वाणिज्य बैंकहरूको एकवर्षे कारोबार १५ खर्ब २६ अर्ब, प्रतिस्पर्धामा एनआईसी र ग्लोबल आईएमई

वाणिज्य बैंकहरूको एकवर्षे कारोबार १५ खर्ब २६ अर्ब, प्रतिस्पर्धामा एनआईसी र ग्लोबल आईएमई

A+ A A-

पछिल्लो एक वर्षमा २७ वटा वाणिज्य बैंकले १५ खर्ब २६ अर्बको कारोबार गरेका छन् । नेपाल बैंकर्स संघको तथ्यांकअनुसार यो अवधिमा ७ खर्ब ११ अर्ब रुपैयाँको निक्षेप संकलन गरेका छन् भने ८ खर्ब १५ अर्ब रुपैयाँ कर्जा विस्तार गरेका छन् । एक वर्षको अवधिमा संकलन गरिएको निक्षेपभन्दा विस्तार गरिएको कर्जा १ खर्ब ४ अर्ब रुपैयाँले बढी छ ।

योसँगै वाणिज्य बैंकको जम्‍मा निक्षेप ४२ खर्ब १ अर्ब रुपैयाँ पुगेको छ भने कर्जा विस्तार ३६ खर्ब ४६ अर्ब रुपैयाँ पुगेको छ । हालसम्मको निक्षेप संकलनमा सबैभन्दा धेरै एनआईसी एशियाले विस्तार गरेको छ भने ग्लोबल आईएमई, राष्ट्रिय वाणिज्य बैंक, नबिल र सिद्धार्थ बैंक धेरै निक्षेप संकलन गर्ने पाँच बैंकभित्र परेका छन् । पछिल्लो एक वर्षमा भएको निक्षेप संकलनमा सबैभन्दा धेरै संकलन गर्नेमा एनआईसी, ग्लोबल आईएमई, सिटिजन, सिद्धार्थ र नबिल बैंक छन् ।

निक्षेप संकलन (रकम अर्बमा)
हालसम्म		पछिल्लो एक वर्ष
एनआईसी	३००.२५	एनआईसी	८९.४१
ग्लोबल आईएमई	२८३.३४	ग्लोबल आईएमई	५६.७
राष्ट्रिय वाणिज्य	२६४.१०	सिटिजन	५०.८
नबिल	२२८.०१	सिद्धार्थ	३९.२६
सिद्धार्थ	१८५.२०	नबिल	३४.९८

कर्जा विस्तारतर्फ हालसम्म सबैभन्दा बढी कर्जा लगानी गर्नेमा एनआईसी, ग्लोबल आईएमई, नबिल, राष्ट्रिय वाणिज्य र नेपाल इनभेस्टमेन्ट बैंक छन् । त्यस्तै, पछिल्लो एक वर्षको कारोबारमा धेरै कर्जा विस्तार गर्नेमा पनि क्रमश: एनआईसी, नबिल, राष्ट्रिय वाणिज्य बैंक, ग्लोबल आईएमई र सिटिजन बैंक नै छन् ।

कर्जा विस्तार (रकम अर्बमा)
हालसम्म		पछिल्लो एक वर्ष
एनआईसी	२६६.७६	एनआईसी	९१.१
ग्लोबल आईएमई	२४२.३७	नबिल	५२.६४
नबिल	१९७.८५	राष्ट्रिय वाणिज्य	४३.२८
राष्ट्रिय वाणिज्य	१८६.१७	ग्लोबल आईएमई	४२.५१
नेपाल इन्भेस्टमेन्ट	१७०.५	सिटिजन	४२.३९

एनआईसी र ग्लोबल आईएमईको प्रतिस्पर्धा

हालसम्म बजारमा भएको कर्जा र बजारबाट उठाएको निक्षेपको हिसाबमा एनआईसी बैंक पहिलो र ग्लोबल आईएमई दोस्रोमा छन् ।

एनआईसी एशिया बैंक हालसम्मको सबैभन्दा धेरै निक्षेप संकलन, कर्जा विस्तार गर्नुका साथै पछिल्लो एक वर्षको कारोबारमा पनि सबैभन्दा धेरै निक्षेप संकलन गर्न र कर्जा विस्तार गर्न सफल भएको छ ।

ग्लोबल आईएमई बैंक समग्रमा कर्जा विस्तार र निक्षेप संकलनमा दोस्रो स्थानमा रहे पनि पछिल्लो एक वर्षमा विस्तार गरेको कर्जाको हिसाबले चौथो नम्बरमा छ भने यो अवधिमा संकलन गरेको निक्षेपको हिसाबले दोस्रो नम्बरमा छ ।

प्रकाशित मिति: सोमबार, साउन ४, २०७८ १७:०१