एमाले अन्तरसंघर्ष कार्यदलमार्फत नै अन्त्य गर्न नेताहरू सहमत

A+ A A-

एमालेमा चुलिँदै गएको अन्तरसंघर्षको अन्त्य कार्यदलमार्फत नै गर्न नेताहरू सहमत भएका छन् । सोमबार बसेको कार्यादलको बैठकमार्फत उनीहरू यो निचोडमा पुगेका छन् । सोमबार सिंहदरबारमा करिब दुई घण्टाको छलफलपछि पार्टीका आन्तरिक समस्यालाई कार्यदलमार्फत नै निष्कर्षमा पुर्‍याउने निर्णय भएको वरिष्ठ नेता माधवकुमार नेपाल पक्षबाट संयोजक रहेका भीम रावलले बताए ।

पार्टीको सम्पूर्ण संरचनालाई एकतावद्ध बनाउनका लागि नियमित बैठकमा छलफल गर्दै एकतालाई तार्किक निष्कर्षमा पुर्‍याइने नेता रावलले बताए । ‘पार्टीका आन्तरिक समस्याहरूलाई गम्भीर रूपमा विश्लेषण गरेर समाधानतर्फका प्रयत्नलाई जारी राख्ने निर्णय भएको छ । नेकपा एमालेको संस्थागत प्रणालीलाई एकतावद्ध बनाउनका निम्ति अब कार्यदल क्रियाशील हुन्छ,’ रावलले भने ।

सोमबारको बैठकमा कार्यदलको अनौपचारिक बैठकमा छलफल भएका विषयवस्तु र जुटेका सहमतिबारे औपचारिक बैठकमा नेताहरूले जानकारी गराएका छन् । यो बीचमा कार्यदल सदस्यहरूको बैठक २५ पटक बसेको थियो । त्यस बैठकले सहमतिका लागि साझा मस्यौदासमेत बनाए पनि शीर्ष नेताहरूको असहमतिका कारण एकता प्रक्रिया निचोडमा पुग्न सकेको थिएन ।

प्रधानमन्त्री एवं एमाले अध्यक्ष केपी शर्मा ओली

सोमबारको बैठक सौहार्दपूर्ण भएको अध्यक्ष केपी ओलीका तर्फबाट संयोजक रहेका नेता सुवास नेम्वाङले बताए । ‘कार्यदलका नेताहरूबीच आज सौहार्दपूर्ण ढंगले छलफल भएको छ । पार्टी विभाजन सबैका लागि विनासकारी हुने सामूहिक निचोड छ । आम कार्यकर्ताको चाहनाबमोजिम एकतावद्ध एमालेको पक्षमा निर्णयका लागि कार्यदलले शीर्ष नेताहरूलाई आवश्यक सुझाव र सहमतिको वातावरण निर्माण गर्ने कुरा भएको छ,’ नेम्वाङले भने ।

अनौपचारिक संवादका क्रममा सहमति जुटेका कुरालाई औपचारिक कार्यदलले अनुमोदन गर्ने र नमिलेका विषयलाई मिलाउन केन्द्रित हुने निर्णय बैठकले गरेको छ । कार्यदलको औपचारिक बैठकले एमालेको एकताप्रति आशावादी संकेत गरेको सदस्य गोकर्ण विष्टले बताए ।

‘एमालेको विवादलाई औपचारिक ढंगले टुंगो लगाउनमै हामी केन्द्रित भयौँ । नेताहरूबीच संवादको वातावरण बनाउने र समझदारीमार्फत नै एकतालाई तार्किक निष्कर्षमा पुर्‍याउने निचोडका साथ मंगलबार बस्नेगरी हामी उठेका छौँ,’ विष्टले भने ।

बैठकमा एमालेको एकताका लागि संयुक्त वक्तव्य निकाल्नका लागि वातावरण बनाउने विषयमा समेत छलफल भएको छ । ओली पक्षका सदस्यहरू विष्णु पौडेल र नेम्वाङले एकताका लागि संयुक्त वक्तव्य निकाल्न वरिष्ठ नेता नेपाललाई आइतबार कोटेश्वरस्थित निवासमै पुगेर आग्रह गरेका थिए । नेता नेपालले कार्यदलमार्फत मस्यौदा तयार गरेर ल्याउन जवाफ दिएका थिए ।

