प्रदेश १ को बजेटमा सत्ता पक्षका सांसदको टिप्पणी- क्या तास फिट्यौ, सबै जोकर परे

प्रदेश १ को बजेटमा सत्ता पक्षका सांसदको टिप्पणी- क्या तास फिट्यौ, सबै जोकर परे

A+ A A-

प्रदेश १ सरकारले प्रदेशसभामा प्रस्तुत गरेको विनियोजन विधेयकमाथिको छलफल जारी छ । प्रदेशसभाको बिहीबारको बैठकमा पर्यटन क्षेत्रको विकासका लागि विनियोजन गरेको बजेटको विषयमा छलफल भएको थियो ।

छलफलमा सत्तापक्षकै सांसदहरूले सरकारको आलोचना गरे । एमाले सांसद बिमल कार्कीले मन्त्रीलाई जोकर बन्न सक्ने भन्दै सचेत गराए । सरकारले राजनेता पार्कको बतासे योजनाअगाडि सारेको उनको टिप्पणी थियो ।

‘राजनेता पार्क सरकारको बतासे योजना हो, राजनेता को हो ? कस्तो राजनेताका कुरा गरेको हो ?’ कार्कीले भने, ‘यस्तो कामले नेतालाई सम्मान गर्नेभन्दा बद्नाम गर्नेतिर नै योगदान पुग्ने भएकोले यस्ता बतासे योजनाहरू नबनाइयोस् र स्पष्ट हुने गरी योजना बनुन् ।’

कार्कीले वन क्षेत्रमा शिकारी नियन्त्रण गर्ने योजना नबनेको टिप्पणी गरे । ‘क्या तास फिट्यौ सबै जोकर परे भनेजस्तै तास फिटेर मात्र हुन्न सिक्वेन्स मिल्नु पर्छ,’ उनले भने, ‘सिक्वेन्स मिलेन भने फेरि मन्त्री भएर आउन सक्नुहुन्न, आफैँ जोकर बन्नु होला ।’

एमालेकै अर्का सांसद सर्वध्वज साँवाले समर्थन पनि गर्न नसक्ने र विरोध पनि गर्न नसक्ने खालको बजेट भएको टिप्पणी गरे । ‘नबोलौँ त भित्रभित्रै ग्याँस्टिक बन्ने डर ! बोलौँ भने आयो पो त भनी टिकटक बन्ने डर !’ उनले भने ।

अर्का एमाले सांसद लछुमन तिवारीले उद्योगको दर्ता र खारेजी गर्नेबाहेक कुनै ठोस योजना नल्याएको टिप्पणी गरे ।

धनकुटाका सांसद निरन राईले सरकारले नै डीपीआर गायब बनाइदिएको आरोप लगाए ।

सांसद खिनु लङ्वा लिम्बूले पर्यटन विकासको कार्यक्रम र योजनामा बजेट विनियोजन असमान, विभेदपूर्ण र पूर्वाग्रही ढंगबाट गरिएको भन्दै सच्याउन माग गरिन् ।

माओवादी सांसद कूलप्रसाद साम्बाले मन्त्री र राज्यमन्त्रीले पर्यटन क्षेत्रको बजेट दुई-तीन जिल्लामा केन्द्रित गरेको तथा सानाभन्दा साना योजनामा बजेट राखेर सम्भावना भएका क्षेत्रलाई बेवास्ता गरेको टिप्पणी गरे ।

मन्त्रीको क्षेत्रमा ७/८ करोड बजेट डीपीआरका लागि राखेर भ्रष्टाचारको प्रयास गरेको उनको भनाइ थियो । ‘७ करोड ८ करोडको डीपीआर भनेको के हो ? के गर्नलाई डीपीआर गर्ने ?’ उनले भने, ‘मन्त्रीले खर्च जुटाउने मेलो मात्रै गरेको हो कि ? होइन भने आफ्नो मात्रै क्षेत्रमा के को डीपीआर ?’

जनता समाजवादी पार्टीका संसदीय दलका नेता जयराम यादवले झापा, मोरङ सुनसरीका तल्लो क्षेत्रमा पर्यटन विकासका लागि सरकारले कुनै योजना नबनाएको बताए । उनले बजेट विनियोजन नगरेकोमा असन्तुष्टि जनाउँदै पहिलो पटक प्रदेश सरकारले राजा विराटको दरवारको पूर्वाधार विकास गर्न विनियोजन गरेको १५ लाख रुपैयाँ फिर्ता लैजान आग्रह गरे ।

मन्त्रीको प्रष्टोक्ति : पहुँचका आधारमा बजेट विनियोजन गरिएको छैन

प्रदेश सरकारका उद्योग, पर्यटन, वन तथा वातावरणमन्त्री जगदिशप्रसाद कुसियैतले पर्यटन क्षेत्रको बजेट पार्टी, गुट र पहुँचका आधारमा विनियोजन नगरिएको दाबी गरे ।

सांसदहरूले उठाएको प्रश्नको जवाफ दिँदै मन्त्री कुसियैतले प्रभावका आधारमा बजेट विनियोजन र योजना काट्ने काम गरेको भन्ने आरोपमा सत्यता नरहेको बताए । चालु वर्षको बजेट झण्डै आधा कटौती गर्नु परेको र आगामी वर्षको सिलिङ पनि घटेर आएका कारण थुप्रै महत्वपूर्ण योजना पछि सार्न बाध्य भएको उनको भनाइ थियो ।

कतिपय महत्वपूर्ण योजनामा विनियोजन नभए पनि रकमान्तर गरेर त्यस्ता योजनालाई अगाडि बढाउने सोचले तथा एकमुष्ट शीर्षकबाट खर्च गर्न सक्ने गरी सरकारले विनियोजन गरेको उनको भनाइ थियो ।

उनले विराट राजाको दरबार क्षेत्रको डीपीआर नभएकोले आवश्यक बजेट विनियोजन गर्न नसकेको, रवी राँकेको बजेट आन्तरिक कारणले राख्न नसकिए पनि मन्त्रालयले खर्च गर्न सक्ने गरी राखिएको एकमुष्ट बजेट मार्फत काम जारी राख्न सकिने बताए ।

प्रकाशित मिति: शुक्रबार, असार २५, २०७८ ०७:२४