स्वास्थ्यकर्मीमाथि दुर्व्यवहार गर्नेलाई कारबाही गर्न माग

A+ A A-

अर्घाखाँचीको जिल्ला अस्पतालमा बिरामी जाँचिरहेका स्वास्थ्यकर्मीमाथि बिरामीका आफन्तले दुर्व्यवहार गरेको भन्दै अस्पतालले निष्पक्ष छानबिनको माग गरेको छ ।

पूर्वराष्ट्रियसभा सदस्य चन्द्रबहादुर खड्काकी आमालाई उपचार गर्ने क्रममा खड्कासहित केही व्यक्तिले अस्पतालका निमित्त मेडिकल सुपेरिटेण्डेन्ट डा. कपिल गौतमसहित उपचारमा संलग्न स्वास्थ्यकर्मीलाई बुधबार साँझ दुर्व्यवहार गरेका थिए ।

निमित्त मेसु डा. गौतममाथि अपशब्द बोल्दै एम्बुलेन्समा केहीबेर थुनेको समेत अस्पतालले बताएको छ । अस्पतालले एक प्रेस विज्ञप्ति जारी गर्दै स्वास्थ्यकर्मीलाई दुर्व्यवहार गर्नेहरूमाथि कडा कारबाही गर्न माग पनि गरेको छ ।

अस्पताल विकास समितिका अध्यक्ष श्रीकृष्ण भुसाल र निमित्त मेसु गौतमद्वारा हस्ताक्षरित विज्ञप्तिमा ‘कपिल गौतम एम्बुलेन्सभित्र प्रवेश गरी कोभिड बिरामीको प्रकृतिअनुसार अक्सिजन मिलाउँदै गरेको अवस्थामा एम्बुलेन्सको ढोका लगाइ यो डाक्टरको काम छैन, यसलाई पनि काठमाडौं लैजान पर्छ, बिरामीसँगै जान्छ जस्ता अभद्र अपशब्द प्रयोग गरी गाडीचालकलाई तुरुन्तै गाडी हिँडाल' भनी दवाद दिइएको उल्लेख छ ।

केही समय एम्बुलेन्सभित्र थुनिएपछि अन्य व्यक्तिहरूको मद्दतले एम्बुलेन्सको ढोका खुलेपछि डा. गौतम बाहिर निस्किन पाएको अस्पतालले बताएको छ ।

बिरामीलाई बुधबार बिहान ११:३२ बजे अस्पतालको आकस्मिक कक्षमा ल्याइएको थियो । निमित्त मेडिकल सुपरिटेण्डेन्ट डा. गौतम, डा. पुजा पन्थ र आकस्मिक कक्षमा कार्यरत स्वास्थ्यकर्मीहरूले बिरामीको उपचार गरी कोभिड–१९ को जटिल निमोनिया देखिएको भन्दै बिरामीलाई तत्काल काठमाडौं लैजान रेफर गरेका थिए ।

त्यसपछि बिरामीका आफन्तले आकस्मिक कक्षमा रहेका स्वास्थ्यकर्मीप्रति धम्कीपूर्ण शब्द प्रयोग गरेर गालीगलौज गरेको अस्पतालले जनाएको छ । अस्पतालले उपचारमा खटिएका स्वास्थ्यकर्मीमाथि भएको दुर्व्यवहारले अस्पतालका सम्पूर्ण स्वास्थ्यकर्मीको मनोबल गिरहेको, उत्साह घटेको र असुरक्षित महसुस भएको बताएको छ ।