झलनाथ खनाल - माधव नेपाल

नेता नेपालले एकताका लागि सम्पूर्ण प्रयत्न कार्यदलमार्फत नै हुनुपर्ने अडान राखेका थिए । नेता नेपालले एकताका लागि संयुक्त वक्तव्य निकाल्न आफू पक्षका नेताहरूले गरेको आग्रह अस्वीकार गरेपछि अध्यक्ष ओलीले वरिष्ठ नेता नेपालनिकट रावललाई आइतबार राति बालुवाटारमा बोलाएर छलफल गरेका थिए । उनले पनि कार्दल ब्युँताएर सहमति खोज्नुको विकल्प नरहेको बताएपछि अध्यक्ष ओली कार्यदललाई ब्युँताउन तयार भएका हुन् ।

‘कार्यदल ब्युँताउने विषयमा विभिन्न चरणमा छलफल भइरहेका थिए । हिजोको वार्ताबाट त्यस विषय कार्यान्वयनमा अघि बढ्यो । एकताका लागि सम्पूर्ण पहल यसै च्यानलमार्फत हुनेछ । वक्तव्यदेखि संरचनागत सुदृढीकरण र विधिमार्फत पार्टीको सञ्चालनका विषयमा कार्यदलले प्रस्ताव तयार गर्ने वातावरण बनेको छ,’ कार्यदलका संयोजक नेता रावल भन्छन् ।

पार्टीभित्रको अन्तरसंघर्ष चर्किँदै गएपछि त्यसको व्यवस्थापनका निम्ति २ जेठमा कार्यदल गठन गर्ने सहमति अध्यक्ष ओली र वरिष्ठ नेता नेपालबीच भएको थियो । त्यही सहमतिअनुसार ओली पक्षबाट सुवास नेम्वाङको संयोजकत्वमा विष्णु पौडेल, शंकर पोखरेल, प्रदीपकुमार ज्ञवाली र विष्णु रिमाल सदस्य थिए । यता, नेता पक्षबाट भीम रावलको संयोजकत्वमा सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त कार्यदलमा समावेश थिए ।

एमाले केन्द्रीय कमिटीको बैठक

१० जेठमा बसेको महाधिवेशन आयोजक कमिटीको बैठकले कांग्रेस सभापति शेरबहादुर देउवालाई प्रधानमन्त्री बनाउन हस्ताक्षरसहित सर्वोच्चमा रिट दायर गरेमध्येका ११ जनालाई साधरण सदस्यसमेत नरहने गरी निष्कास गरेको थियो । त्यसमा वरिष्ठ नेता झलनाथ खनाल र माधव नेपाल सहित कार्यदलका संयोजक रावल पनि परेका थिए । यो कारबाहीको निर्णयसँगै कार्यदलको औपचारिक बैठक बसेको थिएन ।

नेपाल-खनाल पक्षका निवर्तमान सांसदहरूलाई हस्ताक्षर फिर्ताका लागि २१ असार साँझ ५ बजेसम्म समय दिइएको थियो । यो अवधिमा हस्ताक्षर फिर्ता नभए एमाले एकता नहुने घोषणा अध्यक्ष ओलीको थियो । सर्वोच्चमा उनीहरूको हस्ताक्षरसहितको रिट निवेदनमाथिको बहस २१ असारमै सकिएको छ । बहस सकिएसँगै कार्यदल ब्युँतिएर एकताको प्रयत्न सुरु भएको छ । कार्यदलका सदस्यहरू सर्वोच्चको फैसलालाई मान्दै अघि बढ्न सकारात्मक छन् ।

आ-आफ्नै अडानमा अडिग शीर्ष नेताहरूबीच संवादको वातावरण बनाउँदै एकतालाई तार्किक निष्कर्षमा पुर्‍याउने प्रयत्न जारी राख्ने बताएका कार्यदल सदस्यहरूबीच मंगलबार एक बजे फेरी छलफल हुँदैछ । यो छलफलमा उनीहरूले अहसमतिका विषयलाई औपचारिक रूपमा उठान गर्दै सहमति खोज्ने नेताहरूले बताएका छन् ।

प्रकाशित मिति: सोमबार, असार २१, २०७८ २१:३९