नयाँ दल दर्ता गर्दा उदास देखिए नेपाल, नेताहरूको दाबी- पार्टीले उत्साह ल्याउनेछ

नयाँ दल दर्ता गर्दा उदास देखिए नेपाल, नेताहरूको दाबी- पार्टीले उत्साह ल्याउनेछ

दल दर्ताका लागि निर्वाचन आयोग पुगेका माधव नेपाल ।

A+ A A-

माधवकुमार नेपाल मंगलबारसम्म पनि नयाँ पार्टी गठनको निष्कर्षमा पुगेका थिए, निर्णयमा पुगिसकेका थिएनन् ।

त्यो दिनको बैठकमा एमाले उपमहासचिव घनश्याम भुसालले एकताका लागि अन्तिम पहल गर्छु अहिले कुनै निर्णय नगरौँ भनेपछि नेता नेपाल निर्णय सुनाउन रोकिए । उनले भुसाललाई एकताको एक सूत्रीय माग दिएर पठाएका थिए- '२८ फागुन यता एमाले अध्यक्ष केपी ओलीले गरेका सबै निर्णय फिर्ता हुनुपर्ने ।'

नेपालको यो माग ओलीलाई सुनाउन नपाउँदै अर्को निर्णय आयो, माधव नेपालसहित १४ जना सांसदमाथि कारबाही । ओलीसँग गरेको संवादको ब्रिफिङ बुधबार बिहान नेपाल पक्षका सांसद र केन्द्रीय सदस्यहरूको भेलामा भुसालले सुनाए- 'ओली हाम्रा कुरा सुन्न तयार भएनन् ।'

भुसालको ब्रिफिङ सुनेपछि नेता नेपालले भने, 'अध्यादेश जारी हुँदै छ माग सम्बोधन गर्न तयार नभए नयाँ दल दर्ताका लागि हामी तयारी अवस्थामै छौँ । ' भुसालसहित स्थायी कमिटीका सदस्यहरूले नेता नेपाललाई रोक्न धेरै जोडबल गरेका थिए । केही सिप नलागेपछि कार्यदलमा रहेकासहित नेपाल पक्षका स्थायी कमिटी सदस्यहरूले निर्णय गरे, 'माधव नेपालसँग जो-जो जान्छन् जाउन् । स्थायी कमिटी कम्तिमा नफुटौँ ।'

नेपाल समूहका अष्टलक्ष्मी शाक्य, भीम रावल, गोकर्ण विष्ट, युवराज ज्ञवाली, भीम आचार्य, सुरेन्द्र पाण्डे, अमृतकुमार बोहोरा र रघुजी पन्तले नेता नेपाललाई साथ दिएनन् । करिब १ बजे राष्ट्रपति कार्यालयबाट अध्यादेश प्रमाणीकरण भयो । अध्यादेश प्रमाणीकरण भएसँगै नेपाल समूहका सांसद र केन्द्रीय सदस्यहरूले हस्ताक्षर संकलन सुरु गरे ।

राजनीतिक दलसम्बन्धी अध्यादेशले केन्द्रीय समिति वा संसदीय दलमा २० प्रतिशत पुर्‍याए पार्टी विभाजन गर्न सक्ने सहजता दिएको थियो । हस्ताक्षर संकलन जारी रहँदा ३ बजे रामकुमारी झाँक्री र राजेन्द्रप्रसाद पाण्डे निर्वाचन आयोग पुगेर प्रक्रिया बुझेर आए । उनीहरूले सूचना ल्याए- 'राजपत्रमा सूचना प्रकाशित नभएसम्म पुरानै कानुन आकर्षित हुने भएकाले दल दर्ता गर्न मिल्दैन ।'

साढे तीन बजे नेता नेपाल हस्ताक्षर संकलन गर्ने स्थानबाट बाहिरिँदै दल दर्ता बुधबार नै हुने प्रतिक्रिया दिए । प्रतिक्रिया दिँदै गर्दा नेता नेपाल उत्साही थिएनन् । न्याउरो हुँदै उनले भने, 'स्थायी कमिटीका बहुमत सदस्य आउने नआउनेबारे मलाई थाहा छैन । पार्टी आजै दर्ता हुन्छ ।'

दल दर्ताका लागि राजेन्द्र पाण्डे, बेदुराम भुसाल, विजय पौडेललगायतले कागजात व्यवस्थापन गर्दै थिए । साढे चार बजे नेपालसहितको टोली निर्वाचन आयोगको प्राङ्गणमा पुगे । २० मिनेटमै दल दर्ताको प्रक्रिया सकेर नेता नेपाल फर्किएका थिए ।

दल दर्तापछि नेता राजेन्द्र पाण्डेको प्रतिक्रिया थियो, 'नेकपा एमाले समाजवादी निर्वाचन आयोगमा ४ सय ३३ नम्बर दर्ता भएको छ ।' निर्वाचन चिह्न खुला किताब प्रस्ताव गरिए पनि उन्नत लोकतान्त्रिक पार्टीसँग मिल्ने भएकाले चिह्नविनै पार्टी गठन भयो । एमाले समाजवादी पार्टी दर्ताका लागि एमालेको ५८ केन्द्रीय सदस्य र ३१ सांसदले साथ दिएको नेता पाण्डेले बताए ।

नेता नेपाललाई अध्यक्ष र झलनाथ खनाललाई वरिष्ठ नेता राखेर पार्टी गठन गरिएको छ । 'अहिले हामीले ९५ जनाको केन्द्रीय कमिटी प्रस्ताव गरेर पार्टी गठन गरेका छौँ । अहिले साथ नदिनु भएका साथीहरू पनि पछि आउनुहुनेछ । यो पार्टीको राष्ट्रिय भेला छिट्टै हुन्छ,' नेता पाण्डेले भने, 'यसले आमकार्यकर्तामा उत्साह ल्याउनेछ ।'

एमालेबाट छुट्टिएपछि पनि एमाले नाममा मोह किन भन्ने प्रश्न आयोग प्राङ्गणमा नेतृ रामकुमारी झाँक्रीमाथि सञ्चारकर्मीले तेर्स्याएका थिए । '३१ वर्ष नेकपा एमाले भएर काम गर्‍यौं । पार्टी हामीले बनाएको हो । त्यसैले त्यसको लिगेसी हामीसँग छ । अनि अलिकति फरक पनि बनाउनुपर्‍यो,' झाँक्रीले जवाफ दिइन् ।

पार्टी दर्ता गर्नेक्रममा आफ्ना पक्षका नेताहरूले धोका दिएपछि नेता नेपाल निराश थिए । निर्वाचन आयोगले अब छानविन गरेर ३५ दिनभित्र दलको मान्‍यता दिने वा नदिने निर्क्यौल गर्नेछ । आफैँले बनाएको एमालेबाट आफैँ निक्लिनुपर्दा निराश देखिएका नेपालले एमाले समाजवादीबाट कत्तिको उत्साह ल्याउँछन् प्रतीक्षाकै विषय छ ।

प्रकाशित मिति: बुधबार, भदौ २, २०७८ २०:३२