कपनवासीकाे दुःख- सडकले बगाएकाे कहीँ सुन्नुभएकाे छ ? हामीलाई बगाउँछ

कपन मिलनचाेककाे याे खाेला नभएर सडक हाे । तर, बर्खाभरि यहाँ खाेला बग्छ ।

A+ A A-

ढलको उचित व्यवस्थापन नहुँदा काठमाडाैं कपनका मिलनचोक, गोपीकृष्ण हल, सरस्वतीनगरलगायत क्षेत्र वर्षेनी डुबानमा पर्दै आएका छन् । वर्षासँगै आएको बाढीले यस क्षेत्रका अधिकांश सडकमा पानी जम्ने गरेको छ ।

सडकको किनारबाट पानी पटाउने व्यवस्था नहुनु र ढल व्यवस्थापनमा धेरै त्रुटि भएका कारण यो क्षेत्र जलमग्न बन्ने गरेको हो । चाबहिलको गोपीकृष्ण हलनजिकैको ढल फुटेर सडकबाट पानीको भेल निस्कने गरेको छ । कालोपत्र गरिएको सडक पनि ढलको पानीले उप्काएकाले त्यहाँ ठूलाठूला खाल्डा बनेका छन् ।

मिलनचोकमा पानी परेपछि सडक र पसलको पेटीबाटै खोलो नै बग्ने गरेकाले स्थानीयवासी सडक पार गर्नसमेत सक्दैनन् । सडकमा भएका ठूल्ठूला खाल्डासमेत भरिएर आउने बाढीका कारण मोटरसाइकल, साइकल र स्कुटर चलाउनेले खाल्डो नदेख्दा दुर्घटनासमेत हुने गरेको छ ।

घुँडासम्म आउने ढलको पानीमा सर्वसाधारण हातमा जुत्ता बोकेर पैदल हिँड्न बाध्य छन् । कपनवासीले वर्षौंदेखि यस्तो समस्या खेप्दै आएका हुन् । धेरैपटक स्थानीयवासीले सम्बन्धित निकाय तथा जनप्रतिनिधिसँग बाटो मर्मत तथा स्तरोन्नतिका लागि माग गरे पनि हुन्छ भन्ने तर काम नगर्ने प्रवृत्तिले हैरान भएका छन् ।

ठूलो पानी पर्दा सडकबाटै खोला बग्छ । पानी र हिलोले भरिएको खाल्डोे नदेखिँदा साना केटाकेटी, वृद्धवृद्धा तथा युवासमेत खाल्डोमा चुर्लुम्म डुब्ने गरेका छन् । यो नियती कपनवासीले पटकपटक भोग्दै आएका हुन् ।

मिलनचोकनजिक बस्ने समीक्षा दाहाल सडकमा बगेको पानी देखाउँदै भन्छिन्, 'हेर्नुस् त यो सडक हो कि खोला हो ? यहाँबाट कसरी पार हुने ? यस्तो दुर्दशा कहिलेसम्म सहने ?'

मिलनचाेक बस्ने युवा विष्णु खतिवडाले ठूलो पानी परेका बेला हिँडेर वा मोटरसाइकलमा घर पुग्न नसकिने भएकाले ट्रयाक्टरमा जाने गरेको बताए । 'सडकले बगाएकाे कहीँ सुन्नुभएकाे छ ? हामीलाई बगाउँछ', उनले भने, 'तर, हाम्राे दुःख कसैले देखेनन्, या देखेर पनि वास्ता गरेनन् ।'

मिलनचोक, साततले, कपन प्रहरी प्रभाग, आकाशे धारा हुँदै बालुवाखानी पुग्ने सडकको अवस्था पनि नाजुक छ । लामो समयदेखि खनिएको ढलको खाल्डो र यसैबाट बनेको हिलो र चिप्लोबाटो माथि बग्ने पानीको भेलले यहाँका बासिन्दा र व्यावसायी आजित भएका छन् । यस्तो समस्या समाधान नहुँदा व्यवसाय नै चौपट भएको उनीहरूको गुनासो छ । गुनासो सुनेर समस्या समाधान गर्न चासो दिने कोही नहुँदा उनीहरु झन् आक्रोशित बनेका छन् ।

प्रकाशित मिति: सोमबार, साउन ११, २०७८ १२:५०