२३ दिनदेखिको आन्दोलनले बीपी प्रतिष्ठान अस्तव्यस्त, सरकारले देखाएन चासो

A+ A A-

धरानस्थित बीपी कोइराला स्वास्थ्य विज्ञान प्रतिष्ठान सुधारको माग राख्दै संघर्ष समितिले थालेको आन्दोलन २३ औँ दिनसम्म आइपुग्दा पनि सम्बोधन हुने कुनै संकेत देखिएको छैन । आन्दोलनप्रति सरकारले चासो नदेखाउँदा प्रतिष्ठान अस्तव्यस्त बनेको छ ।

प्रतिष्ठान सुधार र बेथिति अन्त्यका लागि चिकित्सक, नर्स, कर्मचारी र विद्यार्थीले झण्डै २४ महिना अघिदेखि नै सरकार र प्रतिष्ठानका पदाधिकारीलाई ध्यानाकर्षण गराउँदै आए पनि सुनुवाइ नभएपछि उनीहरूले १ असारदेखि चरणवद्ध आन्दोलन थालेका हुन् ।

उनीहरूले यतिबेला दैनिक दुई घण्टा प्रतिष्ठानमा धर्ना दिँदै आएका छन् । संयुक्त संघर्ष समितिले पदाधिकारीहरूको कार्यकक्षमा तालाबन्दीसमेत गरे पनि आफूहरूका माग पूरा गर्नेतर्फ सरकारले चासो नदेखाएको उनीहरूको गुनासो छन् ।

गत १५ असारमा प्रतिष्ठानका पदाधिकारी र आन्दोलनरत पक्ष वार्तामा बसेका थिए । तर, सो दिन उपकुलपति डा. ज्ञानेन्द्र गिरी मदिरा पिएर आएपछि वार्ता भाँडिएको थियो । त्यसपछि सरकारलाई सातदिने अल्टिमेटम दिँदै संघर्ष समितिले चारै जना पदाधिकारीको कार्यकक्षमा तालाबन्दी गरेका थिए । सो अल्टिमेटम मंगलबार नै सकिएको छ ।

तर, पनि सरकारले माग सम्बोधन गर्ने संकेत नगरेपछि उनीहरू थप आन्दोलित बनेका छन् । आन्दोलन लम्बिदै जाँदा मंगलबार वार्ताको वातावरण बनाउन स्वास्थ्य मन्त्रालयको टोली आएको थियो । वार्ताको वातावरण बनाउन आएको स्वास्थ्य मन्त्रालयका प्रतिनिधि वार्ता नै नगराई काठमाडौं फर्किसकेका छन् ।

प्रतिष्ठानमा वार्ता सुरु गराउन समन्वयकारी भूमिकाका लागि मन्त्रालयबाट डा. रोशन पोखरेल र डा. मदन उपाध्याय आएका थिए । दुवैले आन्दोलनकारी र पदाधिकारीसँग छुट्टाछुट्टै छलफल गरेका थिए ।

वार्ता गराउन नसके पनि उनीहरूले प्रतिष्ठानको वर्तमान परिस्थितिबारे एक रिपोर्ट तयार गरेर प्रधानमन्त्री कार्यालय र मन्त्रालयमा बुझाउने बताए । आन्दोलनरत संयुक्त संघर्ष समितिले वार्ता गर्न अस्वीकार गरेको थियो ।

संयुक्त संघर्ष समितिका सह–संयोजक डा. विष्णु पोखरेलले मन्त्रालयबाट आएको टोली कुनै आधिकारिक नभएको दाबी गरे । ‘टोली कुनै आधिकारिक होइन, उहाँहरूले कुनै पत्र देखाउनु पनि भएन’ उनले भने, ‘त्यसैले यथार्थ बुझ्न मात्रै आउनुभएको हो ।’

संयुक्त संघर्ष समितिका संयोजक एसपी रिमालले मन्त्रालयको टोली समन्वयका लागि मात्र आएकाले सोहीअनुसार आफूहरूले सामान्य छलफल गरेको बताए । ‘समस्या समाधान गरेर मिलाउनुपर्छ, प्रतिष्ठान देश र जनताका लागि हो भनेर कोही पनि आउँछ भने हामी छलफल गर्नलाई २४ घण्टा नै रेडी छौँ’ उनले भने, ‘अधिकार सम्पन्न र उच्चस्तरीय यो समाधान गर्न सकिँदैन भन्ने कुराको अनुभूति उहाँहरू आफैँले गर्नुभयो । त्यहीअनुसार हामीले उहाँहरूसँग कुरा गर्‍यौँ ।’

उनले आफूहरूले ७ दिनको अल्टिमेटम दिएको समयावधिभित्र पनि मागलाई सम्बोधन गर्न नसक्नु दुर्भाग्य भएको बताउँदै पठनपाठन र बिरामीको उपचारमा कुनै समस्या नहुनेगरी विरोधका अन्य कार्यक्रमहरू घोषणा गरिने बताए ।

‘प्रोफेसर लेभलका मान्छे, सम्पूर्ण स्वास्थ्यकर्मीले यसरी २३ दिनसम्म आन्दोलन गर्दा पनि एड्रेस हुन नसक्नु, १५ गतेको घटनाको छानबिन नहुनु गैरजिम्मेवारीपूर्ण कार्य हो’ उनले भने, ‘यत्ति हुँदाहुँदै पनि हामीले जिम्मेवारी बिर्सेका छैनौँ, कम्तिमा बिरामी हेर्ने र पढाउने बेलामा हामीले कुनै पनि अवरोध गर्दैनौँ । त्यो हाम्रो नैतिकताले दिँदैनौँ । आउने दिनमा विरोधका अन्य कार्यक्रम घोषणा गर्छौँ ।’

उनले करिब ५ महिनाअघि आफूहरूले उठाएका सवालमा सम्झौता गरे पनि प्रतिष्ठानका पदाधिकारीले कार्यान्वन नगरेको बताए । प्रतिष्ठानको बेथितिविरुद्ध गत १ असारदेखि विभिन्न १२ बुँदे माग राख्दै प्रतिष्ठानमा कार्यरत चिकित्सक, कर्मचारी र विद्यार्थी आन्दोलित हुँदै आएका छन् ।

प्रकाशित मिति: बुधबार, असार २३, २०७८ २०:२०