अन्तर्राष्ट्रिय पर्यटक भित्र्याउन डिजिटल मार्केटिङमा जोड दिन सरकारलाई व्यवसायीको आग्रह

अन्तर्राष्ट्रिय पर्यटक भित्र्याउन डिजिटल मार्केटिङमा जोड दिन सरकारलाई व्यवसायीको आग्रह

A+ A A-

कोभिड महामारीले ध्वस्त भएको पर्यटन क्षेत्रलाई लयमा ल्याउन नयाँ शैली अपनाउन व्यवसायीले सरकारलाई आग्रह गरेका छन् । उनीहरूले पर्यटन पुनरुत्थानका लागि सरकारले डिजिटल मार्केटिङमा विशेष जोड दिन आग्रह गरेका हुन् ।

यातायात खुले पनि तत्काल अन्तर्राष्ट्रिय पर्यटक नआउने हुँदा अहिलेबाटै डिजिटल मार्केटिङलाई तीव्रता दिनुपर्नेमा उनीहरूको जोड छ ।

अन्तर्राष्ट्रिय पर्यटकहरू आउने सम्भावना कम रहेकाले भोलिको तयारीस्वरुप डिजिटल मार्केटिङलाई जोड दिन आग्रह गरेका हुन् ।

आव २०७८/७९ को बजेटका सन्दर्भमा बोर्डले आयोजना गरेको भर्चुअल अन्तर्क्रियामा व्यवसायीहरूले बाह्य क्षेत्रमा नेपालको पर्यटकीय गतिविधिबारे जानकारी गराइराख्नुपर्ने बताएका हुन् । लामो समय बन्द अवस्थामा रहेको पर्यटनक्षेत्रलाई अब वैकल्पिक बाटो प्रयोग गरेर भए पनि सञ्चालनमा ल्याउन पहल गर्नुपर्ने व्यवसायीको भनाइ छ ।

आन्तरिक पर्यटकको संख्या बढ्नासाथ विदेशी पर्यटक पनि नेपाल आउने सम्भावना बढ्ने हुँदा तयारी अहिलेबाटै थाल्नुपर्नेमा व्यवसायीहरूको जोड छ । त्यसो त नेपाल वायुसेवा निगमले पनि अन्तर्राष्ट्रिय पर्यटकलाई आकर्षित गर्न नयाँ प्याकेज ल्याउने तयारी गरिरहेको छ ।

नेवानिका निर्देशक जनकराज कालाखेतीले डिजिटल मार्केटिङसँगै अन्तर्राष्ट्रिय कनेक्टिभिटीमा जोड दिएर नयाँ शैलीमा अगाडि बढ्नुपर्ने बताए ।

यस्तै, टर्किस एयरलायन्सका नेपाल कार्यालयका जनरल म्यानेजर अबदुल्ला टंसरले पनि स्वास्थ्य मापदण्ड ढिलो र झन्झटिलो हुनुका साथै र सीमित उडानले गर्दा अन्तर्राष्ट्रिय पर्यटक नआउने तर्क गरे । ‘यतिबेला कम पर्यटक आएका छन् । अन्तर्राष्ट्रिय समुदायमा नेपाल खुला छ भन्ने सन्देश दिने गरी आगामी कार्यक्रम आउनुपर्छ ।’

बाह्य पर्यटक नेपाल आउन चाहे पनि महँगो भाडादर र आएपछिका मापदण्डका कारण पर्यटक आउन नसकेको व्यवसायीको गुनासो छ ।

यता सेभेन समिटका सञ्चालक मिङ्मा शेर्पाले लकडाउन केही खुकुलो हुँदा पर्वतीय पर्यटनमा चहलपहल बढेको बताए ।

बोर्डका उपाध्यक्ष तथा स्रोत व्यवस्थान एवं कार्यक्रम तथा बजेट व्यवस्थापन समितिका संयोजक चन्द्र रिजालले यो वर्ष डिजिटल मार्केटिङ र आन्तरिक पर्यटन नै बोर्डले प्राथमिकतामा राखेको बताए । उनले भने, ‘व्यवसायीहरूका सुझावलाई समेटेर बोर्डले नीतिगत सुधारका लागि पहल गर्नेछ । यसका साथै अबको पर्यटन जगत्‌लाई पुन: ब्युँताउन डिजिटल मार्केटिङमा जोड दिइनेछ ।’

प्रकाशित मिति: मंगलबार, असार २२, २०७८ १२:१४