टिस्युमा सम्झौता गर्दै बार्सिलोना भित्रिएका मेसी टिस्युले आँसु पुछ्दै बाहिरिए

टिस्युमा सम्झौता गर्दै बार्सिलोना भित्रिएका मेसी टिस्युले आँसु पुछ्दै बाहिरिए

A+ A A-

गत वर्ष लियोनेल मेसी बार्सिलोनाबाट बाहिरिन खोज्दै थिए । तर, रोकिए । यो वर्ष उनी रोकिन खोज्दै थिए । तर, भावविह्वल भएर बाहिरिए । ३० जुनमा मेसीको बार्सिलोनासँग सम्झौता समाप्त भएको थियो । उनी बार्सिलोनामै रहने धेरैको अपेक्षा थियो । तर, आर्थिक अप्ठ्यारा देखाउँदै यस पटक मेसीलाई बार्सिलोनाले अनुबन्ध गरेन ।

बार्सिलोनाबाट बहिर्गमन भएसँगै मेसी म्यानचेस्टर सिटी वा पीएसजी जाने चर्चा चलिरहेको छ । आइतबारको पत्रकार सम्मेलनमा भावविह्वल हुँदै मेसीले भनेका छन्, 'अहिले नै बार्सिलोनाबाट बहिर्गमन मैले सोचेको थिइनँ ।'

टिस्युमा सम्झौता गर्दै तय भएको थियो मेसीको बार्सिलोना यात्रा

मेसीका पिता जर्जलाई आश्वस्त पार्न सन् २००० डिसेम्बर १४ मा मेसीलाई बार्सिलोनामा अनुबन्ध गर्ने सम्झौता गरिएको थियो । त्यसबेला मेसी १३ वर्षका थिए । क्लबका अध्यक्ष जोसेफ मारिया र खेल निर्देशक कार्लेस रेस्याकको उपस्थितिमा टिस्यु पेपरमा सम्झौता गरिएको थियो ।

बार्साले मेसीलाई गुन पनि लगाएको छ । उनी आधिकारिक रूपमा अनुबन्ध हुनुअघि हर्मोनका कारणका शारिरीक विकासको कठिनाइ झेलिरहेका मेसीको उपचारका लागि बार्साका निर्देशक जोअनले हजार पाउण्ड सहयोग गरेका थिए । उनी बार्सामा अनुबन्ध भएपछि त्यसको खर्च सबैले क्लबले व्यहोरेको थियो । न्यापकिनमा गरिएको प्रारम्भिक सम्झौतालाई बार्साले ४ फेब्रुअरी सन् २००४ मा आधिकारिकता दियो ।

त्यसबेला मेसी १६ वर्षका थिए भने बार्सा ट्रफीबिहीन भएको ६ वर्ष पुगेको थियो । मेसीको अनुबन्धसँगै राम्रो नतिजाको आश बार्साले गरेको थियो । १६ अक्टोबर २००४ मा उनले बार्साबाट इस्पानिअलविरुद्धको खेलमा डेब्यु गरेका थिए । खेलको अन्तिम समयमा वैकल्पिक खेलाडीका रूपमा मैदान प्रवेश गरेका मेसीले ९ मिनेटमै आफ्नो कौशलबाट सबैलाई प्रभावित पारे ।

सन् २००५ मा १७ वर्षको उमेरमा मेसीले बार्साका लागि गोल गरेका थिए । अल्बासेटीविरुद्धको खेलमा ८७औँ मिनेटमा मैदान छिरेका मेसीले एक मिनेटभित्रै बार्साका लागि आफ्नो नाममा पहिलो गोल दर्ता गराए । उनको कौशलबाट दंग बार्साले सन् २००५ मा मेसीसँग पाँच वर्षको सम्झौता गर्‍यो । सम्झौतापछि बार्साको भनाइ थियो, 'मेसीलाई कसैले अनुबन्ध गर्न चाहेमा फुटबल इतिहासकै कीर्तिमानी शुल्क तिर्नुपर्नेछ ।' त्यसबखत मेसीलाई अन्त अनुबन्धका लागि बार्साले १ सय ५० मिलियन अमेरिकी डलर शुल्क तोकेको थियो । सन् २०१० सम्म सम्झौता गरेको तीन महिनापछि बार्साले मेसीलाई सन् २०१४ सम्मको अर्को सम्झौता गरेको थियो । स्पेनिस मिडियाका अनुसार त्यसबेला मेसीको सुविधा दोब्बर बढ्यो ।

