देउवालाई विश्वासको मत दिएका किसान श्रेष्ठ भन्छन्– ओलीले गलत गरेकाले साथ छोडेँ (अन्तर्वार्ता)

देउवालाई विश्वासको मत दिएका किसान श्रेष्ठ भन्छन्– ओलीले गलत गरेकाले साथ छोडेँ (अन्तर्वार्ता)

A+ A A-

नेकपा एमालेको माधव नेपाल पक्षले प्रधानमन्त्री शेरबहादुर देउवालाई विश्वासको मत दिने बताइरहेको थियो । तर, ओली पक्षका सांसदले नै देउवालाई विश्वासको मत दिनु भने आश्चर्यकै विषय रह्यो ।

प्रधानमन्त्री देउवालाई आइतबार विश्वासको मत दिने ओली पक्षका आठ सांसदमध्येका हुन्, कृष्णकुमार श्रेष्ठ (किसान) । तनहुँ क्षेत्र नम्बर १ मा नेपाली कांग्रेसका शीर्ष नेतालाई हराएपछि व्यापारिक पृष्ठभूमिका श्रेष्ठ संसद छिरेका हुन् । श्रेष्ठले नेपाली कांग्रेसका वरिष्ठ नेता रामचन्द्र पौडेललाई २०७४ सालको प्रतिनिधिसभा निर्वाचनमा ६८ सय मतले हराएका थिए ।

एमाले अध्यक्ष केपी शर्मा ओलीको पक्षमा अडिग श्रेष्ठले सरकारबाट बहिर्गमनसँगै ओलीको साथ छोडे । ओली क्याबिनेटमा मन्त्री बन्न चाहेका श्रेष्ठ मन्त्री बन्न नपाउँदा ओलीको साथ छोडेको अधिकांशको विश्लेषण छ । शिलापत्रसँग कुराकानी गर्दै सांसद श्रेष्ठले केपी ओलीले गलत गरेकाले साथ छोडेको बताए । तर, मन्त्री बन्नकै लागि देउवालाई विश्वासको मत नदिएको सांसद श्रेष्ठको दाबी छ ।

प्रस्तुत छ, प्रधानमन्त्री देउवालाई विश्वासको मत दिएका एमाले सांसद श्रेष्ठसँग शिलापत्रकर्मी अनुप पौडेलले गरेको कुराकानीः

पार्टीले विश्वासको मतको विपक्षमा मतदान गर्न भनेको थियो । उल्लंघन गरेर जाने निर्णय किन गर्नुभयो ?

पार्टीको ह्वीप लाग्दैन भनेर सर्वोच्चको फैसलाबाट आइसकेको छ । पार्टीको ह्वीपभन्दा पनि धारा ७६‍.५ अनुसार जुन सर्वोच्चले व्याख्या गरेको छ नि त्यसैको सम्मान गर्दै विश्वासको मत दिएको हो । तनहुँ क्षेत्र नम्बर १ को जनताको सम्मानका लागि दिएको हो ।

तपाईंले मत नदिएको भए पनि प्रधानमन्त्रीलाई बहुमत पुग्थ्यो । दिनैपर्ने अवस्था पनि थिएन नि ?

मेरो भोटले के हुन्छ भन्दा पनि मेरो ब्रह्मले सर्वोच्चको फैसलाको सम्मान गर्नुपर्छ भन्ने देख्यो । मैले दिएर नपुग्ने भएको भए पनि दिन्थेँ ।

सर्वोच्चको सम्मान भनिरहे पनि फ्लोर क्रस गर्नेलाई स्पष्टीकरण सोध्ने पार्टीले निर्णय गरेको छ । यसलाई कसरी लिनुभएको छ ?

