महाकालीमा एसएसबीले तुइन काटेको विषयमा तात्यो सदन, भारतको ध्यानाकर्षणबारे सरकार अझै मौन

महाकालीमा एसएसबीले तुइन काटेको विषयमा तात्यो सदन, भारतको ध्यानाकर्षणबारे सरकार अझै मौन

A+ A A-

प्रतिनिधिसभा भारतीय सीमा सुरक्षा बल (एसएसबी)ले तुइन काट्दा दार्चुलामा नेपाली नागरिक प्रेमसिं‌ह धामी बेपत्ता भएको विषयले तातेको छ । एसएसबीले अन्तर्राष्ट्रिय फौजदारी अपराध गरेकाले भारतसँग राजनीतिक र कूटनीतिक तबरबाट नेपालले विरोध जनाउनुपर्ने माग सांसदहरूले गरेका छन् ।

प्रमुख प्रतिपक्षी एमालेसहित सत्तारुढ दलका सांसदहरूले एसएसबीले महाकालीको तुइन काट्दा धामी बेपत्ता भएको घटनालाई हल्का रूपमा नलिन सरकारलाई सचेत गराए । यता, भारतलाई ध्यानाकर्षण गराउने सांसदहरूको मागबारे सरकार भने मौन छ ।

प्रमुख प्रतिपक्षी एमालेले त्यस घटनाबारे भारतसँग विरोधपत्र दर्ता गर्न माग गरेको छ । यस्तै, उसले घटनाबारे सरकारसँग चारबुँदे माग राखेको छ । सदनको सुरुवातमा समय लिएर बोल्दै सांसद गणेश ठगुन्नाले घटनाबारे भारतको जवाफ लिन सरकारको ध्यानाकर्षण गराउनुका साथै पीडित परिवारलाई क्षतिपूर्ति दिन माग गरे । 'युद्ध भएका देशबीचमा पनि नागरिकलाई संरक्षण गर्ने जिम्मेवारी हुन्छ । भारतको ज्यादती अमानवीय छ । सरकारले तत्काल राजदूतलाई बोलाएर नेपाल सरकारको तर्फबाट विरोधपत्र दर्ता गराओस्,' ठगुन्नाले भने ।

एमालेले यस घटनालाई सरकारले साम्य पार्न खोजिरहेको आरोपसमेत लगाएको छ । सदनमा बोल्दै सांसद महेश्वरजंग गहतराजले जयसिंह धामी बेपत्ता घटनाबारे भारतीय पक्षसँग कूटनीतिक र राजनीतिक तबरले तत्कालै छलफल गर्न माग गरे । सदनमा बोल्दै सांसद मोहन बानियाँले भने, 'दार्चुला घटनाबारे भारतसँग सरकारले कुनै स्टेटमेन्ट माग गरेको छैन । सरकारले राजनीतिक र कूटनीतिक तबरबाटै भारतको ध्यानाकर्षण गराओस्,' बानियाँले भने ।

घटनालाई सांसदहरूले मानवताविरोधी अपराध पनि भनेका छन् । सदनमा बोल्दै यज्ञराज सुनुवारले भने, 'यो घटना अमानवीय त छ नै । यसले समग्र नेपालीहरूको अपमानसमेत भएको छ । '

यस्तै, सांसद राजबहादुर बुढाथोकीले एसएसबीको ज्यादती बारम्बार भइरहेको भन्दै यसबारे भारतलाई गम्भीरतापूर्वक ध्यानाकर्षण गराउन माग गरे । ' महाकालीको घटना होस् वा कञ्चनपुरमा गोविन्द गौतमको गोली हानी हत्या भएको घटना होस्, भारतीय सुरक्षाकर्मीको दादागिरी बढिरहेको छ । सरकारले यसबारे भारतीय पक्षलाई ध्यानाकर्षण गराओस्,' उनले भने ।

यस्तै, संसदको विशेष समयमा बोल्दै नेपाली कांग्रेसका सांसद दिलेन्द्रप्रसाद बडुले पनि घटनाबारे भारतसँग राजनीतिक र कूटनीतिक तवरबाट जवाफ लिन माग गरेका छन् । 'यो घटनालाई सरकारले सामान्य रूपमा लिनु हुँदैन । सरकारले तत्कालै भारतसँग राजनीतिक र कूटनीतिक रूपमा जानकारी लिनुपर्छ,' उनले भने । घटनालाई राजनीतिक हुन नदिन आग्रह गर्दै उनले छानबिनमा सहयोग गर्न सबै दललाई आग्रह गरेका छन् ।

