सुस्ताएको जलविद्युत्‌क्षेत्रको शेयरमूल्य साउनमा आकाशियो, अधिकांश कम्पनीको शेयरमूल्य शतप्रतिशतले वृद्धि

सुस्ताएको जलविद्युत्‌क्षेत्रको शेयरमूल्य साउनमा आकाशियो, अधिकांश कम्पनीको शेयरमूल्य शतप्रतिशतले वृद्धि

A+ A A-

कुनै बेला जलविद्युत्‌क्षेत्रका कम्पनीमा लगानी गर्नेबित्तिकै नाक खुम्च्याउने लगानीकर्ता यतिबेला यही क्षेत्रमा झुम्मिन थालेका छन् । लामो समयदेखि न्यूनतम विन्दुमा नै अड्किएको यो क्षेत्र पछिल्लो समय सर्वाधिक कारोबार हुनेमा पर्न थालेको छ । अझ भन्ने हो भने साउनभर हाइड्रो सेक्टरका कम्पनी नेप्सेमा हरियाली बनिरहे ।

विद्युत् उत्पादन तथा बिक्री वितरणका आधारमा झण्डै ८० प्रतिशत जलविद्युत् कम्पनीहरू रुग्ण बन्ने अवस्थामा पुगेकै कारण त्यसको असर धितोपत्रको दोस्रो बजारमा पर्दै आएको थियो । जसले गर्दा जलविद्युत्‌मा शेयर किनबेच गर्ने लगानीकर्ता अन्य क्षेत्रको तुलनामा कम नै हुन्थे । तर, पछिल्लो एक महिनामा भने जलविद्युत् कम्पनीमा लगानी गर्ने लगानीकर्ताको संख्या आक्रामक रूपमा बढ्न थालेको देखिन्छ भने दैनिक कारोबारका आधारमा पनि सर्वाधिक कारोबार जलविद्युत् कम्पनीकै हुन थालेको छ ।

कारोबारका आधारमा हेर्ने हो भने पछिल्ला ३० दिनमा माथिल्लो तामाकोसी अगाडि छ । तामाकोसीको सर्वाधिक कारोबार हुँदै आएको छ भने सर्किट लाग्नेमा पनि यही कम्पनी अगाडि छ । कारोबारका आधारमा अरुण भ्याली, ङादी ग्रुप पावर कम्पनी, खानीखोला जलविद्युत्, हाइड्रो इलेक्ट्रिसिटीलगायतका कम्पनीहरू अगाडि छन् ।

मूल्यका आधारमा हेर्दा यो महिना जलविद्युत् क्षेत्रका लगानीकर्ताका लागि शुभ महिना नै रहेको छ । कारोबारमा आएका अधिकांश कम्पनीको शेयरमूल्य ह्वात्तै बढ्न पुग्यो भने कारोबारमा चहलपहल पनि निकै देखियो ।

शेयरमूल्य बढाउने जलविद्युत् कम्पनीहरू

मूल्यका आधारमा यो महिना ङादी ग्रुप पावर कम्पनी सबैभन्दा अगाडि छ । यो कम्पनीको एक महिनामा १ सय ५ प्रतिशतले शेयरमूल्य बढ्न पुग्यो । गत असार मसान्तसम्म कम्पनीको मूल्य ५ सय ७० रुपैयाँ प्रतिकित्ता थियो । अहिले सो कम्पनीको मूल्य १ हजार २ सय ६५ रुपैयाँ प्रतिकित्ता छ ।

योसँगै माउन्टेन हाइड्रो, युनिभर्सल पावर कम्पनी, कालिका पावर कम्पनी, सिनर्जी पावर कम्पनीको सर्वाधिक रूपमा शेयरमूल्यमा वृद्धि भएको छ । जसको क्रमश: एक महिनामा ८१ प्रतिशत, ७६ प्रतिशत, ७१ प्रतिशत र ७० प्रतिशतले शेयरमूल्य बढ्न पुगेको हो । माउन्टेनको यो अवधिमा ३ सय ४६ रुपैयाँबाट ६ सय २८ रुपैयाँ, युनिभर्सलको ३ सय १५ रुपैयाँबाट ५ सय ३२ रुपैयाँ पुगेको छ । योसँगै कालिकाको ४ सय २४ रुपैयाँबाट ८ सय १५ रुपैयाँ पुगेको छ भने सिनर्जीको पनि ४ सय ४९ रुपैयाँबाट ७ सय ६५ रुपैयाँसम्म मूल्यवृद्धि भएको छ ।

हिमालयन ऊर्जा विकासको ३ सय ६० बाट ५ सय ९० रुपैयाँ, घलेम्दी हाइड्रोको ३ सय ५ रुपैयाँबाट ४ सय ९७ रुपैयाँ, अपि पावरको ४ सय ३ रुपैयाँबाट ६ सय ३१ रुपैयाँ, ग्रिनलाइफ हाइड्रोको ४ सय ४९ रुपैयाँबाट ५ सय ८३ रुपैयाँ र हिमालयन पावर पार्टनरको ४ सय ४९ रुपैयाँबाट ६ सय ९१ रुपैयाँ प्रतिकित्ता शेयरमूल्य पुगेको छ ।

योसँगै सीईडीबी हाइड्रोको २ सय ९४ रुपैयाँबाट ९ सय ४९ रुपैयाँ, पाँचथर पावर कम्पनीको ३ सय ७० रुपैयाँबाट ५ सय ६५ रुपैयाँ, नेपाल हाइड्रोको ४ सय ७३ रुपैयाँबाट ६ सय ८२ रुपैयाँ, दिव्यश्वरी हाइड्रोको २ सय ७९ रुपैयाँबाट ४ सय १ रुपैयाँ शेयरमूल्य पुगेको छ ।

महिनाभर लगानीकर्ताको चाप परेको खानीखोलाको शेयर मूल्य पनि यही महिना २ सय ७९ रुपैयाँबाट ४ सय रुपैयाँ पुगेको छ ।

यस्तै, शिवश्री हाइड्रोको ३ सय ३८ रुपैयाँबाट ४ सय ८० रुपैयाँ, आँखु खोला जलविद्युत्‌को २ सय ८९ रुपैयाँबाट ४ सय ९ रुपैयाँ, हिमाल दोलखा हाइड्रोको २ सय ९२ रुपैयाँबाट ४ सय ६ रुपैयाँ, छ्याङ्दी हाइड्रोको ४ सय ८५ रुपैयाँबाट ६ सय ७० रुपैयाँ, युनाइटेड मोदी हाइड्रोको ४ सय ३ रुपैयाँबाट ५ सय ५६ रुपैयाँ, बुटवल पावर कम्पनीको ५ सय ६ रुपैयाँबाट ६ सय ७९ रुपैयाँ शेयरमूल्य पुगेको छ । योबाहेक रिडी हाइड्रोपावरको ५ सय ७६ रुपैयाँबाट ७ सय ७० रुपैयाँ, राधी जलविद्युत्‌को ७ सय ४६ रुपैयाँबाट ९ सय ९६ रुपैयाँ शेयरमूल्य पुगेको छ ।

समग्रमा भन्नुपर्दा असार मसान्तदेखि २७ साउनसम्ममा जलविद्युत् समूहको सूचक मात्रै ३४ दशमलव ३९ प्रतिशतले बढेको छ ।

प्रकाशित मिति: बुधबार, साउन २७, २०७८ १५:४१