सरासर सर्वोच्च अदालतले फैसलामा धारा ५ अन्तर्गत मत दिएमा कसैले कसैलाई कारबाही गर्न पाइँदैन भनेर भनेको छ । हिजो प्रदीप ज्ञवालीले रोस्ट्रममा उभिएर सर्वोच्चको निर्णय मान्छौँ, सर्वोच्चलाई स्वीकार्छौं भन्ने अनि आज बैठक बोलाएर कारबाही गर्छौं भन्नु सर्वोच्चको प्रतिकार भएन र ?

मन्त्री हुन अर्को पक्षमा जानुभयो भन्ने कतिपयको तर्क छ । ओली क्याबिनेटमा पाउनुभएन, देउवाको सरकारमा के छ सम्भावना ?

राजनीति गरेपछि, चुनाव लडेर माननीय भएपछि, राजनीतिमा उत्रिएपछि डम्फु बजाउन कोही आएको होइन नि । तर, मेरो भनाइ के हो भने आफ्नो सरकारको एकल बहुमत हुँदा मैले मन्त्री पाइनँ भनेपछि अहिले पाइन्छ भन्ने कुरा कसरी विश्वास गरूँ ?

भनेको मन्त्री हुने कुरामा सत्यता छैन ?

२५ जनाको मन्त्रिमण्डल हुन्छ, ३२ जना हिजो ह्वीप उल्लंघन गरेका छन् । ३२ जनालाई नै मन्त्री बनाउने ? एक सय ६५ जनाले मत दिएका छन्, सबै मन्त्री हुन्छन् ?

माधव नेपालले नयाँ पार्टी खोल्ने भन्ने चर्चा छ । उता जाने नै हो ?

अन्तिमसम्म पनि मेरो चाहना, मेरो जोडबल पार्टी एकै भएर जाओस् भन्ने छ । तर, पार्टीमा बस्न नदिएर, लाल गद्दार भनेर लखेट्छन् भने को कहाँ–कहाँ गइन्छ त्यही बेला हेरौँला ।

पार्टीमा विवाद आएको लामो समय भइसक्यो । मिल्ने सम्भावना छ त ?

राजनीतिक रूपमा पार्टीमा मभन्दा दिग्गज नेताहरू धेरै हुनुहुन्छ । मभन्दा दुःख गरेकाहरू हुनुहुन्छ । त्यस कारण यसबारे म केही भन्दिनँ । नेताहरूले जान्ने कुरा हो ।

हिजोको घटनापछि केपी ओलीलगायत कोही शीर्ष नेतासँग कुरा भयो ?

मैले विश्वासको मत दिएपछि उहाँहरू कारबाहीको बाटोमा हुनुहुन्छ । त्यसैले उहाँहरूसँग कुरा गर्नुको औचित्य छैन ।

ओली पक्षमा रहनुभएका अरू नेता कोही तपाईंहरूतिर आउनुहुन्छ ?

नेकपा एमालेमा रहेका, त्यहाँ बिच्किएका, दमन भएका साथीहरू धेरै जना आउनुहुन्छ । समय चक्रले देखाउँछ । अहिले नै यो विषयमा धेरै कुरा नगरौँ ।

संसद विघटनपछि पनि केपी ओलीको पक्षमा रहनुभयो । ती कदम सही थिए कि गलत ?

दुई पटक संसद विघटन हुँदा केपी ओलीकै पक्षमा हो, नेकपा एमालेकै पक्षमा हो । जब सर्वोच्च अदालतको फैसला आयो त्यसपछि यसको कदर गर्नुपर्छ, सम्मान गर्नुपर्छ भनेर एकाएक विश्वासको मत दिएको हो । लोकतन्त्र र संघीयता जोगाउन पनि जरुरी थियो हिजोको विश्वासको मत ।

भनेको सर्वोच्चको फैसलापछि म गलत बाटोमा रहेछु भन्ने हो ?

हो, मलाई लाग्यो । तनहुँका जनताले मेरो फेसबुकमा हेर्नुस्, कसैले नराम्रो गरिस् भनेका छैनन् । धन्यवाद र स्याबासी दिएका छन् ।

प्रकाशित मिति: सोमबार, साउन ४, २०७८ १६:३९