लिटिल एन्जल्स स्कुलका सञ्चालक उमेश श्रेष्ठ स्वास्थ्य राज्यमन्त्रीमा नियुक्त

लिटिल एन्जल्स स्कुलका सञ्चालक उमेश श्रेष्ठ स्वास्थ्य राज्यमन्त्रीमा नियुक्त

A+ A A-

नेपाली कांग्रेसका सांसद उमेश श्रेष्ठ स्वास्थ्य तथा जनसंख्या राज्यमन्त्रीमा नियुक्त भएका छन् ।

आइतबार प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले श्रेष्ठलाई स्वास्थ्य राज्यमन्त्रीमा नियुक्त गरेकी हुन् ।

स्वास्थ्य तथा जनसंख्या मन्त्रालयको जिम्मेवारी प्रधानमन्त्री देउवासँगै रहने गरी श्रेष्ठलाई राज्यमन्त्रीमा नियुक्त गरी मन्त्रालयको कार्यभार सम्हाल्ने गरी जिम्मेवारी तोकेको राष्ट्रपति कार्यालयका सहायक प्रवक्ता केशव प्रसाद घिमिलेले जारी गरेको विज्ञप्तिमा उल्लेख छ ।

स्वास्थ्य राज्यमन्त्री बनेको श्रेष्ठ लिटिल एन्जलस स्कुलका सञ्चालकसमेत हुन् । श्रेष्ठ कांग्रेसका समानुपातिक सांसद हुन् । योसँगै देउवा नेतृत्वको मन्त्रिपरिषद् ६ सदस्यीय बनेको छ ।

मन्त्रालय भागबण्डामा कुरा नमिल्दा प्रधानमन्त्री देउवाले मन्त्रिपरिषद्लाई पूर्णता दिन सकेका छैनन् । प्रधानमन्त्री देउवाकै पार्टी कांग्रेसभित्र पनि मन्त्रीको नाम टुंगो लाग्न सकेको छैन । वरिष्ठ नेता रामचन्द्र पौडेल समूहले उपप्रधानमन्त्रीसहित चार मन्त्रालय मागेपछि प्रधानमन्त्री देउवा अप्ठ्यारोमा परेका छन् ।

माओवादी केन्द्रबाट सरकारमा पठाउने थप मन्त्रीबारे छलफल भएपनि आकांक्षी धेरै हुँदा टुंगो लाग्न सकेको छैन भने जसपाभित्रको पार्टीको आधिकारिकताबारेको विवाद टुंगो लाग्ने चरणमा भएकाले सरकारमा सहभागी हुने मन्त्रीको नाम प्रधानमन्त्री देउवालाई दिन सकेको छैन ।