हामी सिक्दै छौं, हाम्रो प्रतिबद्धता सिक्नमा छ

A+ A A-

शिलापत्र डटकम तपाईंको माझ आएको छ । पत्रिकाको विषयवस्तु, साजसज्जा, समाचार तपाईंलाई कस्तो लाग्छ ? जिज्ञासा हामीभित्र छ ।

हामी आश्वासनको बोझले थिचिएको नेपाली समाजमा तपाईंलाई थप आश्वासन बाँड्न चाँहदैनौं । यसको अर्थ यो होइन कि हामी प्रतिवद्ध छैनौं ।

हामी प्रतिवद्ध भई नेपाली सञ्चारजगतमा केही थप सिर्जनात्मक योगदान गर्ने लक्ष्यसहित आएका छौं ।

अहिले देश संघीयताको कार्यान्वयन मार्फत् संविधानले दिशानिर्देश गरेको समाजवादउन्मुख यात्रामा छ । देशको यो बृहत् लक्ष्यमा हामी योगदान गर्न तयार भएर आएका हौं ।

नागरिकका दैनिक समस्या उठाउनुका साथै देशलाई सुशासनको बाटोमा लैजान समावेशी लोकतन्त्रको जरालाई स्थानीयस्तरमा पुर्याउने हाम्रो ध्येय छ ।

स्थानीय अर्थतन्त्रलाई मजबुत बनाउने ग्रामीण औद्योगिकरणको प्रक्रियालाई अगाडि बढाउन हामी लाग्ने छौं । शिक्षा, स्वास्थ्य, सार्वजनिक यातायात जस्ता सवालमा नागरिकको सहज पहुँच हुनुपर्छ र राज्यले आफ्नो उपस्थिति नागरिकमाझ देखाउनु पर्छ भन्ने हाम्रो मान्यता छ ।

हाम्रो ध्ययेप्रति हामी सचेत छौं । हामी गहन सैद्धान्तिक विषयमा पनि बहस गर्छौ । यस्ता बहसले वैचारिक मन्थन गरोस्, सबै पक्षका विचार समावेश हुन् र देशलाई दिशा लिन सजिलो होस् भन्ने हाम्रो चाहना छ ।

आदरणीय पाठक, हामी सिक्दै पनि छौं । हाम्रो प्रतिबद्धता सिक्नमा छ । सिक्दै र गर्दै जाने नीतिलाई हामीले मार्गनिर्देशक सिद्धान्त बनाएका छौं ।

हामी प्रतिबद्ध भई रचनात्मक योगदान गर्न जिज्ञासु छौं । तपाईका प्रतिक्रिया र सुझाव नै हाम्रो मार्गनिर्देशन हुनेछ ।

यो डिजिटल समाचार पत्रिका तपाईंकै हो । तपाईंकै आवाज, तपाईंकै सुःख–दुःखभन्दा बाहेक हाम्रो अन्य स्वार्थ छैन । तपाईंका स्वार्थ नै हाम्रा स्वार्थ हुन् ।

निष्पक्ष र व्यावसायिक पत्रकारिताबाट मात्र मुलुक समृद्ध बन्छ । यो दिशामा हाम्रा सामग्रीले थोरैमात्र पनि मद्दत गर्न सक्यो भने केही गरेको ठान्छौं ।

रचनात्मकता, विश्वसनीयता, समाजका विविध पक्षहरुका सुख–दुःख हाम्रा विषयवस्तु हुनेछन् । हामी आलोचनामात्रै गर्दैनौं, समाज र राजनीतिले लिनुपर्ने भावी दिशाबारे पनि प्रशस्तै छलफल गर्छौं ।

हामी लक्ष्यप्रति दृढ छौं । हामीलाई विश्वास छ, हामीले बाटो विरायौं भने नागरिकले खबरदारी गर्नेछन् । नागरिकको खबरदारी हाम्रो सबैभन्दा ठूलो सम्पत्ति हो ।

आउनुहोस् सँगै यात्रा गरौं । चिन्तन–मनन गरौं, छलफल गरौं, समृद्ध नेपालको अभियानमा सँगै हिडौं । हामीलाई तपाईंप्रति विश्वास छ । यसैको बलमा खुट्टा टेक्न चाहन्छौं ।

सामाजिक न्याय, समृद्धि र संघीय लोकतन्त्रका पक्षमा एउटा अलग पत्रकारिताको अभ्यासका लागि तपाईहरुको साथ सहयोगको ठूलो अपेक्षा राखेका छौं ।

लोकतन्त्र र बिधिको शासन रहेमात्र पत्रकारिता रहन्छ । पत्रकारिता रहेमात्र शिलापत्रडटकम रहन्छ । यो मर्मलाइ हामी सधै सम्झिरहन्छौ ।

यसलाई हुर्काउने, बढाउने, स्वस्थ राख्ने काम तपाईंकै हो । हामीले यस पोर्टलका विषयवस्तुको स्वामित्व आजैबाट तपाईंमा हस्तान्तरण गरेका छौं ।

हामी आइसकेका छौं ।

प्रकाशित मिति: आइतबार, माघ २७, २०७५ २१:५६