यवस्था विभागका प्रवक्ता डा‍. लोकनाथ भुसालले जानकारी दिए ।

लोकसेवा, त्रिभुवन विश्वविद्यालय लगायतले पनि मापदण्ड बनाएर परीक्षा संचालन गरिरहेकोले लाइसेन्सको पनि त्यस्तै मोडेलमा परीक्षा हुने उनले बताए । ‘हामीले यातायात कार्यालयका प्रमुखहरुसँगपनि छलफल गरेर मापदण्ड बनाइरहेका छौं । धेरै भिडभाड नगराई, सामाजिक दुरी कायम गराएर, सीमित मान्छेलाई मात्र राखेर, एउटा सिफ्टमा ४०/५० जना मात्र हुने गरेर परीक्षा गराउने तयारी छ,’ उनले शिलापत्रसँग भने ।

मापदण्ड बनाउने कार्य अहिले ग्राफ स्टेजमै रहेको र केही दिनमै फाइनल गरेर सीसीएमसीमा पठाइने भुसालले जानकारी दिए । ‘मापदण्ड केही दिनमै सीसीएमसीमा पेस गर्छौं । त्यहाँबाट स्वीकृत भएपछि परीक्षा लिन्छौं,’ उनले भने । विभागका अनुसार हाल करिब ६ लाख जनाले अनलाइन फारम भरेर लिखित र प्रयोगात्मक परिक्षाको पर्खाइएमा छन् ।

तुरुन्तै लाइसेन्स

परीक्षार्थीलाई ट्रायल पास गरेर राजस्व बुझाएपछि तुरुन्त अस्थायी लाइसेन्स दिने विभागको योजना छ । सवारी तथा यातायात ऐन २०४९ को दफा ५० मा सुरुमा एक वर्षको परीक्षण काल रहने प्रावधान छ । चालकले एक वर्षको अवधीमा पाँच पटक भन्दा धेरै गल्ती नगरे स्ठायी लाइसेन्स दिइने विभागले जनाएको छ ।

पीभीसी कार्ड प्रयोग गरिएको अस्थायी लाइसेन्सलाई ट्राफिक प्रहरीले क्यूआर कोडमार्फत तुरुन्त जाँच गर्न सक्ने हुँदा नक्कली लाइसेन्सको सम्भावना कम हुने विभागको विश्वास छ । त्यस्तै, यसमा इन्टरनेट नभएको अवस्थामा यसको होलोग्राम र यूभी लाइट डिटेक्टरले सक्कली वा नक्कली तुरुन्तै पत्ता लगाउन सकिन्छ ।

अंकको आधारमा पास/फेल

अब लिइने प्रयोगात्मक परिक्षा पहिले भन्दा केही सहज हुनेछ । यसअघि सानो गल्तीमा पनि ट्रायल फेल हुने नियम भएपनि अब विभिन्न चरण अनुसार ७० अंक ल्याए लाइसेन्स पाउन सकिन्छ । तर, यसअघि ५० प्रतिशत अंक ल्याए पास हुने लिखित परीक्षामा भने ८० अंक ल्याउनुपर्ने विभागले जनाएको छ । सवारीचालक अनुमति पत्र परीक्षा सञ्चालन कार्यविधि निर्देशिका २०७७ अनुसार के, ए र बी क्याटागोरीका सवारीमा मात्र लागु हुनेछ ।

प्रकाशित मिति: बिहीबार, भदौ ३, २०७८ १६:३७