सन् २००६ मा मेसीलाई आफ्नो क्लबमा भित्र्याउन इन्टर मिलान ४ सय ६७ मिलियन अमेरिकी डलर तिर्न तयार थियो । त्यसबेला क्लबका अध्यक्ष जोअन लार्पोटाले त्यस प्रस्तावलाई अस्वीकार गरिदिए । 'इन्टर मिलान मेसीका निम्ति ४ सय ६७ मिलियन अमेरिकी डलर खर्चन तयार थियो । मेसीका बुबा जर्ज र मबीचको सम्बन्धका कारण मेसी बार्सामै रहनेमा ढुक्क थिएँ । मैले जर्जलाई भन्थे- मेसीका लागि जतिसुकै पैसा आए पनि म उसलाई बेच्ने छैन । ऊ बार्सामा नै खुशी हुनेछ । उसले आफ्नो र क्लबको महिमालाई उच्च बनाउनेछ । अन्त जाँदा आर्थिक रूपमा सन्तुष्ट होला तर मेसी अन्त खुशी हुनेछैन । तिम्रो छोरा इतिहास रच्न जन्मिएको हो । मेसीको गर्विलो इतिहासमा सघाउने टोली बार्सासँग छ,' जर्जलाई आफूले भनेको कुरा जोअन स्मरण गर्छन् ।

मेसीबारे अर्जेन्टिनाका महान खेलाडी म्याराडोनाले भनेका थिए, 'मपछि अर्जेन्टिनी फुटबलको उत्तराधिकारी मैले भेटिसकेँ उसको नाम मेसी हो र मेसी जिनियस छन्।'

मेसीको फुटबल कौशलबारे उनका पूर्व सहकर्मीको भनाइ पनि रोचक छ । जाल्टन इब्राहिमोबिचले भनेका छन्, 'दाहिने खुट्टै नभएको भए पनि मेसीले फुटबल खेल्ने थिए,' मेसीको प्रशंसामा उनी थप्‍छन्, 'देब्रे खुट्टाले मात्रै सबैलाई हायलकायल पार्ने मेसीको दाहिने खुट्टा पनि चले के हुन्थ्यो होला कल्पना पनि गर्न सकिँदैन ।'

इतिहासकै सर्वोत्कृष्ट प्रतिभा

मेसी विश्व फुटबलका सर्वोत्कृष्ट खेलाडीमध्ये एक हुन् । आफ्नो करियरमा उनले बार्सालाई ३४ वटा उपाधि दिलाए ।

बार्साबाट खेलेका ७ सय ७८ खेलमा मेसीले ६ सय ७२ गोल गरेका थिए । एउटै क्लबाट खेलेर यति धेरै गोल गर्ने कीर्तिमानी मेसीकै नाममा दर्ज छ । यति मात्रै होइन, एकै सिजनमा धेरै गोल गर्ने, एल क्लासिकोमा सर्वाधिक गोल गर्ने, सबैभन्दा बढी ह्याट्रिक गर्ने लगायतका थुप्रै कीर्तिमानी उनको नाममा छन् । मेसी सर्वाधिक ६ पटक बालोन बालोन डि' अर अर्वाड विजेता खेलाडी हुन् ।

१६ वर्षको उमेरमा बार्सा प्रवेश गरेका उनी ३४ वर्षको उमेरमा बिदा भए । बार्साबाट विभिन्न कीर्तिमानी बनाएका मेसी बिदाइमा भावुक बने । टिस्युमा सम्झौता गर्दै क्लब प्रवेशको बाटो खोलेका मेसीले बिदाइमा टिस्युले आँसु् पुछ्दै भने, 'एक दिन म फेरि बार्सिलोना फर्किनेमा आशावादी छु । यो क्लबलाई अझै राम्रो बनाउन म सहयोग गर्न चाहन्छु ।'

यो पनि पढ्नुस् :

मेसी भन्छन्- पीएसजी जाने अझै पक्का छैन, जहाँ जान्छु जित्नकै लागि खेल्छु

बार्सिलोनाबाट बिदा हुँदा भावुक बने मेसी, भने- यस्तो बिदाइ सोचेको थिइनँ

एजेन्सीको सहयोगमा शिशिर ढकालले तयार पारेको सामग्री ।

प्रकाशित मिति: आइतबार, साउन २४, २०७८ १८:५६