रामचन्द्र पौडेल भन्छन्- २३ भदौपछि कांग्रेसको वैधानिकता नरहन सक्छ (भिडियो)

A+ A A-

नेपाली कांग्रेसका वरिष्ठ नेता रामचन्द्र पौडेलले २३ भदौपछि पार्टी वैधानिक नरहन सक्ने बताएका छन् ।

शिलापत्रसँगको अन्तर्वार्तामा वरिष्ठ नेता पौडेलले समयमा महाधिवेशन गर्न नसकेकाले २३ भदौपछि पार्टीको वैधानिकता नरहन सक्ने बताएका हुन् । '२३ भदौपछि संवैधानिक रूपमा पार्टीको वैधानिकता नरहन सक्छ । तर, त्यसका लागि म जिम्मेवार छैन,' उनले भने ।

पौडेलले आफूले समयमै महाधिवेशन गर्न पटक-पटक दबाब दिँदा पनि त्यसलाई पार्टी सभापति शेरबहादुर देउवाले नजरअन्दाज गरेकाले संकट आएको बताए ।

'मैले त चार वर्षमै अधिवेशन गरौँ भनेको हो तर साथीहरूले मान्नुभएन । अहिले पनि साढे पाँच वर्षभित्रै अधिवेशन गरेको भए यस्तो अवस्था आउने थिएन । तर, अब पार्टीको भविष्य अनिश्चित देख्छु,' उनले भने ।

अन्तिम अवस्थामा दबाबका कारण आफू नयाँ कार्यतालिकाका लागि राजी भएको उनले बताए । 'क्रियाशील सदस्यता विवाद कायमै हुँदा पूर्वनिर्धारित समयमा महाधिवेशन गर्न सम्भव थिएन । त्यसैले म महाधिवेशन सार्ने कुरामा सहमत भएको हुँ,' उनले भने, '१८ भदौमा वडा अधिवेशन सुरु गर्नेसहितको कार्यतालिका आएपछि भदौमा महाधिवेशन सुरु गर्नेगरी कार्यतालिका आएपछि नेताहरूको नियत महाधिवेशन गर्ने नै छ भन्ने सन्देश पनि जाओस् भनेर सहमति जनाएको हुँ ।'

वडा र स्थानीय अधिवेशनलाई नभएर संविधानले त प्रदेश र केन्द्रको महाधिवेशनलाई मात्रै चिन्छ । यसले पार्टीको वैधानिकता रहन्छ त ? भन्ने प्रश्नमा पौडेलले भने, 'वैधानिकता नरहन पनि सक्छ तर त्यसका लागि म जिम्मेवार छैन ।'

वरिष्ठ नेता पौडेलसँग शिलापत्रका लागि केशवराज जोशीले गरेको भिडियो अन्तर्वार्ता :