कर्मचारीलाई तलब कम भयो, कम्तीमा दोब्बर पार्नुपर्थ्यो : पूर्वप्रशासक

A+ A A-

पूर्वप्रशासकले सरकारी कर्मचारीको तलब कम भएको बताएका छन् । सरकारले आगामी आर्थिक वर्षको बजेटमार्फत कर्मचारीको तलब २० प्रतिशतसम्म बढाए पनि तलब अझै कम भएको उनीहरुको भनाइ छ ।

पूर्व मुख्यसचिब डा. विमल कोइरालाले सरकारी कर्मचारीको तलब दक्षिण एसियामा नै सबैभन्दा कम भएको बताए । तलब कम भएकोले कर्मचारीको उत्पादकत्वमा असर पर्ने डा. कोइरालाको भनाइ छ ।

‘सरकारी कर्मचारीको तलब दक्षिण एसियामा सबैभन्दा कम नेपालमा नै छ । सरकारले दिएको तलबले कर्मचारीको दैनिकी चल्न नै कठिन जस्तो देखिन्छ तर तलब वृद्धि गर्दा त्यसले सिर्जना गर्ने वित्त दायित्व व्यवस्थापन गर्न सक्ने गरी बढाउनुपर्ने अवस्था पनि छ,’ डा. कोइरालाले शिलापत्रसँग भने ।

पूर्वसचिव विमल वाग्लेले पनि सरकारी कर्मचारीको तलब कम भएको बताए । सरकारी कर्मचारीको अहिलेको तलबमा कम्तीमा दुई गुणा वृद्धि आवश्यक रहेको उनको भनाइ छ ।

‘कार्यालय सहयोगीका रुपमा काम गर्ने कर्मचारीको तलब मासिक २१ हजार रुपैयाँको हाराहारीमा पुगेको छ । खरिदारको तलब २६ हजार जति छ । यति तलबले खान लाउन नै पुग्दैन त्यसैले कर्मचारीको तलब अहिलेकोभन्दा दोब्बर बनाउनुपर्छ,’ पूर्वसचिव वाग्लेले भने ।

उनले कर्मचारीको तलब वृद्धिसँगै कर्मचारी कटौती आवश्यक रहेको पनि बताए । अहिले भएका कर्मचारीको संख्या एक तिहाइले घटाउनुपर्ने उनको भनाइ छ ।

‘खल्तीमा भएको मोबाइल सहसचिव आफैंले उठाउँछन् । सरकारले दिएको टेलिफोन उठाउन सुब्बा तहको कर्मचारी किन चाहियो, फ्याक्स गर्न र लिन पनि कर्मचारी राखिएको छ, अहिले यस्ता कर्मचारी किन चाहियो ? माथिल्लो तहमा पनि अनावश्यक पद सिर्जना गरेर दीर्घकालीन दायित्व थप्ने काम अहिले पनि भइरहेको छ, चिया पकाउने कर्मचारी पनि अब चाहिँदैन । तातोपानी राखिदियो भने ‘कमन रुम’मा गएर सहसचिवले आफैं खान सक्छन् त्यसैले कर्मचारी संख्या एक तिहाइ कटौती गर्ने र अहिलेको तलबमा कम्तीमा पनि दोब्बर पार्ने गरी सरकार गएको भए राम्रो हुन्थ्यो,’ पूर्वसचिव वाग्लेले भने ।

निजामती कर्मचारीको आधिकारिक ट्रेड युनियनका महासचिव देवकोटाले सरकारी कर्मचारीको तलब कम भएको बताए । सरकारले अहिले बढाएको तलबले केही राहत भए पनि खान लाउन अझै नपुग्ने उनको भनाइ छ ।

‘यो तलब वृद्धिले केही राहत दिएको मात्रै हो, समस्या समाधान गरेन, खानलाउन पुग्ने तलब दिएर कर्मचारीलाई उत्प्रेरणा दिनुपर्नेमा केही थप्ने काम मात्रै भयो । यो विषयमा सरकारसँग हामी गम्भीर वार्ता गर्छाैं,’ महासचिव देवकोटाले भने ।

प्रकाशित मिति: शुक्रबार, जेठ १७, २०७६ ०४:४५