कमला नदीको बाँध भत्किँदा स्थानीय त्रसित, तत्काल काम चलाउ बाँध बनाइँदै

A+ A A-

कमला नदीको बाँध भत्किएपछि स्थानीयमा त्रास फैलिएको छ । बुधबार बिहान धनुषाको सबैला नगरपालिका-१३ स्थित किरतपुरनजिक बाँध भत्किएको धनुषाका प्रमुख जिल्ला अधिकारी बन्धु प्रसाद बाँस्तोलाले जानकारी दिए ।

उनका अनुसार बस्तीबाट करिब एक किलोमिटरको दूरीमा रहेको तटबन्ध बाढीले कटान गरेको हो । स्थानीयका अनुसार बाँध कटान गरी बाढी धान खेतसम्मै पुगेको छ । बाँध भत्किएपछि धनुषाका पूर्वी क्षेत्रका गाउँहरू जोखिममा परेका छन् । बाढीले धनुषाको सबैला नगरपालिका, शहीदनगर नगरपालिका, कमला नगरपालिका र जनकनन्दनी गाउँपालिकाका गाउँ डुबानमा पर्ने जोखिम बढेको छ ।

बाँधको करिब ८० प्रतिशत भाग कटान गरिसकेपछि मंगलबार नेपाली सेना, सशस्त्र प्रहरी र नेपाल प्रहरीको संयुक्त टोलीले नाइलनको जालीमा माटोको बोरा राखेर दिनभर बाँध बचाउन प्रयास गरेको थियो । तर, राति बाढीले सबै बगाएको धनुषाका सशस्त्र प्रहरीका प्रहरी नायब उपरीक्षक दीपेन्द्र विष्टले बताए ।

‘पानीको बहाब बढेकाले बाँध मर्मत गर्नसक्ने अवस्था छैन,’ उनले भने, ‘तर, हामी बिहान ६ बजेदेखि नै तारजालीमा बोरा भरेर ड्याम बनाउँदैछौँ । पहाडतिर वर्षा भएर पानीको बहाब बढ्यो भने डेन्जर हुनसक्छ । बालौटे माटो छ अलकति पानी पर्‍यो भने सबै झरिहाल्छ ।’

बाँध मर्मतका लागि अर्थ मन्त्रालयले तत्काल कमला नदी नियन्त्रण आयोजना कार्यालयमार्फत ५० लाख रुपैयाँ पठाएको प्रमुख जिल्ला अधिकारी बाँस्तोलाले जानकारी दिए । ‘ठूलै बाढी आएन भने पानी बाहिर निस्किने अवस्था छैन । २-४ दिनमा काम चलाउ बाँध पनि तयार भइहाल्छ,’ उनले भने ।

आयोजनासँगै नेपाली सेना, सशस्त्र प्रहरी र नेपाल प्रहरीले पूर्ण शक्ति लगाएर काम गरिरहेको उनको भनाइ छ । बाढीका कारण हुन सक्ने सम्भावित जोखिमबाट स्थानीयलाई सतर्क रहन भनिएको छ ।

प्रकाशित मिति: बुधबार, साउन ६, २०७८ १८:०५