यथास्थितिमा किन एमाले फर्कन चाहँदैनन् माधव नेपाल ?

A+ A A-

'नयाँ पार्टी खोलियो भने बरू केही समयमै फुलाउन सकिएला । तर, अहिले नै एमालेमा फर्किनु भनेको मृत्युपत्रमा हस्ताक्षर गरेजस्तै हो,' एमाले वरिष्ठ नेता माधवकुमार नेपालले शनिबार आफूनिकट निवर्तमान सांसदहरूसँगको संवादमा भनेका थिए ।

यो संवादको सन्देश प्रस्टै छ, नेता नेपाल यथास्थितिमा एमालेमा फर्कन चाहँदैनन् । आइतबार अध्यक्ष केपी शर्मा ओली पक्षका नेताहरू कोटेश्वरस्थित नेता नेपालको निवासमा पुगेका थिए । नेता नेपालसँग उनीहरूको आग्रह थियो, एमाले एकताको विषयमा अध्यक्ष ओली र नेपालले संयुक्त विज्ञप्ति जारी गरुन् । नेता नेपालले उनीहरूलाई भनेका छन्, 'एकताका लागि वार्ता गर्ने कार्यदल ब्युँताउनुस्, त्यहाँबाट संयुक्त विज्ञप्तिको मस्यौदा तयार गर्नुस् अनि सोचौँला ।'

नेता नेपाल तत्कालै एकताको सन्देश प्रवाह गर्ने हतारोमा नरहेको उनको भनाइले जनाउँछ । यो अभिव्यक्तिको अन्तर्य प्रस्टै छ, अध्यक्ष ओली नसच्चिएसम्म एमाले एकताको पहल नेपालबाट हुनेछैन । आफ्नो असहमतिका बाबजुद बारम्बारको एकतर्फी निर्णयले एमाले एकताको ढोका बन्द हुँदै गएको नेता नेपालको बुझाइ छ । २ जेठको साटाे २८ फागुनकै कमिटीलाई केन्द्रीय कमिटीमा रुपान्तरण गरिएकोमा उनको असहमति छ । स्थायी कमिटीमा आठ जना सदस्य थप गरेकोप्रति उनको विमति छ । यस्तै, हस्ताक्षर फिर्ता नभए एकता नहुने अध्यक्ष ओलीको घोषणामा नेता नेपालको आपत्ति छ ।

'एकतर्फी निर्णय गर्दै जाने अनि आउने आउँछन् नआउने छुट्छन् भन्ने धम्की दिने अध्यक्षको शैलीले पार्टीभित्र एकताको वातावरण बिथोलिँदै गएको छ । सहमति गरेर अघि बढ्नुपर्नेमा नेता नेपाललाई बाइपास गरेर अघि बढेपछि उहाँ मात्रै झुक्न कसरी तयार हुनुहुन्छ ?,' नेपाल-खनालनिकट स्थायी कमिटी सदस्य अष्टलक्ष्मी शाक्य भन्छिन् ।

शनिबार मात्रै नेता नेपालले अध्यक्ष ओलीसँगको संवादमा एमालेमा फर्किनका लागि आफ्ना चारबुँदे माग पूरा हुनुपर्ने प्रस्ताव अघि सारेका छन् । हालको बैठक २८ फागुनकै निर्णयकै निरन्तरता भएकाले त्यसलाई रोकेर सहमतिमा बैठक गर्न माग गरेका थिए । यस्तै, राजनीतिक र संगठनात्मक विषयलाई सच्याउँदै कार्यदल ब्युँताउन नेता नेपालको माग छ । सर्वोच्च अदालतको फैसलालाई स्वीकार गर्दै अघि बढ्न सकिने तर हस्ताक्षर भने फिर्ता नहुने सन्देश उनले ओलीलाई दिइसकेका छन् ।

नेता नेपालले यस्तो माग राखे पनि केन्द्रीय कमिटीमा अध्यक्ष ओलीसहित महासचिव ईश्वर पोखरेलले २ जेठ २०७५ को बैठक यही भएको र यसलाई नै स्वीकार गरेर आउनुपर्ने बताए । 'कसैलाई पर्खिरहनुपर्ने बाध्यता छैन । यो बैठक २ जेठ २०७५ कै हो यसमा नआउनेहरू छुट्छन् । यात्रामा अघि बढिरहे नयाँ साथीहरू पनि भेटिन्छन्,' ओलीको भनाइ थियो ।

