संकटमा प्रदेश १ सरकार : माधव पक्षीय नेता भन्छन्- पार्टी फुटे सरकार ढाल्छौँ

A+ A A-

सरकारले संसद अधिवेशन अन्त्य गरी राजनीतिक दलसम्बन्धी अध्यादेश ल्याएसँगै एमाले विभाजन हुन सक्ने टिप्पणीहरू भइरहेका छन् । एमालेकै नेताहरूले त्यसलाई बल पुग्ने गरी प्रतिक्रियाहरू दिइरहेका छन् ।

पार्टी फुटाउन आवश्यक सङ्ख्यामा खुकुलो व्यवस्था गरिएको अध्यादेश बमोजिम एमाले विभाजन भए प्रदेश सरकारमा पनि त्यसको प्रभाव पर्ने देखिएको छ । अध्यादेशका आधारमा एमाले विभाजन भए प्रदेश १ र बागमतीको सरकार संकटमा पर्ने देखिएको छ । यसअघि एमालेले नेतृत्व गरेका लुम्बिनी र गण्डकीका सरकार परिवर्तन भइसकेका छन् ।

एमालेका वरिष्ठ नेता माधव नेपालले ओली नसच्चिए पार्टी विभाजन हुने बताइसकेका छन् । उता एमालेले नेपाल पक्षका संघीय सांसदलाई कारबाही गरेको छ । उनीहरूलाई निलम्बन गर्ने प्रक्रिया पनि एमालेले सुरु गरिसकेको छ ।

माधव नेपाल पक्षमा रहेका केन्द्रीय सदस्य तथा प्रदेश सांसद राजेन्द्र राई एमाले विभाजन भए प्रदेश सरकार ढल्ने बताउँछन् । अध्यादेश जारी भएलगत्तै दल दर्ता हुने भन्दै राईले त्यसका लागि आफूहरू तयारीमा रहेको बताए । त्यससँगै सरकार परिवर्तन हुने उनको भनाइ छ ।

‘अध्यादेश जारी हुनेबित्तिकै त्यही दिन पार्टी दर्ता गर्ने भन्ने कुरा छ । हामी तयारी अवस्थामा छौँ । दल दर्ता हुनासाथ कित्ता क्लियर हुन्छ,’ उनले शिलापत्रसँग भने, ‘जे भए पनि नयाँ पार्टी बनेपछि प्रदेश सरकार परिवर्तन हुन्छ ।’

प्रदेशसभामा एमालेका ५१ सांसदमध्ये माधव नेपाल पक्षमा २० सांसद रहे पनि त्यसमा केही परिवर्तन आउन सक्ने उनको भनाइ छ ।

‘अहिले ठ्याक्कै यति नै सांसद हाम्रो पक्षमा हुनुहुन्छ भन्ने अवस्था छैन । तर, हाम्रो २० जना हो,’ राईले भने, ‘पार्टी नयाँ बन्दा भीम आचार्यसहित केही हेराफेरी होला । तर, सरकार ढाल्न पुग्दो संख्या हुन्छ ।’ आचार्यसहितका नेताहरू संस्थापन पक्षमा लागे पनि नेपाल पक्षमा १२ जनाभन्दा बढी सांसदहरू हुने उनको दावी छ ।

प्रकाशित मिति: बुधबार, भदौ २, २०७८ ११:२३