गण्डकीमा कांग्रेसले टुंग्यायो मन्त्री, सबै समानुपातिक

A+ A A-

नेपाली कांग्रेसले गण्डकी प्रदेशको मन्त्रीमण्डलमा सहभागी हुनेको नाम टुंग्याएको छ । मुख्यमन्त्री कृष्णचन्द्र नेपाली पोखरेलले सरकारमा सहभागी हुने तीन मन्त्रीको नाम शुक्रबार टुंगो लगाएका हुन् ।

कांग्रेसबाट स्याङ्जाका मेखलाल श्रेष्ठ, तनहुँका डोबाटे विश्वकर्मा र बागलुङका मणिभद्र शर्मा कँडेल मन्त्री बन्ने मुख्यमन्त्रीनिकट स्रोतले शिलापत्रलाई जानकारी दियो । यी तीनै जना समानुपातिक सांसद हुन् ।

यसअघि कांग्रेसकै तर्फबाट सरकारमा गएका कुमार खड्का पनि समानुपातिक सांसद हुन् । भौतिक पूर्वाधार, शहरी विकास तथा यातायात व्यवस्था मन्त्रालय, कानुन, सञ्चार तथा प्रदेशसभा मामिला, उद्योग वाणिज्य तथा आपूर्ति मन्त्रालय कांग्रेसको भागमा छ ।

तीन जनामध्ये कसले कुन मन्त्रालय पाउने भन्ने टुंगो भने भएको छैन । कांग्रेस र माओवादीका तीन/तीन जनाले आजै दिउँसो १ बजे प्रदेश प्रमुखको निवासमा शपथ लिँदै छन् । माओवादीले बिहीबार नै मन्त्रीको नाम टुंगो लगाइसकेको छ ।

माओवादी केन्द्रबाट रामजी बराल (जीवन) अर्थमन्त्री, चन्द्रबहादुर बुढा भूमि व्यवस्था, कृषि, सहकारी, तथा गरिबी निवारणमन्त्री र दीपक थापा वन, वातावरण तथा भू–संरक्षण मन्त्री बन्दै छन् । गण्डकी प्रदेशमा रहेका ११ मन्त्रालयमध्ये पाँच मन्त्रालय कांग्रेसले पाएको छ । माओवादीको भागमा चार, जसपा र स्वतन्त्र सांसद राजीव गुरुङको भागमा एक/एक मन्त्रालय परेको छ ।

जसपाले दुई मन्त्रालय पाउने भनिएकोमा मन्त्री टुंगो लगाउँदा अन्तिममा कांग्रेसले जसपालाई दिने भनिएको एउटा मन्त्रालय पनि लिएको हो । कांग्रेसबाट यसअघि नै कुमार खड्का शिक्षा, संस्कृति, विज्ञान, प्रविधि तथा सामाजिक विकासमन्त्री छन् । माओवादीबाट मधुमाया अधिकारी गुरुङ मन्त्री बनेकी थिइन् । उनले स्वास्थ्य तथा जनसंख्या मन्त्रालय सम्हालेकी छन् ।

ऊर्जा, जलस्रोत तथा खानेपानी मन्त्रालयमा हरिशरण आचार्य र युवा तथा खेलकुद मन्त्रीमा स्वतन्त्र सांसद राजीव गुरुङ यसअघि नै नियुक्त भइसकेका छन् ।

प्रकाशित मिति: शुक्रबार, साउन ८, २०७८ १२:५०