विपक्षी गठबन्धनसँग नेता नेपालको बिदाइ भेट, बदलिँदो परिस्थितिमा सहभागी हुन नसक्ने ब्रिफिङ

विपक्षी गठबन्धनसँग नेता नेपालको बिदाइ भेट, बदलिँदो परिस्थितिमा सहभागी हुन नसक्ने ब्रिफिङ

A+ A A-

नेकपा एमालेका वरिष्ठ नेता माधवकुमार नेपालले विपक्षी गठबन्धनका नेताहरूसँग बिदाइ भेट गरेका छन् । कोटेश्वरस्थित आफ्नै निवासमा विपक्षी गठबन्धनको बैठक राख्दै उनले आफू अब विपक्षी गठबन्धनमा सहभागी हुन नसक्ने जानकारी दिएका हुन् ।

नेता नेपालले बैठकमा संविधान, लोकतान्त्रिक गणतन्त्रको सुदृढीकरणका लागि राजनीतिक सहकार्य गर्न तयार रहे पनि विपक्षी गठबन्धनमा नरहने स्पस्ट पारेका हुन् ।

'संविधान लोकतान्त्रिक गणतन्त्र र व्यवस्थाको सुदृढीकरणका लागि राजनीतिक सहकार्य गर्न तयार रहे पनि बदलिँदो परिस्थितिका कारण विपक्षी गठबन्धनमा सँगै रहन सकिँदैन,' नेता नेपालको भनाइ उद्धृत् गर्दै बैठकमा सहभागी नेता रघुजी पन्तले भने ।

नेता नेपालले आइतबार राति पार्टी एकताका लागि गठित कार्यदलले तयार पारेको सहमतिपत्रका आधारमा एकता प्रक्रिया टुंगिन लागेकाले त्यसलाई बुझिदिन आग्रह गरेका थिए ।

'हाम्रो पार्टीको एकता प्रक्रिया टुंगिन लागेको छ । त्यसलाई बुझिदिन म आग्रह गर्दछु । परिवर्तित समयमा विपक्षी गठबन्धनमा रहेर विगतमा झैँ सहकार्य नभए पनि राजनीतिक एजेण्डामा हामीसँगै रहनेछौँ,' नेता नेपालको भनाइ थियो ।

बैठकमा माओवादी केन्द्रका अध्यक्ष पुष्पकमल दाहाल 'प्रचण्ड'ले नेता नेपाललाई हालसम्मको सहकार्यका लागि धन्यवाद व्यक्त गर्दै एमाले एकीकरण सुखद नै रहेको बताएका थिए ।

'कुनै पनि पार्टी फुट्नु राम्रो कुरा पक्कै होइन । तपाईंहरू मिल्न लाग्नुभएको कुरा सुखद नै हो । तपाईंको संलग्नतासहितको एमालेलाई अझै सुदृढ बनाउनुस्,' प्रचण्डको भनाइ उद्धृत् गर्दै बैठकमा सहभागी नेताले भने ।

बैठकमा कांग्रेस सभापति शेरबहादुर देउवाले संविधान र लोकतन्त्रको पक्षको लडाइँमा दिइएको साथप्रति आभार प्रकट गरेका थिए ।

'माधवजीले संविधान र लोकतन्त्रको रक्षाका लागि हामीलाई दिएको साथप्रति म आभारी छु । आगामी दिनमा समेत सँगसँगै सहकार्य गरेर अघि बढौँ,' देउवाको प्रस्ताव थियो ।

नेता नेपालले प्रधानमन्त्रीमा नियुक्त हुन लागेका देउवालाई सबैलाई समेटेर अघि बढ्न आग्रहसमेत गरेका छन् ।

'जनतालाई खोप ल्याउनुस् । सबै पक्षलाई समेटेर अघि बढ्नुस् मेरो तपाईंलाई शुभकामना छ । हाम्रो सहकार्य विपक्षी गठबन्धनबाट मात्रै नहुने हो । संविधान र लोकतन्त्रको रक्षाका मुद्दामा हामी सधैँ सँगै हुनेछौँ,' नेता नेपालले भनेका थिए ।

