वैदेशिक व्यापार : भारततर्फ ३७ प्रतिशतले बढ्दा चीनतर्फ १७ प्रतिशतले घट्यो निर्यात

वैदेशिक व्यापार : भारततर्फ ३७ प्रतिशतले बढ्दा चीनतर्फ १७ प्रतिशतले घट्यो निर्यात

A+ A A-

आर्थिक वर्ष २०७७/७८ को ११ महिनामा कुल वस्तु निर्यात ३७ दशमलव ८ प्रतिशतले वृद्धि भई १ खर्ब २१ अर्ब २५ करोड रुपैयाँ पुगेको छ । अघिल्लो वर्षको सोही अवधिमा यस्तो निर्यात ० दशमलव २ प्रतिशतले वृद्धि भएको थियो ।

निर्यात बढेसँगै भारततर्फको व्यापार पनि बढेको छ । गन्तव्यका आधारमा भारत तथा अन्य मुलुकतर्फ क्रमशः ४३.३ प्रतिशत र २५.९ प्रतिशतले निर्यात वृद्धि भएको छ । तर, यसको ठीकविपरीत चीनमा भने नेपालले उत्पादित सामान पठाउन सकेन । यसर्थ २०७८ जेठ मसान्तसम्ममा चीनतर्फको निर्यातमा १७.४ प्रतिशतले कमी आएको छ ।

यसरी नेपालबाट सोयाबिन तेल, अलैँची, धागो (पोलिस्टर तथा अन्य), जुटका सामान, ऊनी गलैँचालगायतका वस्तुको निर्यात बढेको छ भने पाम तेल, दाल, जस्तापाता, तार, चोकरलगायतका वस्तुको निर्यात घटेको छ ।

यो ११ महिनामा कुल वस्तु आयात २५ दशमलव ७ प्रतिशतले वृद्धि भई १३ खर्ब ८३ अर्ब ३६ करोड रुपैयाँ पुगेको छ । अघिल्लो वर्षको सोही अवधिमा यस्तो आयात १५ दशमलव ३ प्रतिशतले घटेको थियो । वस्तु आयात गरिने मुलुकका आधारमा भारत, चीन तथा अन्य मुलुकबाट भएको आयात क्रमशः ३२ दशमलव २ प्रतिशत, २४ दशमलव ० प्रतिशत र ९ दशमलव ९ प्रतिशतले वृद्धि भएको छ ।

वस्तुगत आधारमा यातायातका साधन तथा पार्टपुर्जा, कच्चा सोयाबिन तेल, एमएस बिलेट, चामल, दूरसंचारका उपकरण तथा पार्टपुर्जालगायतका वस्तुको आयात बढेको छ भने हवाईजहाजका पार्टपुर्जा, कच्चा पाम तेल, भिडियो, टेलिभिजन तथा पार्टपुर्जा, कोल्डरोल्ड शिट इन्क्वाइल, चाँदीलगायतका वस्तुको आयात घटेको छ ।

निर्याततर्फ तातोपानी, कञ्चनपुर र रसुवा भन्सार कार्यालयबाहेकका नाकाबाट गरिएको निर्यात वृद्धि भएको छ । आयाततर्फ तातोपानी र रसुवा भन्सार कार्यालयबाहेकका नाकाबाट भएको आयातमा वृद्धि भएको छ ।

यो ११ महिनामा कुल वस्तु व्यापार घाटा २४ दशमलव ६ प्रतिशतले वृद्धि भई १२ खर्ब ६२ अर्ब ११ करोड रुपैयाँ पुगेको छ । अघिल्लो वर्षको सोही अवधिमा यस्तो घाटा १६ दशमलव ४ प्रतिशतले घटेको थियो । समीक्षा अवधिमा निर्यात–आयात अनुपात ८ दशमलव ८ प्रतिशत पुगेको छ । अघिल्लो वर्षको सोही अवधिमा यस्तो अनुपात ८ दशमलव ० प्रतिशत रहेको थियो ।

प्रकाशित मिति: बिहीबार, असार ३१, २०७८ १६:१९