प्रदेश १ प्रदेशसभा बैठक : कोरोनाले बन्द शैक्षिक संस्था खोल्न सांसदहरूको माग

प्रदेश १ प्रदेशसभा बैठक : कोरोनाले बन्द शैक्षिक संस्था खोल्न सांसदहरूको माग

A+ A A-

प्रदेश- १ को प्रदेशसभा बैठकमा सांसदले कोरोना महामारीका कारण बन्द रहेका शैक्षिक संस्थाहरू सञ्चालनमा ल्याउनुपर्नेमा जोड दिएका छन् ।

बुधबार बजेट अधिवेशनको १९औँ बैठकको शून्य समयमा बोल्दै सांसद सरिता थापाले शैक्षिक संस्था सञ्चालन हुनुपर्नेमा जोड दिइन् । उनले कोरोना महामारीका कारण बन्द रहेका शैक्षिक संस्था पुनः सञ्चालन ल्याउन सरकारलाई सुझाव दिइन् ।

शहरी र सुविधा सम्पन्न भेगका विद्यार्थीले अनलाइन कक्षामार्फत पठनपाठन गरिरहेको भए पनि दुर्गम क्षेत्रका विद्यार्थी शिक्षण सिकाइबाट बञ्चित हुँदै गएको उनको भनाइ थियो । यसले दुईखाले जनशक्ति उत्पादनको जोखिम बढ्दै गएको भन्दै उनले सरकारको ध्यानाकर्षणसमेत गराइन् ।

बैठकको शून्य समयमा बोल्दै प्रदेशसभा सदस्य खिनु लङ्वा लिम्बूले अब १८ वर्षमाथिका देशका चलायमान जनशक्तिबाट कोरोनाविरुद्धको खोप लगाउने कार्यको सुरुवात गर्न सरकारसमक्ष आग्रह गरिन् ।

उनले विद्यालय तथा क्याम्पसका विद्यार्थी, शिक्षक र कर्मचारी, राष्ट्रसेवक सुरक्षाकर्मी, उद्योगी तथा व्यापारी, मजदुर तथा श्रमिक, स्वास्थ्यकर्मी, निजी तथा सार्वजनिक सवारी चालक, स्वयंसेविका, पत्रकार र विभिन्न संघसंस्थाका खटिएका व्यक्तिका लागि पनि खोपको पर्याप्त व्यवस्था गर्नुपर्ने भन्दै सरकारको ध्यानाकर्षण गरिन् ।

उनीले जनजीवन सामान्य बनाउँदै विद्यालय तथा क्याम्पस पुनः सञ्चालनको व्यवस्था मिलाउनुपर्ने विषयमा पनि जोड दिइन् ।

त्यस्तै, सांसद सीतादेवी थेबे जवेगुले पहाडी क्षेत्रका जिल्लामा प्राविधिक दक्ष जनशक्ति उत्पादनका निम्ति सरकारको बहु–प्राविधिक विश्वविद्यालय सञ्चालन योजना पनि अन्यौल भएको बताइन् ।

आर्थिक वर्ष २०७७/०७८ को निति तथा कार्यक्रममार्फत सरकारले पहाडी तथा हिमाली क्षेत्रका पाँचवटा जिल्लामा विश्वविद्यालय सञ्चालन गर्ने निर्णय गरे पनि पाँचथरको सन्दर्भमा आवश्यक मापदण्ड पूरा हुँदाहुँदै पनि त्यो योजनाले सार्थकता पाउन नसकेको बताइन् ।

प्रकाशित मिति: बुधबार, असार २३, २०७८ १५:०१