देउवा सरकारका मन्त्रीलाई विवादित हुनबाट रोक्न आचारसंहिता बन्दै

A+ A A-

सत्ता गठबन्धनको कार्यदलले मन्त्रीहरूका लागि आचारसंहिता बनाउने भएको छ ।

गठबन्धन सरकारको न्यूनतम साझा कार्यक्रम तय गर्न गठित कार्यदलले मन्त्रीहरूलाई आचारसंहितामा बाध्ने भएको हो । मन्त्री विवादित हुँदा सरकारको छविमा असर पर्ने भएकाले कार्यदलले आचारसंहिता बनाउन लागेको नेताहरूले बताएका छन् ।

बालुवाटारमा आइतबार बसेको कार्यदलको बैठकले आचारसंहिताको प्रारम्भिक मस्यौदा तयार गरेको सदस्य राजेन्द्र श्रेष्ठले बताए । हालको गठबन्धनले केपी ओली नेतृत्वको सरकारका मन्त्रीहरूले गरेका गलत कामको विरोध गरेको र गलत कदम र शैली सच्याउने प्रतिबद्धता गरेकाले मन्त्रीहरूलाई आचारसंहितामा बाध्न खोजिएको कार्यदलले जनाएको छ ।

'मन्त्रीहरूको स्वच्छ छवि कायम गर्न आचारसंहिता बनाउन लागिएको हो,' श्रेष्ठले भने । तीन साता बित्दा पनि मन्त्रिपरिषद्ले भने पूर्णता पाउन सकेको छैन । कांग्रेसले पार्टीबाट मन्त्रिपरिषद्‍मा पठाउने सदस्यबारे आन्तरिक छलफल गरेको छैन भने माओवादी केन्द्रले सोमबार मन्त्रीहरूको नामावली टुंगो लगाउने तयारी गरेको छ ।

माओवादी केन्द्रले भने एमाले वरिष्ठ नेता माधवकुमार नेपाल समूह अनिर्णीत बन्दा मन्त्रिपरिषद् विस्तारमा ढिलाइ भएको बताएको छ । आइतबारको स्थायी समिति बैठकपछि सञ्चारकर्मीहरूसँग कुरा गर्दै प्रवक्ता नारायणकाजी श्रेष्ठले भने, 'माधव नेपाल पक्षले निर्णय नगर्दा केही ढिलाइ भएको हो । केही दिनमै सरकारलाई पूर्णता दिने तयारी छ । माओवादीले सोमबार मन्त्रीको नामावलीलाई अन्तिम रूप दिन्छ ।'

प्रवक्ता श्रेष्ठले नेता नेपालको निर्णय कुरेको बताए पनि अध्यक्ष पुष्पकमल दाहाल प्रचण्डले भने माधव नेपाल सरकारमा सहभागी नहुने ब्रिफिङ बैठकमा गरेका छन् । नेता नेपालसँग गत सातादेखि निरन्तर भेटवार्तामा रहेका प्रचण्डले अघिल्लो साताको बुझाइ परिवर्तन गर्दै भने, 'माधवजी सरकारमा आउने सम्भावना अब देखिएको छैन । उहाँ पार्टीमै फर्किने सम्भावना धेरै छ ।'

गत साताको स्थायी समिति बैठकमा सम्बोधन गर्दै उनले नेता नेपाल सरकारमा सहभागी हुने दाबी गरेका थिए । यता जनता समाजवादी पार्टीले पनि मन्त्रीहरूको नामावली टुंगो लगाउन सकेको छैन । जसापाका केन्द्रीय कार्यकारिणी समितिका सदस्य मोहम्द इस्तियाक राईले मन्त्रालयको भागबण्डा टुंगो नलागेकाले जसपाले नामावली दिन नसकेको बताए। 'प्रधानमन्त्रीबाट मन्त्रालयको विषयमा केही कुरा आएको छैन । मन्‍त्रालयको नाम आउनेबित्तिकै मन्त्रीहरूको टुंगो लाग्छ,' उनले भने ।