यस्तै, महासचिव पोखरेलले भनेका छन्, 'उहाँहरू नआउने छुट्टै कुरा भयो । तर, २०७५ २ जेठको बैठक यही हो ।'

अध्यक्ष ओलीले केन्द्रीय कमिटीको बैठक रोक्न माग गरेका थिए । तर, बैठकलाई निरन्तरता दिँदै ओलीले सोमबार बेलुकासम्म हस्ताक्षर फिर्ता नगर्नेलाई एमालेमा स्थान नहुने सन्देश दिए । 'विपक्षी गठबन्धनलाई बलियो बनाउनेलाई एमालेमा स्थान छैन । हस्ताक्षर फिर्ता नगर्नेहरू एमाले रहन सक्दैनन्,' उनको भनाइ थियो ।

दुई दिनको केन्द्रीय कमिटी बैठकले विधान अधिवेशनबारे पाँचबुँदे प्रस्ताव पारित गरिसकेको छ । एकता प्रक्रिया नटुङ्गिँदै महाधिवेशनको मिति र विधान अधिवेशनबारे प्रस्ताव पारित भएपछि नेपाल थप रुष्ट छन् । 'बैठक रोक्न आग्रह गर्दा बैठक चलाउने, त्यही बैठकबाट हस्ताक्षर फिर्ता नभए एकता नहुने चेतावनी दिने र सहमतिबिनै महाधिवशेनको तयारीका प्रस्ताव पारित गर्ने एकतर्फी निर्णयले नेता नेपाल चिढिनु स्वाभाविक छ,' नेता भीम आचार्य भन्छन् ।

पटक-पटक संसद् विघटनको निर्णय गर्ने प्रधानमन्त्री ओलीले दम्भ देखाउँदै जाने तर संविधान र लोकतन्त्रको पक्षमा लड्ने आफूहरू झुक्नुपर्ने स्थिति स्वीकार्य नहुने नेता नेपालले बताउने गरेका छन् । नेपालले आफूनिकट निवर्तमान सांसदहरूसँग भनेका छन्, 'राजनीतिक र संगठनात्मक कोर्स करेक्सन नगरी हस्ताक्षर मात्रै फिर्ता गर्नुपर्ने अडानले एकताको सम्भावना टाढिएको छ ।'

नेता नेपालले एकताको सम्भावना टाढिएको बताइरहँदा उनकै निवास पुगेर ओली पक्षका नेताहरूले पार्टीलाई एकतावद्ध गरेर अघि बढाउन प्रस्ताव गरे । विपक्षी गठबन्धन छाडेर पार्टीमा फर्किए उनले भने जसरी पार्टी चलाउने प्रस्ताव गरिएको नेता सुवास नेम्बाङले जानकारी दिए । ‘एमालेमा समाधान गर्न नसकिने कठिन र जटिल समस्याहरू छैनन्,’ उपमहासचिव विष्णु पौडेलले आफूहरूले दिएको सुझाव उल्लेख गर्दै भने, ‘तपाईंहरू एक-आपसमा बस्नुहोस् । समाधान खोजेर अगाडि जाउँ । पार्टी अध्यक्ष र तपाईंको बीचमा मिटिङ होस्, हामी त्यो चाहन्छौँ ।’ तर, नेता नेपालले अध्यक्ष ओलीसँग संवादमा बस्न इच्छा नदेखाएको पौडेलले बताए ।

अधिकतम एकताको प्रयत्न गर्ने भन्दै नेता नेपालले आफूनिकट नेताहरूसँग बाध्यकारी अवस्थामा मात्रै नयाँ पार्टी खोल्ने बताइरहेका छन् । हस्ताक्षर फिर्ता गरेर एमालेमा प्रवेश गर्ने हतारो नगर्ने उनकाे प्रस्टोक्ति छ । पार्टी विभाजन दुवै पक्षका लागि हितकर नहुने दोस्रो तहका नेताहरूको सुझावका बाबजुद नेता नेपाल अडिग छन्,' तत्कालकै अवस्थामा ओलीलाई स्वीकार्न सकिँदैन ।'

प्रकाशित मिति: आइतबार, असार २०, २०७८ १८:११