स्टार्टअप व्यवसाय गर्दै हुनुहुन्छ ? यसरी लिनुस् १ प्रतिशत ब्याजमा २५ लाख ऋण

A+ A A-

'स्टार्टअप' त सुरु गरियो तर, बढाउन थप लगानी कहाँबाट जुटाउने ? सुरु मात्र गरेर नहुने रहेछ । थप सेवा विस्तार गर्न पाए स्टार्टअपमा राम्रै भविष्य बनाउन सकिन्थ्यो । पैसा नभएर अगाडि लैजान सकिँदैन कि भन्ने सोचिरहनु भएको छ भने तपाईंका लागि लाभदायक हुन सक्छ, यो सूचना ।

सरकारले आर्थिक वर्ष २०७८/७९ को बजेटमा स्टार्टअप गर्न चाहने र गर्दै गरेका व्यवसायीलाई एक प्रतिशत ब्याजदरमा २५ लाख रुपैयाँसम्म ऋण दिने घोषणा गरेको छ । सोही व्यवस्थाबमोजिम अर्थ मन्त्रालयले स्टार्टअप कार्यविधि बनाएको छ । जसले चालु आर्थिक वर्षको बजेटमा उल्लेख भएअनुसार नै सरल कर्जा सेवा कार्यन्वयनमा ल्याउने छ ।

मन्त्रालयले स्टार्टअप व्यवसायलाई कर्जा प्रवाह गर्ने सम्बन्धी कार्यविधि, २०७८ बनाएसँगै अब स्टार्टअप व्यवसायीले १ प्रतिशत ब्याजदरमा ऋण लिन सक्नेछन् ।

यसरी ऋण लिन चाहने स्टार्टअपले कार्यविधिमा उल्लेख भएअनुसारका मापदण्ड भने पूरा गरेको हुनु पर्छ ।

कार्यविधिअनुसार कृषि तथा पशुपन्छीमा आधारित उद्यम, वन (जडीबुटी, वन पैदावार) मा आधारित उद्यम, पर्यटन प्रवर्द्धन तथा मनोरञ्जन र अतिथि सत्कारसँग सम्बन्धित उद्यम, वैकल्पिक ऊर्जा उत्पादन तथा वितरणसँग सम्बन्धित उद्यम, विज्ञान, सूचना प्रविधि तथा सञ्चारमा आधारित उद्यम, स्वास्थ्य सेवासँग सम्बन्धित उद्यम, शिक्षा तथा शिक्षण सिकाइसँग सम्बन्धित उद्यम (परामर्शदाता, ट्युसन सेन्टर, कोचिङ क्लास, भाषा सिकाइबाहेक), घरायसी वा दैनिक जीवनयापनलाई सरल, सहज, सुरक्षित बनाउन सहयोग पुग्ने उद्यम, वातावरण संरक्षण तथा फोहोरमैलाको व्यावसायिक व्यवस्थापनसँग सम्बन्धित उद्यम, सहज र सुरक्षित यातायात तथा पारवहन सेवासँग सम्बन्धित उद्यम, विपद् जोखिम न्यूनीकरण तथा व्यवस्थापनसँग सम्बन्धित उद्यम, निर्माण कार्यसँग सम्बन्धित उद्यम, अटोमोबाइलसँग सम्बन्धित उद्यम (मर्मत सम्भारबाहेक), परम्परागत प्रविधि वा उत्पादन प्रक्रियाको सुधारसँग सम्बन्धित उद्यम गर्ने स्टार्टअपले कर्जा पाउने छन् ।

यसका लागि वस्तु उत्पादन वा सेवा प्रवाहमा नवीन ज्ञान, सोच, सीप वा प्रविधिको प्रयोग भएको, मौजुदा उत्पादन प्रणालीमा सुधार गरी आधुनिक प्रणालीको माध्यमबाट उत्पादन हुने वा भएको, छोटो समयमा नै द्रूततर स्तरबृद्धि गर्न सक्ने सम्भावना भएको, गत आर्थिक वर्षको कुल खर्चमध्ये कम्तीमा दश प्रतिशत अंश अनुसन्धान, बजारीकरण वा वस्तु तथा सेवा विकासका लागि खर्च गरेको, कर्जा प्राप्तिको लागि आवेदन गर्ने रकमको न्यूनतम १० प्रतिशत चुक्ता पुँजी रहेको र पूर्णकालीन कामदारको सख्या २० भन्दा बढी नभएको हुनु पर्ने छ ।

यी मापदण्ड पूरा भएको छ भने स्टार्टअप व्यवसाय गर्नेले १ प्रतिशत व्याजदरमा २५ लाख कर्जा लिन सक्ने छन् ।

स्टार्टअप व्यवसायलाई कर्जा प्रवाह गर्ने सम्बन्धी कार्यविधी २०७८