एमाले दोस्रो तहका नेताहरू भन्छन्- ओली र नेपालको 'अतिवादमा लतारिदैनौँ'

A+ A A-

गत साता राष्ट्रियसभा बैठकमा एमाले उपाध्यक्ष बामदेव गौतमले भनेका थिए, 'एमाले एकताको खुशीको खबर सर्वोच्च अदालतको फैसलापछि सुन्न पाइन्छ ।'

एमाले मिलाउन प्रयासरत कार्यदलका सदस्यहरूले सर्वोच्चको फैसलाअगावै १३ घण्टा लामो बैठकपछि १०बुँदे सहमति पत्र तयार गरे । यसले एमालेको कार्यकर्ता पंक्तिमा एकताको आशा पलाएको थियो । जब २८ असारमा सर्वोच्चको फैसला आयो, नेता गौतमले भनेझैँ एमाले एकताको खबर कार्यकर्ताले सुन्न पाएनन् ।

३० असारमा बालुवाटारबाट बालकोटस्थित निवास पुगेका एमाले अध्यक्ष केपी ओलीले सुनाए, 'म जनताको जनादेशले होइन अदालतको परमादेशले यहाँ आइपुगेको हुँ । यो सबै काम गर्ने मान्छे माधव नेपाल हो । उनलाई माधव नेपाललाई एमालेमा अब कुनै ठाउँ छैन।'

ओलीकाे आक्राेशलगत्तै नेता नेपालले प्रधानमन्त्री शेरबहादुर देउवालाई बोलाएर विश्वासको मत दिने आश्वासन दिए । विश्वासको मत दिन देउवाको आग्रहमा जवाफमा नेता नेपालले भने, 'संसद जोगाउन विश्वास मत दिन सकिन्छ ।'

ओलीको भाषण र नेता नेपालको विश्वासको मत दिने आश्वासन कार्यदलमा सहमति भएको मर्मविपरीत छ । कार्यदलको सहमतिको बुँदा नम्बर १ मा भनिएको छ, 'केही समय यता पार्टीका आन्तरिक अन्तरविरोधहरू पार्टीको दायरभन्दा बाहिर पुगेका छन् । कतिपय सन्दर्भमा कटुतापूर्ण तथा एक-अर्काप्रति निषेधात्मक बन्दै गएका छन् । यस्ता अन्तरविरोधहरूलाई पार्टीभित्रै विधिसम्मत ढंगले हल गर्न सहमत भएका छौँ ।’

अध्यक्ष ओलीले वरिष्ठ नेता नेपाललाई सहमति विपरीत निषेध गर्न खोजेका छन् । यता सहमतिको बुँदा नम्बर ६ मा सर्वोच्चको फैसलापछि त्यसलाई स्वीकार गर्दै आगामी कदम संस्थागत रूपमा निर्णय गरी अघि बढ्ने उल्लेख थियाे । कार्यदलको बुँदा नम्बर ६ मा भनिएको छ, 'प्रतिनिधिसभाको विघटनसम्बन्धी सर्वोच्च अदालतमा विचाराधीन (फैसलाअघि सहमति भएकाले ), मुद्दा र सरकारका सम्बन्धमा पार्टी एकताको मर्म र भावनाका आधारमा विधिसम्मत एवं संस्थागत निर्णय अनुरुप हामी अघि बढ्नेछौँ ।’ नेता नेपालकाे विश्वासको मत दिने आश्वासनले यो सहमति उल्लंघन गरेको देखिन्छ ।

नेता नेपालले विश्वासको मत दिने आश्वासन दिएपछि अध्यक्ष ओलीले संसदीय दलको बैठक बोलाएका छन् । उक्त बैठकमा नेपाल समूहका सांसदलाई पनि निम्ता गरिएकाे छ । शुक्रबार अपराह्न तीन बजे बोलाइएको संसदीय दलको बैठकले प्रतिपक्षी भूमिकाबारे संस्थागत निर्णय गर्ने संसदीय दलका उपनेता सुवास नेम्वाङ बताउँछन् । 'हामीले सर्वोच्चको फैसलापछि सरकारका विषयमा संस्थागत निर्णय गरी अघि बढ्ने सहमति गरेका थियौँ । अब प्रतिपक्षी दल बनेपछि त्यसको भूमिकाबारे निर्णयका लागि सबै सांसदहरूलाई बैठकमा बोलाएका छौँ,' उनले भने ।

