सुर्खेतमा महामन्त्री खड्का र थानीबीच प्रतिष्ठाको लडाइँ, को बन्ला सभापति ?

A+ A A-

कांग्रेसको महाधिवेशन नजिकिँदै गर्दा महामन्त्री पूर्णबहादुर खड्काको गृहजिल्ला सुर्खेतमा जिल्ला अधिवेशनको सरगर्मी बढेको छ । महामन्त्री खड्का र केन्द्रीय सदस्य हृदयराम थानीबीच कडा प्रतिपस्पर्धा हुने देखिएको छ ।

केन्द्रीय सदस्य थानी पौडेल पक्षधर हुन् भने खड्का देउवा पक्षका हुन् । कतिपयले यसलाई प्रतिष्ठाको लडाइँका रूपमा हेरेका छन् ।

गत अधिवेशनमा थानी पक्षका कमलराज रेग्मी र खड्का पक्षका यज्ञबहादुर बुढाक्षेत्रीबीच कडा प्रतिस्पर्धा भएको थियो । बुढाक्षेत्रीलाई तीन मतले पराजित गर्दै रेग्मी विजयी भएका थिए । बुढाक्षेत्री हाल कर्णाली प्रदेश सरकारका सामाजिक विकासमन्त्री छन् ।

वहालवाला जिल्ला सभापति रेग्मी पुन: प्रतिस्पर्धाको तयारीमा छन् । खड्का पक्ष पनि बुढाक्षेत्रीलाई मैदानमा उतार्ने तयारीमा छ । दुबै सभापतिका बलिया उम्मेदवार हुन् ।

खड्का प्यानलबाट सभापतिमा अरुले पनि आकांक्षा देखाएका छन् । खड्का पक्षका कालिप्रसाद शाक्य, टोपबहादुर रावत, श्याम भारती, गोविन्द कोइरालालगायतका नेताहरूले पनि सभापतिमा दाबी गरेका छन् ।

त्यस्तै वीरेन्द्रनगर नगरपालिकाका प्रमुख देवकुमार सुवेदीले पनि सभापतिमा उम्मेदवारी दिने तयारी गरेका छन् । सुवेदी अहिले कुनै समूहमा खुलेका छैनन् ।

सुर्खेतमा तप्तबहादुर विष्टको प्यानल पनि छ । विष्टको निधनपछि उनको पक्षका नेता तथा कार्यकर्ताहरू खड्का पक्षमा लागेका छन् । जसका कारण सुर्खेतमा खड्का पक्ष बलियो देखिएको छ । तर, थानी पनि कमजोर नभएको कांग्रेसका नेताहरू बताउँछन् ।

प्रकाशित मिति: सोमबार, असार २८, २०७८ १०:११