मुख्यमन्त्री पोखरेलविरुद्ध तेस्रो पटक दर्ता भएको अविश्वासको प्रस्तावमा छलफलका लागि प्रदेशसभा बस्दै

मुख्यमन्त्री पोखरेलविरुद्ध तेस्रो पटक दर्ता भएको अविश्वासको प्रस्तावमा छलफलका लागि प्रदेशसभा बस्दै

A+ A A-

आज दिउँसो १ बजे लुम्बिनी प्रदेशको प्रदेशसभा बैठक सुरु हुँदै छ । मुख्यमन्त्री शंकर पोखरेलविरुद्धको अविश्वासको प्रस्तावमाथिको छलफलका लागि बोलाइएको विशेष अधिवेशन आजदेखि सुरु हुन लागेको हो ।

प्रदेशस्थित विपक्षी गठबन्धनले मुख्यमन्त्री पोखरेलले प्रदेशसभामा बहुमत गुमाइसकेको बताउँदै आएको छ । सोही कारण मुख्यमन्त्रीविरुद्ध अविश्वासको प्रस्ताव ल्याइएको विपक्षीको भनाइ छ ।

मुख्यमन्त्री पोखरेलविरुद्ध प्रदेशसभामा योसहित तेस्रो पटक अविश्वास प्रस्ताव दर्ता भइसकेको छ । विपक्षी गठबन्धनले वैशाख ६ र वैशाख २६ गते दुई पटक अविश्वासको प्रस्ताव दर्ता गरेका थिए ।

वैशाख ६ गते दर्ता भएको अविश्वासको प्रस्तावमा मतदान हुनुअघि पोखरेलले राजीनामा दिएका थिए । वैशाख १९ मा तत्कालीन प्रदेश प्रमुख धर्मनाथ यादवले पोखरेलको राजीनामा स्वीकृत गरेका थिए । पोखरेल पुन: एमालेको एकल बहुमतको दाबी गर्दै मुख्यमन्त्रीमा नियुक्त भए ।

तर, विपक्षी गठबन्धनले भने सोही दिन प्रदेशस्थित माओवादी केन्द्रका संसदीय दलका नेता कुलप्रसाद केसीलाई मुख्यमन्त्री बनाउन ४२ सांसदको हस्ताक्षरसहित दाबी पेस गरेका थिए ।

पोखरेल नै पुन: मुख्यमन्त्रीमा नियुक्त भएपछि विपक्षी गठबन्धनले उनीसँग बहुमत नरहेको दाबी गर्दै आएको छ । त्यसैलाई आधार देखाउँदै वैशाख २६ मा पोखरेलविरुद्ध दोस्रो पटक अविश्वासको प्रस्ताव दर्ता भयो ।

तर, त्यसबेलाका प्रदेश प्रमुख धर्मनाथ यादवले अविश्वासको प्रस्ताव दर्ता भए पनि विशेष अधिवेशन आह्वान गरेनन् ।

यसैबीच केन्द्रमा सरकार परिवर्तन भएसँगै विपक्षी गठबन्धन प्रदेश प्रमुख परिवर्तन गर्ने लबिङमा लाग्यो । परिणामस्वरुप लुम्बिनीमा यादवलाई हटाएर अमिक शेरचनलाई प्रदेश प्रमुख बनाइयो ।

त्यसपछि विपक्षी गठबन्धनले साउन १९ मा पोखरेलविरुद्ध पुन: अविश्वासको प्रस्ताव दर्ता गरायो । उक्त प्रस्तावमाथिको छलफलका लागि प्रदेश प्रमुखले आज दिउँसो १ बजे प्रदेशसभाको विशेष अधिवेशन आह्वान गरेका हुन् ।

लुम्बिनीमा एमालेका ३८ सांसद छन् । बहुमतका लागि ४१ सांसदको आवश्यकता पर्दछ । विपक्षी दल नेपाली कांग्रेससँग १९, माओवादी केन्द्रका १८, जनता समाजवादी पार्टीका ३ र राष्ट्रिय जनमोर्चाका १ गरी ४१ सांसद छन् ।

पोखरेलले डाके संसदीय दलको बैठक

विशेष अधिवेशन सुरु हुने दिन आज बिहानका लागि एमालेले लुम्बिनी प्रदेशको संसदीय दलको बैठक बोलाएको छ । आज बिहान मुख्यमन्त्री निवासमा बस्ने गरी बैठक बोलाइएको ने‍ता बैजनाथ चौधरीले जानकारी दिए ।

चौधरीका अनुसार बैठकमा मुख्यमन्त्रीविरुद्ध प्रदेशसभामा दर्ता भएको अविश्वासको प्रस्तावमाथि छलफल हुने छ । दलको बैठकले अविश्वासको प्रस्तावको सामना गर्ने या राजीनामा दिने भन्ने टुंगो लगाउने उनले बताए ।

एमालेका केही नेता पोखरेलले राजीनामा दिएर नैतिकता प्रदर्शन गर्नुपर्ने पक्षमा छन् भने केही भने अविश्वास प्रस्तावको सामना गर्नुपर्ने पक्षमा छन् ।

अर्कातर्फ एमाले सांसद लिला गिरीले अविश्वासको प्रस्ताव र प्रदेशसभाको अधिवेशन आह्वान संविधानविपरीत भन्दै सर्वोच्चमा मुद्दा दर्ता गरेका छन् ।

पाण्डेयको राजीनामा

यता प्रदेश सरकारका भौतिक पूर्वाधार विकासमन्त्री सन्तोष कुमार पाण्डेयले पदबाट राजीनामा दिएका छन् । पोखरेल नेतृत्वको सरकारमा सहभागी भएका पाण्डेयले मंगलबार राजीनामा दिएका हुन् ।

सिद्धान्तको आधारमा राजनीति गर्ने जननिर्वाचित प्रतिनिधिले नैतिकताका आधारमा सरकारबाट फिर्ता हुनु नै उपयुक्त निर्णय ठानेर राजीनामा दिएको उनले बताए ।

प्रकाशित मिति: बुधबार, साउन २७, २०७८ ०७:२०