नेता नेपालनिकट सांसदहरूको समेत कारण नै प्रधानमन्त्रीमा देउवालाई नियुक्त गर्न परमादेशको मागसहित सर्वोच्चमा रिट दायर भएको थियो । त्यस रिटमा सुनुवाइ गर्दै सर्वोच्चले दुई दिनभित्र देउवालाई प्रधानमन्त्रीमा नियुक्त गर्न सोमबार परमादेश दिएको हो । सर्वोच्चको आदेशअनुसार मंगलबार अपराह्न ५ बजेभित्र देउवालाई प्रधानमन्त्रीमा नियुक्त गरिसक्नुपर्नेछ ।

संविधानको धारा ७६ को उपधारा ५ अनुसार प्रधानमन्त्रीमा नियुक्त हुन लागेका देउवाले प्रतिनिधिसभामा ३० दिनभित्र विश्वासको मत लिनुपर्नेछ । यसअघि प्रधानमन्त्री बन्न सहयोग गरेका नेता नेपालनिकट सांसदहरूले देउवालाई विश्वासको मत नदिने स्थिति अब प्रस्ट भएको छ ।

'हामी अब विपक्षी गठबन्धनमा सहभागी हुनेछैनौँ । देउवा नेतृत्वको सरकारलाई राष्ट्रिय सहमतिको सरकार बनाउने प्रयत्न गर्ने विषयमा छलफल भएको छ । त्यस सरकारमा जाने वा नजाने भन्ने निर्णय पार्टीको स्थायी र केन्द्रीय कमिटी बैठकमार्फत हुनेछ,' नेता पन्तले भने ।

देउवाले विश्वासको मत प्राप्त गर्न नसकेमा प्रतिनिधिसभा संविधानको धारा ७६ को उपधारा ७ अनुसार फेरि विघटन हुनेछ । त्यसपछि देउवाले चुनावी सरकारको नेतृत्व गर्नेछन् ।

विपक्षी गठबन्धनको सोमबारको छलफलमा चुनाव गराउने वातावरण निर्माणका लागि पनि दलहरूबीच सहमति खोज्ने प्रयत्न गरिने छलफल भएको नेता देव गुरुङले बताए ।

'अब यो सरकारले डेढ वर्षपछि भए पनि, त्यसअघि भए पनि चुनाव त गराउनैपर्छ । सबैको सहमतिमा चुनाव गराउने वातावरण निर्माण गर्ने सन्दर्भमा पनि बैठकमा छलफल भएको छ,' नेता गुरुङले भने ।

विपक्षी गठबन्धनमा नेता नेपालको साथ र समर्थनकै कारण यसले परिणाम निकाल्न सकेको थियो । प्रधानमन्त्री ओलीविरुद्ध विपक्षी गठबन्धन बलियो हुनुमा नेता नेपालको भूमिका महत्त्वपूर्ण रहेकोले सबैले उनलाई बैठकमा धन्यवाद दिएको जसपाका नेता राजेन्द्र श्रेष्ठले बताए ।

कर्णालीमा माओवादी केन्द्रको सरकार जोगाउनेदेखि, सुदूरपश्चिम प्रदेशमा एमालेको सरकार गठनको प्रयास विपक्षी गठबन्धनकै कारण रोकिएको थियो ।

यता, गण्डकीमा पनि विपक्षी गठबन्धनकै कारण मुख्यमन्त्री रहेका पृथ्वीसुब्बा गुरुङको पद गुमेको थियो । राष्ट्रियसभा सदस्यका लागि बागमती र लुम्बिनीमा भएको निर्वाचनमा पनि ओली पक्षका नेताहरू पराजित भएका थिए ।

प्रकाशित मिति: सोमबार, असार २८, २०७८ २०:०१