हेटौँडा अस्पतालमा अक्सिजन प्लान जडान: अब दैनिक एक सय सिलिण्डर अक्सिजन उत्पादन हुने

हेटौँडा अस्पतालमा अक्सिजन प्लान जडान: अब दैनिक एक सय सिलिण्डर अक्सिजन उत्पादन हुने

अक्सिजन प्लान्ट उद्घाटन गर्दै बागमती प्रदेशका मुख्यमन्त्री डोरमणि पौडल ।

A+ A A-

कोरोना संक्रमित बिरामीलाई अक्सिजन अभाव भएपछि प्रताडित बनेको मकवानपुरको हेटौँडा अस्पताल अन्ततः दैनिक एक सयभन्दा बढी सिलिण्डर अक्सिजन उत्पादन गर्ने क्षमतामा पुगेको छ ।

कोरोना संक्रमणको दोस्रो लहरमा बाहिरी जिल्लाबाट अक्सिजन ल्याएर बिरामीको उपचार गर्नु परेको अस्पतालले निजी क्षेत्रको सहयोगमा अक्सिजन प्लान्ट जडान गरेको छ । यसअघि अस्पतालमा खचाखच संक्रमित बिरामी भइरहेको बेला अक्सिजन अभाव भएपछि हेटौँडामा सन्नाटा छाएको थियो । अक्सिजन अभाव हुँदा बिरामीलाई काठमाडौंसहित सिन्धुलीको अस्पतालमा रेफर गर्नु परेको तितो सम्झना अस्पताललाई छ ।

संक्रमित बिरामीलाई आवश्यक अक्सिजन दिन नसकेपछि पाठ सिकेको अस्पताल प्रशासनले आइतबार दैनिक एकसय २० सिलिण्डर अक्सिजन उत्पादन गर्न सक्ने क्षमताको प्लान्ट जडान गरेको छ । यसअघि अस्पताललाई हेटौँडा उपमहानगरपालिकको सहयोगमा दैनिक १५ सिलिण्डर अक्सिजन उत्पादन गर्ने प्लान्ट मकवानपुर घरजग्गा व्यवसायी संघले दिएको थियो । अस्पताल सञ्चालक समिति सदस्य उत्सव चौलागाईंले अब संक्रमित बिरामीलाई अक्सिजन अभाव नहुने बताए ।

‘संक्रमण बढिरहेका बेला अस्पतालमा बिरामी धेरै भर्ना भएका थिए । त्यति नै बेला एकदिन नियमित अक्सिजन दिइरहेको प्लान्टले अक्सिजन दिन बन्द गरेको थियो । त्यसपछि बिरामीलाई हामीले अन्यन्त्र रेफर गर्नु परेको अवस्था थियो,’ करिब दुई महिनाअघिको घटना सम्झिँदै चौलागाईंले भने, ‘अब बिरामीले अक्सिजन अभाव भएको सुन्न पाइने छैन ।’

अस्पतालको आग्रहमा उद्योग संघ मकवानपुरले आइतबार अक्सिजन प्लान्ट जडान गरी हस्तान्तरण गरेको छ । प्लान्टबाट दैनिक एक सय १५ देखि एकसय २० सिलिण्डरसम्म अक्सिजन उत्पादन गर्न सक्ने चौलागाईंले जानकारी दिए । उत्पादित अक्सिजन सिधै पाइपालाइनको माध्यमबाट बिरामीको बेडसम्मै अक्सिजन पुर्‍याइने उनले बताए । हाल कोरोना संक्रमणका बिरामी थपिँदै गएपछि अक्सिजन प्लान्ट जडान गरिएको चौलागाईं बताउँछन् ।

उनले अक्सिजन अभाव हुँदा बिरामीमा देखिएको छटपटीले अक्सिजन प्लान्ट जडान कार्यमा सफलता मिलेको बताए । अस्पतालमा हाल ३९ जना कोरोना संक्रमितको उपचार भइरहेको छ । १७ वटा बेड आईसीयू, १६ वटा एचडीयू बेड, भेन्टिलेटरसहितको ६ वटा बेड र आकस्मिक कक्षमा ८ वटा बेड रहेको हेटौँडा अस्पताल एक सय २० शैय्याको हो ।

अस्पताल बागमती प्रदेश सरकारअन्तर्गत मदन भण्डारी स्वास्थ्य विज्ञान प्रतिष्ठानद्वारा सञ्चालित छ । प्रतिष्ठानले कोरोना संक्रमण बढेको बेला अस्पताललाई अस्थायी कोभिड अस्पतालका रूपमा सञ्चालन गरेको थियो । निजी क्षेत्रका ३१ उद्योगी, व्यावसायीहरूको सहयोगबाट उद्योग संघ मकवानपुरले प्लान्ट खरिद गरेर आइतबार अस्पताललाई हस्तान्तरण गरेको हो । प्लान्टको बागमती प्रदेशका मुख्यमन्त्री डोरमणि पौडेलले उद्घाटन गरेका छन् ।

उद्योग संघले एक करोड ३६ लाख ९५ हजार रुपैयाँमा प्लान्ट खरिद गरेको अध्यक्ष लेखराज पोख्रेलले जानकारी दिए ।

प्रकाशित मिति: आइतबार, साउन ३१, २०७८ २२:००