यस्तै, विशेष समयमा बोल्दै सांसद सूर्यप्रसाद पाठकले घटनाको निष्पक्ष छानबिनको मागसहित भारतीय राजदूतलाई बोलाएर सोधपुछ गर्न माग गरे । 'यो घटना निकै गम्भीर छ । सरकारले भारतीय राजदूतलाई बोलाएर सोधपुछ गरोस् । तार काट्ने एसएसबीलाई कारबाही हुनुपर्छ । पीडितलाई सरकारले क्षतिपूर्ति दिओस्,' उनले भने ।

विशेष समयमा बोल्ने सांसदहरू विन्दा पाण्डे, शेरबहादुर तामाङ, रामबाबु कुमार यादव, दवेन्द्रराज कँडेललगायतले पनि भारतसँग जवाफ माग गर्न ध्यानाकर्षण गराए ।

संसदीय समिति गठन गर्न माग

सांसदहरूले घटना छानबिनका लागि संसदीय समिति गठनको माग गरेका छन् । प्रशासनिक समितिको छानबिनले मात्रै नपुग्ने भन्दै उनीहरूले निष्पक्ष छानबिनका लागि संसदीय समिति गठनको माग गरेका हुन् । बैठकमा बोल्दै सांसदहरू विशाल भट्टराई, गणेश ठगुन्ना, विमला विक, मोहन बानियाँलगायतले घटनाको छानबिनका लागि संसदीय समिति गठन गर्नुपर्ने मत राखेका हुन् ।

एसएसबीले तुइन काटेको घटना अन्तर्राष्ट्रिय फौजदारी अपराध रहेको भन्दै सांसद विमला विकले भनिन्,' यो घटना अन्तर्राष्ट्रिय फौजदारी अपराध हो । सरकार यसप्रति हल्का भइरहेको छ । प्रशासनिक संयन्त्रको छानबिन अपुग पनि हुन सक्छ । घटनाको छानबिनका लागि संसदीय समिति गठन गरियोस् ।'

सांसदले विशाल भट्टराईले सरकारसँग प्रश्न गरे, 'घटना छानबिनका लागि संसदीय समिति कहिलेसम्म गठन हुन्छ ?'

संसदीय समिति तत्कालै गठन हुनुपर्ने सांसदहरूको माग छ ।

भारतसँग जवाफ माग्नेबारे सकार मौन

प्रतिनिधिसभामा दार्चुला घटनाबारे भारतसँग राजनीतिक र कूटनीतिक तबरबाट जवाफ माग्न सांसदहरूले माग गरे पनि सरकार यसबारे मौन बसेको छ । बैठकमा सांसदहरूको जिज्ञासामा जवाफ दिँदै गृहमन्त्री बालकृष्ण खाँणले समितिको प्रतिवेदन नै सरकारको अडान हुने जवाफ दिएका छन् । भारतसँग जवाफ माग्ने वा नमाग्ने भन्ने सांसदहरूको प्रश्नमा उनले मूर्त उत्तर दिन सकेनन् । 'छानबिन समितिको प्रतिवेदन नै नेपाल सरकारको अडान हुनेछ,' उनले भने ।

मन्त्री खाँणले छानबिन समितिलाई विश्वास गर्न पनि सांसदहरूलाई आग्रह गरेका छन् । संसदीय छानबिन समितिको मागबारे उनले कुनै पनि जवाफ दिएनन् । यस्तै, उनले दार्चुलामा भारतीय सीमा सुरक्षा बल एसएसबीले तुइन काट्दा नेपाली नागरिक धामी बेपत्ता भएको घटनाको छानबिनले तीव्रता पाएको बताएका छन् ।

सरकारले गठन गरेको छानबिन समितिले स्थानीय प्रहरीसँगको समन्वयमा प्रत्यक्षदर्शीसँग बयान लिइरहेको मन्त्री खाँणले बताएका छन् । महाकाली नदीमा बेपत्ता प्रेमसिंह धामीभन्दा पहिले तुइन तरेर भारत पुगेका बहादुरसिंह धामी, अमरसिंह धामी र मणिराम धामीसँग छानबिन समितिले सोधपुछ गरिरहेको उनले बताए । यस्तै, धामीसँगै तुइन तर्न मालघाट पुगेका अनिता धामी र कल्याणसिंह धामीसँग पनि सोधपुछ भइरहेको उनले बताए ।

प्रकाशित मिति: मंगलबार, साउन १९, २०७८ १८:१५