दैनिक १९ अर्ब पुगेको शेयर कारोबार ४ अर्बमा सीमित, यस कारण घट्दै छन् लगानीकर्ता

दैनिक १९ अर्ब पुगेको शेयर कारोबार ४ अर्बमा सीमित, यस कारण घट्दै छन् लगानीकर्ता

A+ A A-

पछिल्लो समय शेयरबजारमा दैनिक शेयर किनबेच गर्ने लगानीकर्ताको उपस्थिति पातलिँदै गएको छ । यसअघि १९ अर्बको हाराहारीमा दैनिक कारोबार भइरहेको शेयरबजार अहिले दैनिक ४ अर्बको हाराहारीमा सीमित हुन पुगेको छ । यसको मुख्य कारण शेयरबजारमा लगानीकर्ताको आकर्षण घट्नु नै हो । त्यसैले पनि अहिले शेयर बजारमा लगानीकर्ता खासै सक्रिय देखिएका छैनन् ।

नेप्सेको गिरावटले अहिले दुई थरीका आशंकाहरू बजारमा भेटिन थालेका छन् । एकथरी बजार अब बियरिस् ट्रेण्डमा जान्छ भनेर शेयरको पैैसा अन्तै डाइर्भट गर्नुपर्छ भन्ने र अर्का थरी असार मसान्त नजिकिँदै गर्दा लगानीकर्ता पर्ख र हेरको अवस्थामा बस्नाले कारोबारसहित नेप्से संकुचित बन्न पुगेको अड्कलबाजी गर्नेहरू पनि छन् ।

यति बेला शेयर विश्लेषकहरूले कुल कारोबार रकम ह्वात्तै घट्नुलाई सामान्य रूपमा नै लिँदै आएका छन् । शेयर विश्लेषक प्रकाश तिवारी १९ अर्बको शेयर कारोबार भए पनि त्यो हौसिएर भएकोे कारोबार भनेर बुझ्छन् ।

उनी भन्छन्, ‘सामान्यतया नेपालको पुँजीबजारको कारोबार औसतमा ५ देखि १० अर्बको मात्र हो । १९ अर्ब पुग्नुको कारण कोभिड पनि हो, कोभिडमा पैसा सबै शेयरमै थुुप्रियो । यसले कारोबार बढाएको हो ।उनले कारोबार घट्दैमा बजार घट्नुपर्ने कुनै कारण नहुने तर्क गर्छन् ।

शेयरबजारमा सबैभन्दा अहम् भूमिका भने लगानीकर्ताको मनोविज्ञानको हुन्छ । अहिलेको बजारमा कारोबार घट्नुको पछाडि पनि लगानीकर्ताको मनोविज्ञानको नै प्रभाव मान्न सकिन्छ । जस्तो शेयरबजार निरन्तर बढेको समय अर्थात् पिक समयमा लगानीकर्ता उत्साहित हुन्छन् ।

अझ भनौँ, बजार बढ्नेमा ढुक्क भएर लगानी गर्ने हुँदा नेप्से इन्डेक्ससँगै कारोबार पनि बढ्ने गर्छ । र, यो फर्मुला बजार घट्दा पनि लागू हुन्छ । अहिलेको परिवेशलाई नै हेर्ने हो भने पनि अहिले लगानीकर्तामा बजार बियरिस् ट्रेण्डमा लाग्यो, कमाउनुपर्नेले कमाइसके । अब बढे पनि खासै कमाइँदैनजस्तो मनोविज्ञान हावी भएको छ । जसले लगानीकर्ताले थप लगानी शेयरबजारमा गर्न सकेका छैनन् । यसले पनि बजारमा किनबेच घट्न पुग्यो ।

शेयरबजार विश्लेषक तिवारी लगानीकर्ताको मनोविज्ञानले नै पुँजीबजारको गति निर्धारण गर्ने बताउँछन् । उनी भन्छन्, ‘लगानीकर्ताको साइकोलोजी ब्रेक आउट भएको हो । अरु केही होइन ।’

नेपाल इन्भेस्टर फोरमका अध्यक्ष छोटेलाल रौनियार पनि कारोबार घट्नुलाई आश्चर्य मान्नुपर्ने कुनै कारण नभएको तर्क गर्छन् । उनी भन्छन्, ‘शेयर घट्ने बढ्ने त यसको विशेषता नै हो । यसमा घट्दा किनबेच पनि घट्छ । कतिपय अवस्थामा लगानीकर्ता बेच्ने र किन्ने समय कुर्ने गर्छन् । यसो हुँदा बजारमा कारोबार सर्लक्कै घट्छ ।’

प्रकाशित मिति: मंगलबार, असार २२, २०७८ १४:४४