सरकारमा हाल कांग्रेसका तर्फबाट गृह मन्‍त्रालयको जिम्मेवारीमा बालकृष्ण खाँण र कानुनमन्त्रीका रूपमा ज्ञानेन्द्रबहादुर कार्की सहभागी छन् । यस्तै कांग्रेसले स्वास्थ्य राज्यमन्त्रीमा उमेश श्रेष्ठलाई पठाएको छ । यता माओवादी केन्द्रका तर्फबाट अर्थ मन्त्रालयको जिम्मेवारी जनार्दन शर्माले सम्हालेका छन् भने ऊर्जा, सिंचाइ तथा जलस्रोत मन्त्रीमा पम्फा भुसाल छिन् । सरकार गठन भएको तीन सातासम्म पनि मन्त्रिपरिषद् विस्तार हुन नसकेको भन्दै सदनमै सरकारको आलोचना भएको छ ।

व्यवसायीलाई मन्त्री बनाएपछि सरकारको आलोचना भएको थियो। सदनमा सत्तारुढ दलकै सांसदले आलोचना हुने नभई वाहवाही पाउने किसिमको मन्त्रिपरिषद् विस्तार गर्न सुझाव दिएका थिए । त्यही सुझाव अनुसार मन्त्रीहरूलाई विवादित हुनबाट रोक्न आचारसंहिता बनाउन लागिएको कार्यदलका सदस्य डा. मिनेन्द्र रिजालले बताए । 'सरकारका मन्त्रीहरूलाई जनअपेक्षा अनुसार काम गर्नका निम्ति आचारसंहिताको बन्धन बाँध्न लागेका हौँ,' रिजालले भने ।

कार्यदलले तयार गरेको आचारसंहिताका प्रारम्भिक बुँदामा संविधानलाई पूर्ण रूपमा मान्नुपर्ने, सरकारको साझा न्यूनतम कार्यक्रमलाई सफल बनाउने गरी काम गर्नुपर्ने र स्वच्छ छवि कायममा प्रतिबद्ध रहनु पर्ने लगायतका बुँदा उल्लेख छन् । यस्तै कार्यदलले संघीयताको सुदृढीकरणलाई सरकारको प्रथामिकतामा राखेको छ ।

'संघीयताका कारण भ्रष्टाचार बढेको र यसलाई खारेज गर्नुपर्ने आवाज उठ्न थालेपछि संघीयतालाई सफल बनाउन आवश्यक सुदृढीकरणका कार्यक्रम सरकारको प्राथमिकतामा छ,' कार्यदलका एक सदस्यले भने । सरकारको पहिलो प्राथामिकता भने कोभिड नियन्त्रण नै रहेको छ ।

कार्यदलले तयार गरेको साझा न्यूनतम कार्यक्रमको मस्यौदामा आइतबार बालुवाटारमा सदस्यहरूले करिब डेढ घण्टा छलफल गरेका थिए। त्यस मस्यौदालाई मूर्त रूप दिँदै छिट्टै शीर्ष नेताहरूलाई हस्तान्तरण गरिने सदस्य श्रेष्ठले बताए । 'हामीले विभिन्न बुँदामा छलफल गरेका छौँ । प्रारम्भिक मस्यौदालाई अन्तिम रूप दिएर केही दिनमै शीर्ष नेतालाई बुझाउँछौँ,' उनले भने ।

कांग्रेसका महामन्त्री पूर्णबहादुर खड्का संयोजक रहेको समितिमा नेताहरू डा. मिनेन्द्र रिजाल र रमेश लेखक सदस्य छन् । यस्तै माओवादी केन्द्रबाट वर्षमान पुन र देव गुरुङ रहेका छन् भने जसपाबाट राजेन्द्र श्रेष्ठ र महिन्द्र राय यादव छन् ।

प्रकाशित मिति: आइतबार, साउन १७, २०७८ २०:५९