प्रदेश २ नीति तथा कार्यक्रम : कति नयाँ ?

A+ A A-

प्रदेश २ का प्रदेश प्रमुख रत्नेश्वरलाल कायस्थले प्रदेशसभामा आर्थिक वर्ष २०७६/७७ काे नीति तथा कार्यक्रम प्रस्तुत गरेका छन् । आज बसेको प्रदेशसभा बैठकमा प्रदेश प्रमुख कायस्थले नीति तथा कार्यक्रम प्रस्तुत गरेका हुन् ।

कृषि, स्वास्थ्य, शिक्षा, यातायात र पर्यटनलाई विशेष प्राथमिकतामा राखेर तयार पारिएको नीति तथा कार्यक्रम सदनमा प्रस्तुत गरिएको हो । प्रस्तुत नीति तथा कार्यक्रममा अधिकांश पुरानै कार्यक्रमको निरन्तरता रहे पनि केही नयाँ कार्यक्रम पनि समावेश गरिएका छन् ।

प्रदेश सरकारले आर्थिक रुपमा विपन्न, दलित तथा मुस्लिम छात्राहरुको शैक्षिक स्तर उकास्न विशेष छात्रवृत्ति कार्यक्रम सञ्चालनमा ल्याउने नीति लिएको छ । जसअन्तर्गत प्रत्येक छात्रालाई कक्षा १ देखि कक्षा ८ सम्म ५ सय रुपैयाँका दरले प्रत्येक महिना प्रदान गरिनेछ ।

यसका लागि संघीय सरकारसँग समन्वय गर्ने नीति तथा कार्यक्रममा उल्लेख रहेको छ । प्रदेशभित्र जन्मिने प्रत्येक छोरीहरुको शिक्षा बिमा कार्यक्रमलाई निरन्तरता दिइने नीति तथा कार्यक्रममा समावेश गरिएको छ । प्रदेश सरकारले प्रदेशमा सबैभन्दा बढी बोलिने भाषालाई प्राथमिकता दिई सोही भाषामा प्राथमिक तहसम्मको शिक्षा प्रदान गर्ने लक्ष्य लिएको छ ।

नीति तथा कार्यक्रममा प्रदेशको अस्थायी राजधानी जनकपुरधाममा रहेको जनकपुर अञ्चल अस्पताललाई प्रदेश नमूना अस्पतालको रुपमा विकसित गर्ने नीति लिइएको छ । सो अस्पतालको क्षमता आगामी वर्षभित्र ५ सय शैयासम्म पुर्याउने लक्ष्य नीति तथा कार्यक्रममा लिइएको छ । महोत्तरी, सिरहा, सर्लाही, रौतहट, बारामा रहेको जिल्ला अस्पतालहरुको स्तरोन्नति गर्ने लक्ष्य प्रदेश सरकारले लिएको छ ।

आगामी आर्थिक वर्ष भित्र कम्तीमा एक ट्रमा सेन्टरको स्थापना गरिने छ । प्रदेश सरकारले लिएको सेटलाईट सिटिको अवधारणालाई अगाडी बढाउने लक्ष्यलाई निति तथा कार्यक्रममा समावेश गरिएको छ ।

चालु आर्थिक वर्षमा सम्पन्न महेन्द्रनगर, गोलबजार, परवानीपुर, पोखरीया, परसौनीको विस्तृत अध्ययन प्रतिवेदनको आधारमा सेटलाइट सिटीको अवधारणालाई अगाडी बढाइने जनाइएको छ ।

सखडा कंकालिनी करिडोर, धनुषाधाम जनकपुर करिडोर, विद्यापति डिह, रौजा मजार, मटिहानी जलेश्वर करिडोर, परिक्रमा सडक, सिम्रौन गढ करिडोरलाई धार्मिक करिडोरको रुपमा विकास गरिने छ । पर्सादेखि सप्तरी जिल्लासम्मको २ सय ५० किलोमिटर सडक खण्डलाई मधेशी शहीद राजमार्गको रुपमा विकास गरिने निति तथा कार्यक्रममा समावेश गरिएको छ ।

हाम्रो प्रदेश, उज्यालो प्रदेश नाराका साथ प्रदेशलाई उज्यालो बनाउन ३ सय मेगावाट सौर्य उर्जा प्लान्टको स्थापना गर्ने जनाइएको छ । यसका अतिरिक्त एक जिल्ला एक नमूना परियोजना, कृषि प्रदेश अवधारणा, मुख्यमन्त्री किसान उत्थान योजना, प्रदेश क्षमता विकास केन्द्र स्थापना, विद्युतीय सुशासन, स्वच्छ प्रशासन योजना, प्रदेश सूचना प्रविधि पार्कको सम्भाव्यता अध्ययन, प्रदेश प्रेस काउन्सिल गठन, एक पालिका एक पोखरी सौन्दर्यिकरण, विरगञ्ज विकास प्राधिकरण गठन, प्रदेश एनिमल ब्रिडिङ्ग सेन्टर, प्रदेश कृषि अनुसन्धान केन्द्रको स्थापना, चन्द्रनिगाहपुर–गौर, ढल्केबर–भिठ्ठामोड, ठोरी–वीरगञ्ज, नवलपुर–मलंगवा औद्योगिक कोरिडोरको सम्भाव्यता अध्ययन, एक जिल्ला एक औद्योगिक ग्रामको स्थापना, एक पालिका एक प्राविधिक शिक्षालयको गठन सहितका योजनाहरु समावेश गरिएको छ ।

प्रकाशित मिति: सोमबार, जेठ २०, २०७६ ०४:०७