एमाले एकताका लागि दुवै पक्षका दोस्रो तहका नेता सहमत छन् । अध्यक्ष ओली र वरिष्ठ नेता नेपालको इगोका कारण एकता प्रक्रियामा असर पुगिरहेको उनीहरूको निष्कर्ष छ । एमाले उपाध्यक्ष अष्टलक्ष्मी शाक्य भन्छिन्, 'एकताको सहमतिपत्र तयार भएपछि दुवै नेताहरू एकताका लागि अघि बढ्नुपर्छ । एकातर्फ सहमति गर्ने अनि पार्टीमा निषेध गर्ने चुनौतीले एकता बिथोल्छ ।'

यस्तै एमाले प्रवक्ता प्रदीपकुमार ज्ञवालीकाे भनाइमा आफ्नो पार्टीको सरकार ढालेर फेरि देउवा नेतृत्वको सरकारलाई विश्वासको मत दिने तयारीले एकता असफल हुन्छ । 'पार्टीको आधिकारिक दृष्टिकोण माधवकुमार नेपालविनाको एमाले होइन । तर, आफ्नो पार्टीको सरकार ढाल्ने गल्ती गरेर फेरि देउवा नेतृत्वको सरकारलाई विश्वासको मत दिने कुराले एकतालाई कसरी बल पुर्‍याउँछ,' उनी भन्छन् ।

अध्यक्ष ओली र नेता नेपाल दुवैको अतिवाद एकताका लागि घातक भएको निष्कर्षमा दुवै पक्षका दोस्रो तहका नेताहरू पुगेका छन् । आ-आफ्नो अडानभन्दा पनि कार्यकर्ताहरूको सामूहिकता बुझेर एकता प्रक्रियामा आउनुपर्ने नेताहरूको सुझाव छ । एमाले सचिव योगेश भट्टराई दुवैले रोजेको बाटो घातक भएको बताउँछन् ।

अध्यक्ष ओली र वरिष्ठ नेता नेपालले आ-आफ्नो अतिवाद त्याग्नुपर्ने उनको मत छ । 'अध्यक्ष ओली र वरिष्ठ नेता नेपाल दुवैको अतिवाद पार्टी एकताका लागि घातक छ ,' भट्टराईले भने, 'उहाँहरू एकतामा आउनु भएन भने आमकार्यकर्ता पंक्ति उहाँहरूसँग अब लतारिँदैन । एमालेको पंक्तिले दुवै नेतालाई छोड्नुपर्ने दुर्भाग्यपूर्ण अवस्था आउँछ । त्यसैले १०बुँदे सहमतिको मर्म अनुसार उहाँहरू अघि बढ्नुपर्छ ।'

एमाले सचिव पृथ्वीसुब्बा गुरुङ पनि दुवै नेताले आ-आफ्नो इगो त्यागेर १०बुँदे सहमतिको पालना गर्दै एकता जोगाउनुपर्ने बताउँछन् । 'एमालेको एकता प्रक्रियामा समस्या भनेको दुई नेताको इगो हो । उहाँहरू दुई जनाबाहेक सबै एमाले एकताको पक्षमा छन् । दुवै नेताले कार्यदलले बुझाएको सहमतिपत्र बुझेकाले त्यसलाई कार्यान्वयन गर्दै अघि बढ्नुपर्छ,' उनले भने ।

अध्यक्ष ओलीलाई सहमति बुझाउन कार्यदलका संयोजक रहेका नेपालनिकट नेता भीम बहादुर रावल बालुवाटार पुगेका थिए । यस्तै, ओली पक्षका संयोजक सुवास नेम्वाङसहितका नेताहरू कोटेश्वर पुगेर वरिष्ठ नेता नेपाललाई सहमतिपत्र बुझाएका थिए । १०बुँदे सहमतिपत्रमा अहिलेसम्म ओली र नेपालले छलफल समेत गरेका छैनन्, यसले पनि एमाले एकतामा जटिलता बढाएको छ ।

प्रकाशित मिति: बिहीबार, असार ३१, २०७८ १८:०२